وعرفت ساعتها ان احساس الام مبيخيبش

من حوالي اسبوعين وانا راجع البيت في شارع البحر الاعظم لقيت شاب في العشرينات سايق عربيه هيونداي اكسيل لونها اخضر ..ماشي بالراحه وبيحاول يسأل على حاجه فهديت جنبه بالعربيه ولقيته بقولي باسلوب مهذب جدا ولهجة تنم عن انه ابن ناس ف....ش "سلامو عليكو .. (بدأ يقلبها صعبانيات) معلش بس والمصحف الشريف هتقطع مني بنزين (وهنا قلبت شحتفه) والله العظيم انا مش من هنا ومش عارف ايه وايه وايه "

- وطبعا عشان انا طول عمري شاب محترم وجدع وخير وطيب وكريم بطبعي ومبحبش اتكلم عن نفسي كتير يعني زي مانتو عارفين عشان انا اصلا متواضع ولذيذ ومهذب وابن ناس واقدس الحياه الزوجيه واشارك في الاثاث والاعمال المنزليه وكده يعني.....-

المهم راحت كل الصفات دي نقحت عليا - وانا اصلا مبحبش اتكلم عن نفسي -.. واديتله 20 جنيه للاسف كانت اقل حاجه معايا ساعتها - عشان زي مانتو عارفين اني راجل جامد وغني فحت ومبقدرش اشيل مبالغ اقل من كده وكده يعني... -

الغريب بقى ان اليوم ده والدتي كانت راكبه جنبي العربيه وعلى غير عادتها قالتلي" سيبك منه "
- على الرغم من انها اساسا كريمه جدا وطيبه وحبوبه وطبيخها هايل ودمها خفيف ومبتحبنيش اتكلم عن نفسها برضو زيي كده بالظبط - .... لكن هي ساعتها قالتلي "سيبك منه" وانا طبعا مسمعتش كلامها ساعتها

امبارح بقى وانا مروح وواقف في اشارة شارع الدقي اللي عند جنينه الاورمان بعد سمسمه بتاع السندوتشات - اللي انا باحب اشتري من عنده دايما شيش طاووق وشاورمه شامي وكوردن بلو عشان انا عامل دايت - لقيت نفس ذات الشاب ده بنفس ذات العربيه الاكسيل الخضراء جنبي وسبحان الله بدا يتكلم معايا وعاوز يسالني وبدأها برضو وهو غلبان كده وقالي "سلامو عليكو" رحت انا عشان غبي قلتله على فكره انت وقعت معايا قبل كده
قالي بسرعه وارتباك لأ انا مش عاوز حاجه انا بس بسأل على مديرية امن الجيزه
قلتله الدخله اللي جايه شمال ومشيت وانا متغاظ جدا
وعرفت ساعتها ليه امي الطيبه الحنينه اللي كلمتكو عنها قبل كده ماستريحتلوش تماما
واتاري قلب الام ده حاجه عظيمه واتاريني انا طلعت عبيط

المهم بقى انا من هذا المزنق احب اقول لكل شاب وكل فتاه بيسوق عربيات في الجيزة وضواحيها وفروق التوقيت لو قابلكو الشاب ابن الناس اللي راكب عربيه هيونداي اكسيل خضرا .. امانه عليكو تجيبولي منه العشرين جنيه عشان احنا في اخر الشهر "والمصحف انا عاوز احط بنزين عشان ممكن تقطع مني بنزين وانا اصلا مش من هنا ... عاااااااااااااااااااااااا ااااااااااااااااااااااااا ااا"