الموضوع: شوية استفسارات

في البداية احب ارحب بيك في قسم سيات نايل موتورز
والف مبروك عليك العربية - ربنا يديك خيرها ان شاء الله

المشاركة الأصلية كتبت بواسطة smartech

انا الحمد لله اشتريت عربية سيات ابيزا موديل 94 1300 سسي ، قبل العيد وابتديت رحلة تضبيط العربيه

ابتدت الرحله بتغيير الاتى ودى الاسعار علشان لو حد عايز يعرف الاسعار :

فتيس استعمال من الحرفيين كلفنى 400 جنيه وطبعاً زيت للفتيس 40 جنيه
ديسك جديد 250 جنيه طب غيرت ليه الديسك لوحده - ليه ماجبتش الطقم علي بعضه (اسطوانة وديسك وبلية؟؟)

بطاحات اماميه 160 جنيه
فلتر هواء 65 جنيه
كونتاكت بالمفتاح استعمال 150 جنيه
اشارات اماميه الاتنين 75 جنيه
وش ايسبراتير جديد 60 جنيه
بوجيهات 3 شمعه و الكابلات الى داخله من الاسبراتير للبوجيهات 230 جنيه
فلتر بنزين 15 جنيه
زجاج امامى علشان كان فيه شرخ 380 جنيه

والحمدلله العربيه اتضبطت شويه ، بس عندى شويه استفسارات لو حد يقدر يفيدنى فيهم :

اولاً : بحس برجه فى العربيه اول مابدور تحت عصاية الفتيس ، بس الصوت ده بيروح اول مابتحرك بالعربيه وامشى يعنى فى بدايه الدواره ، وكنت عايز اعرف احتماليات الصوت ده ممكن يكون من ايه

شيك علي افيزان الشكمان

ثانيا : كنت بضبط زوايا من كام يوم والراجل بتاع الزوايا قالى ان جلب المقصات عندك عايزه تتغير و ان القنطره فيها خبطه ، ضبطهم الاول و بعد كده نضبط زوايا ..
وبالفعل رحت جبت جلب المقصات ب 80 جنيه وركبتهم وكنت عايز اعرف هى القنطرة دى سهله فى تغييرها (يعنى بتتحل عادى و تتركب واحده مكانها ولا هى ملحومه فى الشاسيه )

القنطرة بتتغير عادي جدا
نصيحة ماتحاولش تستعدلها - بتتغير بواحدة استيراد
هتلاقي ثمنها في حدود 250 جنيه بدون قواعد ولو بالقواعد ممكن توصل ل400 جنيه
الموتور بيركب علي قنطرتين واحدة امامية وواحدة خلفية

ثالثاً : فيه خرطوم سايب عندى خارج من الماتور وسايب بره كده لما سألت الميكانيكى قالى ده خرطوم الفايظ ، ده طبيعى يبقى سايب كده و لا ايه ، لانى ساعات بحس بريحه زيت محروق وانا سايق بس ده مش على طول . فهل ممكن الريحه دى تبقى منه ؟

لو خرطوم تخين شوية وخارج من بلوكة الموتور - فدة خرطوم فايظ الزيت
ودة بيطلع بخر الزيت من داخل المحرك وبيدخله الي عمة الكربراتير ووظيفته تدفئة الهواء الداخل للعمة ووبيقوم بتزييت للصبابات علشان مايحصلهاش تأكل

برضه كنت عايز اعرف ازاى اعرف اذا كان الماتور بتاع العربيه خفيف ولا لأ ، اعرف ازاى ؟

هل في دخنة بتخرج من الشكمان ؟؟؟
ولو في دخنة - لونها ايه ؟؟

اخر حاجه بقى هو ينفع اشترى اكرة باب استيراد واخلى الراجل بتاع المفاتيح يضبطلى مفتاح الكونتاكت عليها ولا هيبقى ليها مفتاح لوحده ، علشان فيه اكره عندى ملهاش قلب وبفتح دلوقتى من السنتر او من جوه

هتجيب اوكرة استيراد (خلي بالك فيها يمين وشمال) وبتركب عادي وبتاع الأبواب بيظبط مفتاحك عليها
الأوكرة في حدود من 80 - 100 جنيه

اسف على الاطاله ولكم جزيا الشكر

لو محتاج اي حاجة تاني 0 تابع معانا في القسم ويسعدنا جدا مشاركتك في موضوعاتك
لا تتردد في السؤال

تحياتي
والله المستعان
،
،