كيفية تغيير فلتر الهواء والتكييف للسيارة frv...مصور

**Mostafa Hessen** · 21-11-2012 12:46 AM

السلام عليكم ورحمة الله
أحبابى اعضاء منتدى البريليانس
وبناءا لدعوة الأستاذ باسم منسق القسم الصينى
والأستاذ أحمد منسق قسم البريليانس
بتطوير القسم وطلبهم بشرح تغيير فلتر الهواء والتكييف
فأنا مش حقدر اتأخر عنكم وححاول اقدم الموضوع بشكل بسيط وياريت يعجبكم وانا تحت امركم فى اى استفسار سواء فى الموضوع ده أو فى اى شئ يخص عربياتكم...

أولا التقرير ده حيخدم السيارات 1600 بشكل اساسى سواء FRV أو FSV
ثانيا الموضوع فعلا بسيط محدش يقلق ابدا العربيات دى متينه فعلا وده مش كلام
ثالثا انا حاولت اوضح كل شئ على الصور لسهولة الأمر عليكم رغم سهولته
رابعا ياريت مكنش ضيف تقيل عليكم استحملونى

ندخل فى الموضوع
احنا حنغير أو ننظف فلترين الهواء والتكييف وطبعا كل واحد وراحته وحالة الفلاتر

دى صورة لأماكن الفلاتر اللى حنشتغل فيها..

حنبتدى بإذن الله بفلتر الهواء
وحتلاقيه على يمينك أول متفتح الكبوت وبيبقى متركب ب 4 مسامير يتم فكهم بمفك صليبه
ومش حيتفكو للآخر يعنى مبيتخلعوش فكهم لغاية متحس انك بتفك على الفاضى

زى الصورة دى

بعد الفك حنرفع عمة الهواء بكسر العين وحنلاقى تحت العمة ايه مش شيخ حنلاقى فلتر الهواء

وطبعا نقوم بتنظيفه لو حالة الفلتر كويسه ونراعى عند التنظيف انه يكون من الإتجاه العلوى للفلتر للإتجاه السفلى عن طريق البلاور او مسدس الهواء فى البنزينه

على فكره موضوع تنظيف الفلتر أو تغيره ده بيفرق جدا فى السحب
كما يراعى تنظيف الجزء الداخلى اسفل الفلتر بعد رفعه

وبعد ذلك يتم تركيب الفلتر بعد تنظيفه أو تغيره مكانه وغلق عمة الهواء مره أخرى بالمسامير وبكده يبقى مبروك عليكم تغير الفلتر او تنظيفه ويتمتع الموتور بهواء نظيف ينعشه ويزيد السحب..

ندخل بقه على فلتر التكيف
وحتلاقيه على شمالك وانت فاتح الكبوت تحت المساحة
فى جزء بلاستيك مثبت بمسامير يوجد باسفله الفلتر

اول شئ حنلاقى فيه كاوتش بيحمى الموتور من ناحية الزجاج الأمامى ده حنرفعه لفوق من الناحية اللى حنفتح فيها للفلتر.
ثانيا حنلاقى 3 مسامير حنقوم بفكهم بمفك صليبه ورفع الجزء البلاستيك من الأمام وسحبه للخارج
وبكده يبقى فكناه

تحت الجزء ده حنلاقى علبه مقفولة تحتها الفلتر

حنقزم بفك مسامرى تثبيت العلبة من اعلى ويتم سحب الغطاء للخارج مع رفعه لأعلى قليلا وهذا لوجود ذراعين تثبيت من الداخل

سنجد الفلتر ونقوم برفعه من مكانه لأعلى ثم يتم تنظيفه او تغيره حسب حالته
يتم التنظيف بالبلاور او مسدس الهواء

نراعى واحنا بنركب الفلتر اتجاه التركيب عن طريق السهم المبين على الفلتر لإتجاه التركيب
كالصورة

وبعد ذلك يتم تركيب الغطاء مع مراعاة احكامه من الداخل مع الذراعين اللى سبق الإشارة ليهم
ودى صورة توضح احد الذراعين

وبعد تركيب الغطاء نقوم بتركيب الجزء البلاستيك اسفل المساحه ونراعى وجود اذرع خلفه يتم احكامها تخت البربريز كالصورة

وعند تركيبه يراعى تركيبه من الطرف الخارجى اولا ويتم مراعاة خرطوم مياه المساحات وايضا الأذرع لإحكامه بالبربريز

بعد ذلك يتم تثبيت المسامير الثلاث مره أخرى فى اماكنها
وتركيب الكاوتش فى مكانه مره اخرى

وبكده يبقى انتهينا

ياريت يكون الشرح واضح ومكنش طولت عليكم ولا زهقتو منى
تقبلو تحياتى...

**احمد نور الدين** · 21-11-2012 02:02 AM

يا باشا كنتم فين من زمان والله عشرة علي عشرة تسلم ايدك انت خليت الموضوع في غاية البساطه والسهوله

**S O P H O S** · 21-11-2012 03:24 AM

ما شاء الله
مجهود رائع ..

**Mostafa Hessen** · 21-11-2012 10:48 AM

المشاركة الأصلية كتبت بواسطة el_lod_81

مجهود رائع للغاية و أتشرف بأن أكون أول من يقدم تحية شكر و تقدير واجبة لهذا الشرح الوافى الدقيق و المفيد للكثير من الناس.
وأود أن أسأل اٍذا كان ينطبق على الجالينا أيضا أم فقط على ال1600؟

متشكر جدا على ردك
انا اللى متأكد منه انه ينطبق على ال 1600 الجالينا مقدرش اديك رد فيها دلوقتى حدور وارد عليك.

**Mostafa Hessen** · 21-11-2012 10:51 AM

المشاركة الأصلية كتبت بواسطة احمد نور الدين

يا باشا كنتم فين من زمان والله عشرة علي عشرة تسلم ايدك انت خليت الموضوع في غاية البساطه والسهوله

شكرا يا أحمد بك المهم الناس تستفيد
وعلى فكره الموضوع فعلا بسيط انا معملتش حاجه.

**Mostafa Hessen** · 21-11-2012 10:53 AM

المشاركة الأصلية كتبت بواسطة احمد نور الدين

يا باشا كنتم فين من زمان والله عشرة علي عشرة تسلم ايدك انت خليت الموضوع في غاية البساطه والسهوله

نورت بمرورك يا استاذ احمد
تحت امركم

**Mostafa Hessen** · 21-11-2012 11:04 AM

المشاركة الأصلية كتبت بواسطة s o p h o s

ما شاء الله
مجهود رائع ..

مشكووور على المرور الجميل

**bassem.naguib** · 21-11-2012 06:20 PM

هو ده التقرير اللي قلت حتعمله يا ريتنا ما طلبنا منك حاجة ... تقرير ضعيف وميتفهمش منه حاجة وغير منظم حتى الصور اللي فيه مش مبينه حاجة خالص ... يا ريتك ما عملته ولا تعبت نفسك فيه

مش لاقي كلام غير أني أقول تسلم أيديك يا مصطفى باشا على التقرير الجامد ده .. ودي أقل حاجة ممكن أقولها .. ومجهود رائع من إنسان رائع .. بجد وبدون مبالغة استمتعت بقراءة التقرير ده .. تحياتي ليك يا كبير .

ونحن في انتظار المزيد من نوعية هذه الموضوعات الرائعة

**Mostafa Hessen** · 21-11-2012 07:29 PM

المشاركة الأصلية كتبت بواسطة bassem.naguib

هو ده التقرير اللي قلت حتعمله يا ريتنا ما طلبنا منك حاجة ... تقرير ضعيف وميتفهمش منه حاجة وغير منظم حتى الصور اللي فيه مش مبينه حاجة خالص ... يا ريتك ما عملته ولا تعبت نفسك فيه :pointiy2[2]::pointiy2[2]::pointiy2[2]:

مش لاقي كلام غير أني أقول تسلم أيديك يا مصطفى باشا على التقرير الجامد ده .. ودي أقل حاجة ممكن أقولها .. ومجهود رائع من إنسان رائع .. بجد وبدون مبالغة استمتعت بقراءة التقرير ده .. تحياتي ليك يا كبير .

ونحن في انتظار المزيد من نوعية هذه الموضوعات الرائعة

مشكور يا استاذ باسم وانا اسعدنى جدا ردكم والخضة اللى عملتها فيا
وصدقنى انا تحت امركم فى اى شئ
واتمنى اقدر افيد الكل بالمعلومات البسيطة اللى عندى
تقبل تحياتى وفائق تقديرى

الموضوع: كيفية تغيير فلتر الهواء والتكييف للسيارة frv...مصور

LinkBack

أدوات الموضوع

عرض

كيفية تغيير فلتر الهواء والتكييف للسيارة frv...مصور - انشر الموضوع فى :

-

-

-

-

-

-

المواضيع المتشابهه

كيفية تغيير فلتر تكييف الاوبترا بالصور - خاص بالأستاذ afrtow

تغيير فلتر الهواء خطوة خطوة - بالصور

درس تعليمى: تغيير فلتر الهواء لبونتو كلاسيك

فلتر الهواء والتكييف الالنترا 2010

صيانة صمام الهواء للسيارة بروتون ويرا

الكلمات الدلالية لهذا الموضوع

المفضلات

المفضلات

ضوابط المشاركة