السلام عليكم

أنا محتاج مساعده ونصائح في تظبيط شويه كماليات متنوعه لسيارتي
العربيه إلنترا 2008 مانيوال لون فضي

هقسم الكلام لنقاط علشان يكون واضح ومنظم

1- بخصوص الفرش
هي عليها فرش فوق فرش الفبريكه بس حالته وحشه وهغيره يوم الخميس
محتاج أعرف أحسن نوع فرش اسمه ايه وجلد بس ولا جلدxقماش ولا إيه الأفضل يكون مريح وما يسخنش جامد في الشمس
وطبعا يكون تفصيل مش مجرد كسوه جاهزه وتلبس عالكراسي
ميزانيه الفرش في حدود 1000 جنيه

2- بخصوص الكاسيت
العربيه فيها كاسيت الفبريكه اللي هو دا

حاليا انا شغال بـ MP3 بلاير عالولاعه بس حاسس ان الصوت مش نقي
فمحتاج أجيب كاسيت جديد
أهم حاجه عندي في الكاسيت يكون فيه منفذ USB او SDcard او كلاهما معا ما بستعملش سيديهات أبدا
ويكون منفذ في الكاسيت مش مجرد سوكيت بسلك زي ما موجود سوكيت usb في الفبريكه كدا
لو موجود خيار dvd بـGPS ويديني نفس نقاء صوت الكاسيتات البايونير او السوني مع فرق سعر بسيط يبقي تمــــــــام جدا
مع ملاحظه الأتي :: هشغل الكاسيت او الديفيدي الجديد علي سمعات الفبريكه ولن اغيرها
يهمني نقاء الصوت وليس علوه .. الميزانيه المتاحه للكاسيت او الـDVD+GPS هي من 500 إلي 2500 جنيه

3 - النواكل والشكل الخارجي
محتاج طقم نواكل كامل بقي - أوكر ابواب وفريمات الشبابيك وخلافه
دا يعمل كام وألاقيه فين ؟!
وكمان نفسي أركب فاميه يكون نوع كويس وأخـــــف درجه لون
يعني فقط يمنع الحراره الي حد ما ويضفي شكل جمالي بسيط وايضا ما يوقفنيش في كل لجنه
فالفميه الخفيف جدا او النوع زيرو دا اسمه ايه بالظبط وايه افضل نوع ويكلف كام ؟؟

وأخيرا ... هل فيه جرايد او ماشابه بيتلزق عالإكصدامين الأمامي والخلفي لإضفاء شكل جمالي وحمايتهم الي حد ما من الخدوش والتريحيات البسيطه ؟!!
ولو موجودين اسمهم ايه والاقيهم

انا من الزقازيق .. وان شاء الله ناوي اجيب واعمل الشغل دا كله في الزقازيق
مش عايز انزل القاهره إلا في حاله ان الحاجه ما تكونش عندنا هنا فقط
بأكره السفر جدا خصوصا مع ضيق الوقت

بعتذر عن اللغو الكتير يا جماعه وكثره الأسئله
بس العشم بقي

شكرا جزيلا وفي الإنتظار النصائح والمقترحات إن وجد