الموضوع: تقرير عن تجربة جلب فورد لمقصات النوبيرا

بسم الله الرحمن الرحيم

اولا شكر خاص للزميل العزيزhaimaN

كان عندى مشكله فالعفشه و روحت للعفشجى يكشف عليها قالى عاوزه جلب مقصات و بيضه مقص المهم غيرت الاربع جلب و بالمرة غيرت الطنابير و التيل ..المهم قبل ماركب الجلب مكنتش مقتنع بيها و قلت للعفشجى لو الجلب ديه مش كويسة قولى عشان مانركبهاش قالى لا دى كويسة و تمام ... المهم ركبهم و قالى روح اظبط زوايا .. روحت اظبط زوايا الراجل كان عنده ضمير الحقيقه و قالى انزل تحت العربية اوريك حاجه و قعد يهز العجل و ورانى ان المقص مش ثابت مع هز العجل فقالى الجلب دى بايظه و حرام اظبطلك زوايا هتبقى بتتدفع فلوس فالارض قلتله ده انا لسه مركبهم قالى للاسف كل الى فالسوق كده .. رجعت للعفشجى عشان افهمه ان الجلب دى بايظه عشان مايركبهاش لحد من بعدى هو مالوش ذنب قالى لا و كابر و عاند قالى دول كويسين قلتلوا طب تعالى لبتاع ضبط الزوايا (وهو الى فى الاساس كان قايلى اروح اظبط عنده) نزله تحت العربية و بعديها اقتنع و قال نفس الكلمتين كل الفسوق كده قلتله عشان تبقى ماتفتيش فحاجه انت مش عارف هى كويسة ولا لأ وراح ماشى وقلت اظبط زوايا و خلاص و نشوف....

للاسف طلعت اول مشوار العربية سيئه جدا و عمرى ماسوقتها و هى فالحاله ديه عماله تروح منى يمين و شمال حتى لو على سرعه قليله هى مش بتحدف زى لما تكون عاوزه ضبط زوايا لأ انت بتحس ان الدركسيون نفسه بياخدك يمين او شمال.. طبعا انا خفت امشى بالعربية كده و قلت لازم اشوف الحل...

دخلت عالموضوع الحل النهائى لمقصات النوبيرا لاعضاء احلى منتدى
وقدرا الراجل الى زميلنا عمل عنده الشغل ده جنبى رحتله و قابلت المهندس احمد صاحب المركز و طلع جرب قالى الجلب فعلا فالضياع قلتله عاوز اغيرهم بجلب فورد جبنا الجلبتين بحوالى 150 جنية و الجلب الصغيرة جى ام ب 40 جنية و غيرت تيش الميزان الاتنين ب 100 جنية و هو خد مصنعية حوالى 80 جنية ..
مقاس الجلب الفورد اصغر سنه من الاصلى و عشان كده ادى كل جلبة فورد 8 بنط لحام 4 فكل جنب الحقيقه انا كنت قلقان من الحوار ده لكن هو طمنى و ركبنا المقصات
قلت اظبط زوايا عند نفس الراجل روحتله و قالى هز الدركسيون كده قالى الجلب دى تمام اوى و الصنايعى الى عملك الشغل و بنط اللحام ديه صنايعى فاهم (يعنى اللحام مش غلط) و ممكن تقعد معاك اكتر من سنه.

طلعت اول مشوار قلت مفيش احسن من كوبرى اكتوبر..
الاختلاف:- اولا احساس بالثقه ماشاء الله العربية بقت ثابته عالطريق لو سيبت ايدك من عالدركسيون مش بتحدف,ثانيا الدركسيون بيرد معاك بسرعه فالملفات,ثالثا سحب العربية بقى افضل لانها بقت ماسكه نفسها
العيب الوحيد ان لما جلب الفورد تبوظ لازم اغير المقص عشان اللحام
الحقيقة انا من فترة طويله ماسقتش العربية و لا جريت بيها بالثقه ديه و انصح اى حد عنده نفس المشكله يركب جلب الفورد و ينسى

شكرا و اتمنى اكون افدتكم