العربية حيرتنى!! مش عارف اعمل اية ؟

اول وقبل كل شئ انا بشكر كل القائمين على المنتدى والمشاركين فى كل المواضيع الى فى قسم السيات وشكرا جدا على معلوماتكوا القيمة اللى بتقدموها للاعضاء واللى انا استفدت منها كتير جدا جدا وقت ماشتريت العربية ولحد دلوقتى :beat1: وانا محمد عضو قديم معاكو بس مشاركاتى قليلة نتيجة لظروف شغلى المنيلة

وبعد اذنكوا محتاج منكوا شوية مساعدة
انا معايا عربية سيات كوردوبا 1997 موتور 1800 سى سى جبتها شهر 2 اللى فات ونزلت صور ليها وعملت موضوع عن تقييمى للعربية لحد فترة شهر 6 وطبعا لما صرفت على العربية شوية حلوين ( طقم دبرياج - طرمبة باور - طرمبة بنزين - مساعدين خلفى جديدة - كوبلن كامل شمال - جوز مساعدين امامى -ماستر خلفى+تيل )العربية فاقت كتير والحمدلله المكنة مكنش فيها اى خلل للتغير فيها
لكن لاحظت الايام اللى فاتت ان فى دخنة طالعة من العربية من الشكمان عند التدوير وهيا باردة ملاحظتش اوى ان لون الدخنة لونها اية بظبط بس هيا عاملة زى ريحة البنزين النى اللى متحرقش كويس وايف ليكون فى حاجة فى الموتور وربنا يستر

والعربية وانا ماشى بيها ودايس على البنزين ومثلا عايز ادوس على الدواسة اكتر عشان اجرى شوية بحس ان العربية تقيلة فى السحب على التانى والتالت اكتر ومش بتستجاب علطول لكن بعد كدة بتجرى عادى

وفى حاجة وانا رايح مشوار وخلصته اجى احط ايدى على الهاند بريك والحته اللى تحتيه الاقيها سخنه بشكل ملحوظ يعمل سخونة فى العربية جامدة روحت لبتاع الشكمانات قالى الشكمان مفهوش اى مشكلة وزى الفل سالته اية ممكن يكون السبب قالى ظبط المكنة بتاعتك هواء وبنزين مع بعض عشان الضغط اللى طالع من المكنة جامد ده اللى بيخليك تحس بسخونة تحتيك فى الهاند :U_thin1[1]:

وفى حوالى بظبط 3 مرات عملت معايا حاجة غريبة انا مستغرب منها لحد دلوقتى وانا لسه فى مرحلة تدوير العربية وفتحت الكونتاكت وهدى التكه اللى هتشغل الموتور وبقول يا هادى لقيت صوت زى ونة كدة او حاجة بتعمل ززززززززز يا فتاح يا عليم يا رزاق يا كريم وروحت قفلت الكونتاكت ورجعت اشغل تانى دارت عادى وفى ال3 مرات الصبح وانا رايح الشغل وانا مش بفهم اوى فى العربيات على قدى بس حاسس انه ممكن يكون من الدينامو بصراحة مش عارف ؟ رحت سالت الميكانيكى بتاعى قالى ترس الفلام :Copy of rfds:

وعندى مشكلة لما بدوس على الدبرياج صوت تزييق من البدال تحت لكن مش تقيل ولا خفيف عادى بس صوت التزييق ده خنقنى

واخر حاجة واسف انى طولت عليكوا

الهاند بريك وانا راكن العربية فى حته نازله شوية المفروض تقف عادى ومفيش مشكلة بلقيها بتنزل واجيب لسادس تكه وبتقف بالعافيه لو واحد سند على العربية تتحرك مش عارف اشوف سلك الهاند واشده ولا اجيب هاند استيراد ولا اية ؟؟

وبعتذر عن الاطالة ولكم جزيل الشكر

يا باشا عربيتك زي الفل ومافيهاش اي حاجة

اولا اكشف علي البوجيهات ولو عايزة تغيير غيرها - لو سليمة - اكشف علي سلوك البوجيهات نفسها
أقولك - اكشف علي الطقم كله - الأسبراتير والغطاء والشاكوش والسلوك والبوجيهات
علشان تطمن تماما من ناحية السحب والريحة والدخنة بتاعة اول الدوارة

ثانيا بالنسبة للتزييق - هتزيت البدال من ناحية الصالون - بيبقي في سوستة - احتمال بسبب الشتا والرطوبة تكون عايزة تتزيت او ترشها بwd40

ثالثا بالنسبة للهاند - هترجلشها - واكشف علي التيل الخلفي

اما عن السخونية - فاستني لحد لما تظبط الأسبراتير وبعدها شوف الدنيا ماشية ازاي - بس انا شاكك انها افيز الشكمان او في تنفيس في العلبة الوسطانية

وعلي فكرة بالنسبة للصوت مع الدوارة فدة ترس بندكس وليس ترس فلام

تحياتي

مش عارف اقولك اية والله يا ابو السيد ربا يخليك على معلوماتك القيمة يا كبير

هوا انا عندى مشكلة كبيرة اوى دلوقتى ومش عارف حلها اية ونسيت خالص الموضوع ده انا لما اشتريت العربية من الراجل وكان فيها مكنة 1800 مدانيش الورق بتاع الموتور او هوا مش معاه الموتور وانا مش عارف اجيب ورقها منين دلوقتى وعندى فحص 2013 ؟؟؟؟ و الموضوع ده بيخلص ازاى فى المرور ضرورى لازم ورقها ولا ينفع تعدى بالحب ولا اية انا مش عارف ؟؟؟

اقتباس:

---

المشاركة الأصلية كتبت بواسطة mody_benz

مش عارف اقولك اية والله يا ابو السيد ربا يخليك على معلوماتك القيمة يا كبير

هوا انا عندى مشكلة كبيرة اوى دلوقتى ومش عارف حلها اية ونسيت خالص الموضوع ده انا لما اشتريت العربية من الراجل وكان فيها مكنة 1800 مدانيش الورق بتاع الموتور او هوا مش معاه الموتور وانا مش عارف اجيب ورقها منين دلوقتى وعندى فحص 2013 ؟؟؟؟ و الموضوع ده بيخلص ازاى فى المرور ضرورى لازم ورقها ولا ينفع تعدى بالحب ولا اية انا مش عارف ؟؟؟

---

باشا صباح الفل
مبروك العربيه وربنا يديك خيرها ويكفيك شرها
موضوع الورق انت هتبدا فيه من دلوقتى وضرورى ضرورى تخلصه قبل الفحص بفتره عشان مليان حوارات ممكن تطول
وانا هتابع معاك الورق ان شاء الله لحد ما يبقى فى ايدك بس بلاش تكسل عنه عشان هيوقفلك الترخيص الناس هناك كلهم بيراجعوا على بصمه الموتور من اصغر عامل لاكبر ظابط
انت هتكلم اللى انت واخد منه العربيه وتسأله مسقط عند مين
وتاخده وتروحله فى احتمالين اول احتمال ان يكون التاجر هو نفسه المستورد والورق باسمه زى الحاج سوسو اللى فى اللبينى او يكون شارى من تاجر تانى فى بورسعيد
فى الحالتين هتشوف هل فعلا صاحبك استلم الفاتوره المختومه بختم معتمد ودى فاتوره من التاجر مختومه بختم مكتوب جواه التاجر معتمد وعليها النسر لو استلمها وضاعت تطلب من صاحب المحل فاتوره تانيه وده فى حاله ان هو التاجر الاصلى ولو مستلمهاش من الاساس هتضطر تدفع تمن الورق اللى هو 100 او 150 او 200 مش كل التجار زى بعض وتاخد الفاتوره بس خليها باسمك انت مهم جدا انها تكون باسمك لو هو من تاجر تانى بره القاهره يبقى كده كده هتدفع مصاريف الورق حتى لو كان صاحبك دفعها لان هيخلى حد يسافر مخصوص وبرضه هتخليه باسمك وتبع المرور اللى انت تابع ليه
او ما يجيبلك الفاتوره المختومه وصوره من الافراج الجمركى هتلاقى فى رقم مكتوب بخط الايد على صوره الافراج بالاضافه للاختام وده فى حاله انه نقلك الموتور على المرور بتاعك لو لسه مش هتلاقى الرقم ده
هتروح المرور بصوره الافراج وتسأل الموظف هل المكنه دى جت طبعا المرور الرئيسى اللى فى منطقتك يعنى المرور الرئيسى بتاع الجيزه هو مرور الدقى المشهور ببين السرايات حتى لو رخصتك فيصل
لو قالك جه قله انا عايز احوله للمرور بتاعى اللى هرخص فيه هيسألك بصفتك مين وهنا هتعرف فايده ان الموتور بأسمك هيروح كاتبلك رقم تانى عل صوره الافراج هيقولك ده رقم الصادر اللى هتسأل بيه فى المرور بتاعك لما الورق يروح المرور بتاعك وتروخ تسأل هتلاقى الموظف بيقولك تعالى افحص
تروح تنام بقى وتستغطى لحد قبل ما الترخيص يخلص بشهرين وتبدأ تجرى تانى متخفشى الشهرين مش هيروحوا عليك ويتحسبوا فوق السنه المجدده ولو عندك اى استفسار فى موضوع الورق او عايزنى اكلم الراجل اللى انت واخد منه العربيه افهم منه عمل ايه ده رقمى كلمنى اى وقت 01110079163 اخوك احمد عبد السلام
بس بلاش بلاش بلاش تنفض عشان كل ما الموضوع بيقدم بيبقى صعب تلاقى ورقك
الورق بياخد من 3 الى 4 ايام للنقل من مرور لمرور حتى لو كان بره القاهره انا ورقى جه بعد 3 ايام من طنطا

ربنا يخليك يا احمد بيه والله بجد مش عارف اقولك اية ربنا يخليك بجد على مساعدتك ليا وانا الموضوع بدا يترتب فى دماغى اهو واللى انتا قولتهولى بحطه فى دماغى عشان ابقى عارف راسى من رجليا وان شاء الله الاقيه مع الراجل
ولو حصلتلى اى مشكلة هكلمك وندردش سوا ولعله خير ان شاء الله
وشكرا تانى مرة على مساعدتك ليا :)