مصيبة .... ارجو من خبراء كيا المساعدة

أنا اشتريت النهاردة عربية سيراتو ٢٠١١ وكيل . مستعملة المهم ذهبت للمرور لنقل الملكية و أفاجأ ان رقم الموتور مخلف عن البصمة المرفوعة .... طلبت ملف العربية و المفاجأة ان الإفراج الجمركي رقم الموتور فيه غير رقم الموتور الموجود في العربية ... العربية ،، طبعا الخطأ ان المرور مخدش باله اول مرة رخصت .. و الان تم اكتشاف المشكلة .... أنا خائف يكون تم تبديل الموتور .... روحت لواحد من المبيعات و قالي العربية كدة تخرج من الضمان !! العربية مشتراة من سمير ريان ...... من فضلكم ارجو النصيحة مش عارف أعمل ايه

أنا حطيت ال vin علي الموقع و طلعلي رقم الموتور الموجود في الإعفاء الجمركي ... !!!! المخالف للموجود في السيارة !!!!!

هو ده عادي ؟؟؟ ايه رأيكم ؟؟

من الاخر العربية دى مغيرة موتور وش ..
وغالبا اذا لم تكون مغيراه الى 1600 سى سى عشان تقلل جماركها عند دخول مصر
فمن المؤكد ان صاحبها غيره موتورها بعد الاستعمال قبل ما حضرتك تشتريها منه طالما طلعلك رقم الموتور الاصلى المثبوت بالافراج الجمركى لما كشفت بالvin !!!

ارجع بسرعه للي اشتريت منه العربيه وحاول تفهم منه وعرفه الوضع اللي انت فيه وحاول توصله ان الامر ممكن يوصل للشرطه بس انا عايز اعرف هو رقم الموتور الموجود في الرخصه مختلف عن البصمه ان كان كدا بلغ الشرطه اعتقد كدا

اللي أنا شاري منه ده واحد صاحبي و هو مالوش ذنب .... من اول يوم و العربية كانت كده

يبقي احسن رجع العربيه لو ملقتيش ليها حل

طيب حضرتك امشي قانوني ،، قول للظابط اللي في المرور انا اشتريتها كده و شوف ايه هي الاجراءات القانونيه

فيه سكه قانوني ان يتم مطالبة الجمارك بتعديل الإفراج و اعادة إرساله ... بس اولا أنا قلق من العربية !!!! ازاي الغلطة دي و في أية وراها ... و قلقان ان التوكيل كدة حيرفضها ..... حد ممكن يوصلني بالتوكيل ؟؟؟

انا متلخبط شوية انت اشتريت العربية مستعملة من سمير ريان ؟ ولا من صاحبك ؟
وصاحبك اصلا شاريها مستعملة
على حد فهمى اكيد حصل غلط من اول مرة وقت الترخيص فى المرور واكيد انت سالت
وانت بتنقل ملكية عن الخطأ ده كان ردهم ايه ؟

اعتقد الخطا من المرور في اول مره
انه اخد رقم سيريال الماتور اللي هو مثلا ZARxxxxx
وده كود او تعريف الماتور وبيبقي ثابت في كل الكيا السيراتو ال 1600 وبالتالي هو نقل الرقم غلط
كانت حتحصل معايا في عربيتي وانا بشتريها لولا الميكانيكي قالي خد بالك حينقلو الرقم اللي فوق وده غلط خد اللي تحت وفعلا ده اللي حصل معايا وانا بفحص

أنا شاري مستعمل من صديق .. و هو شاري من سمير ريان .

الخطا من اول ترخيص ... بس الأرقام صحيحة تم رفع البصمة في وجودي ... ورق العربية هو اللي غلط .....او تم تغير الموتور عند المعرض قبل الشراء الاول ...

طالما حضرتك شوفت الملف يبقي شوفت ورق أول فحص
لو الرقم في ورق أول فحص هو اللي في الإفراج (و ده الأكيد و إلا كانت رخصت المده الأولي أزاي ) يبقي الموتور متغير بعد الفحص و ده موضوع يخص صاحب العربيه اللي باع لحضرتك
أما لو كان الرقم في الفحص الأول غير مطابق للإفراج هايبقي كده فيه مشكله و لغبطة و أنا الصراحه معرفلهاش حل

ربنا يعينك و إن شاء الله تطلع حاجه بسيطه و لو حسيت إن الموضوع هايطول يبقي ترجع العربيه دي لغاية أما مشكلتها تتحل

الرقم في اول فحص غير مطابق للإفراج الجمركي ..... هو ينفع يكون المعرض ( سمير ريان ) غيير الموتور في فترة ما قبل البيع ؟؟؟؟ و ازاي العربية تدخل الضمان تاني ؟؟؟؟

سمير ريان بيقولوا الموضوع ده بيحصل كتير !!!...حد عنده فكرة الكلام ده صح ولا لأ ؟

اقتباس:

---

المشاركة الأصلية كتبت بواسطة wookiee

سمير ريان بيقولوا الموضوع ده بيحصل كتير !!!...حد عنده فكرة الكلام ده صح ولا لأ ؟

---

الكلام ده كلام فارغ
احنا شاريين كذا عربيه من عند سمير و منهم سيراتو 2010 و مفيش مشكله زى دى قبلتنا قبل كده انت لازم تعمله مشكله كبيره و حقوق المستهلك تجبلك حقك وش
دا كده لاعب و مغير فى رقم الموتور و مغير الموتور .
اه دا
اول مره اشوف كده
لا و اللى يفرس و يفيظ انه يقولك انها بتحصل كتييييييييير
انا لو مكانك كنت وريته شغله .
دا بيستعبط

شكرا ل اهتمامك ... فعلا الواضح إن في حاجة مش مظبوطة أنا مش فاهم الصراحة !

سؤال علشان موضوعك ده شغيلنى من امبارح
هو صديقك ده كان بيعمل صيانه فين مش فى التوكيل برضه !!!
وبالتالى لو فى شى غلط مكنش دخلها عنده
كمان التوكيل مش بيشوف رقم الموتور من العربية بيشوفها من الرخصة
وبعدين من خلالها بعرف انت وكيل ولا لا ( شاسيه + موتور ) برضه اللى متسجل فى الرخصة
وبالتالى لقى الارقام دى عنده علشان كده داخلها الصيانة !!!

+11111111111

ربنا معاك ...

عموما الحل الافضل ان العربية ترجع لصاحبها وجنب نفسك مشكلة كبيرة

ابو ليلى : الوكيل ما بيبصش على رقم الموتور الاهتمام بينصب على

رقم الشاسيه لانه مش بيعمل فحص هو يهمه يعرف انه ضمن العربيات المستوردة عن طريقه

اقتباس:

---

المشاركة الأصلية كتبت بواسطة ahmed_su

ربنا معاك ...

عموما الحل الافضل ان العربية ترجع لصاحبها وجنب نفسك مشكلة كبيرة

ابو ليلى : الوكيل ما بيبصش على رقم الموتور الاهتمام بينصب على

رقم الشاسيه لانه مش بيعمل فحص هو يهمه يعرف انه ضمن العربيات المستوردة عن طريقه

---

تمام يا كبيرنا ...وحشنى يا بشمهندس
طيب تحليلك ايه للموضوع ( غلطة مرور - صديقه - المعرض )

اقتباس:

---

المشاركة الأصلية كتبت بواسطة ابو ليلى

تمام يا كبيرنا ...وحشنى يا بشمهندس
طيب تحليلك ايه للموضوع ( غلطة مرور - صديقه - المعرض )

---

وانت كمان والله ... :inlove:

الموضوع غريب والسر فى اول مرة تترخص ... ازاى ما اكتشفوش ان البصمة مختلفة ؟؟؟!!!!

ترتيب الشك ... الصديق - المعرض - غلطة المرور بعيدة شويتين الا اذا كان المعرض هو اللى رخص

زى ما معارض كتير بتطلع مندوب يرخص معاك العربية كنوع من التسهيل ... ويكون رش رشة فى

المرور علشان يغطى لعبه فى تغير الموتور

النصيحة لصاحب الموضوع انفد بجلدك انت مش تعبان فى الفلوس ؟؟؟؟!!!!

أنا كلمت صديقي ... هو مصمم ان العربية ميهاش حاجة و ان أنا قلق و مزود الوضوع أوي ....و بناء عليه إتفقنا حروح بكره مركز صيانة معتمد ( وصاية ) يكشف علي العربية و يقولي الموتور تم تغييره ولا لا .... لو كانت فبريكة و المشكلة مشكلة ورق و تصحيح الرقم من الجمارك ... ماشي

أما أزا اكتشفت ان حصل حاجة في الموتور ...اي حاجة .. حرجعله العربية .....ايه رأيكم ؟؟

ياجماعه لازم تفهمو حاجه ان بتوع شمير ريان فى اول ترخيص ليك للعربيه بيطلعو معاك مندوب يرخصلك فمن الاخر كده المندوب بيرش فلوس على بتوع المرور فمحدش بيرفع حاجه والرخصه بتتطلع من غير محد يبص على حاجه فطبعا تانى مره اتعرفت لانهم رفعوها بجد هو ده كل الحوار

بلضبط هو ده اللي حصل

وانت تدخل نفسك فى الفيلم ده ليه ....

مش هتفرق كتير انك تروح مركز ولا التوكيل حتى وقلك الموتور فابريقة

المشكلة مشكلة ورق ..... قول لصاحبك ماشى زبط ورقك وعدل ورق الجمرك ولو انى اشك

ساعتها ابقى اشتريها .... اسمع الكلام وما تورطش نفسك فى حاجة انت فى غنى عنها

يا رب تطلع النتيجة خير .....يارب .....

صاحبي مش عاوز يرجع العربية من غير ما يكون فيه مشكلة ....و مصمم

اقتباس:

---

المشاركة الأصلية كتبت بواسطة wookiee

صاحبي مش عاوز يرجع العربية من غير ما يكون فيه مشكلة ....و مصمم

---

وهو فيه مشكلة اكبر من كده ؟ ده عايز يخلص منها شكله ومصدق انه خلص منها

هو فيه مشكلة اكبر من كده ....

ده صاحب ده ؟؟!!!... اعذرنى طالما لم يحافظ على الصداقة

حافظ انت على حقك هدده بابلغ الشرطة يمكن ...

اليوم رحت مركز صيانة تابع التوكيل و تم الكشف علي السيارة ..النتيجة العربية فبريكة و لم يتم تغيير الموتور ...و لكن علي سيرفر كيا ظاهر ان الشاسيه نازل بموتور تاني .....كله بيلف حولين نفسه ...... شيء غريب

الغلطة مش غلطة صاحب العربية الاولانى للاسف غلطة شركة
وورق

انتا هتتعب شوية بس الموضوع هيتحل ان شاء الله
كانت حصلت مع والدى
وهوا بيجدد اكتشفت ان الرخصة مكتوب فيه رقم الشاسيه غلط

نحن ف زمن المسخ

يا صاحب الموضوع رجع العربيه
طالب بفلوسك علشان دي عربيه غير اللي إنت أشتريتها في العقد (رقم الموتور مخالف للرقم المتعاقد عليه)
هدده

اقتباس:

---

المشاركة الأصلية كتبت بواسطة heshhesh

ياجماعه لازم تفهمو حاجه ان بتوع شمير ريان فى اول ترخيص ليك للعربيه بيطلعو معاك مندوب يرخصلك فمن الاخر كده المندوب بيرش فلوس على بتوع المرور فمحدش بيرفع حاجه والرخصه بتتطلع من غير محد يبص على حاجه فطبعا تانى مره اتعرفت لانهم رفعوها بجد هو ده كل الحوار

---

مستحيل مندوب يعرف يعمل كده هايجبلها أصلا بصمة منين ساعة الفحص لازم بصمة تطلع للموتور فالأولي تبقي بصمة الموتور اللي راكب

حتى لو افترضنا ان مندوب سمير ريان فى اول ترخيص رش فى المرور وماحدش رفع اى ارقام
الطبيعى ان ارقام الشاسيه والموتور فى ورق اى عربية زيرو وبطاقتها الجمركية يكون مطابق للحقيقى اللى راكب وده اللى بيتكتب فى الرخصة وكل تجديد
نصيحة ابعد عن وجع الدماغ .. وشكل صاحبك بيعزك اوى

اقتباس:

---

المشاركة الأصلية كتبت بواسطة wookiee

اليوم رحت مركز صيانة تابع التوكيل و تم الكشف علي السيارة ..النتيجة العربية فبريكة و لم يتم تغيير الموتور ...و لكن علي سيرفر كيا ظاهر ان الشاسيه نازل بموتور تاني .....كله بيلف حولين نفسه ...... شيء غريب

---

اقتباس:

---

المشاركة الأصلية كتبت بواسطة ahmed1718

الغلطة مش غلطة صاحب العربية الاولانى للاسف غلطة شركة
وورق

انتا هتتعب شوية بس الموضوع هيتحل ان شاء الله
كانت حصلت مع والدى
وهوا بيجدد اكتشفت ان الرخصة مكتوب فيه رقم الشاسيه غلط

نحن ف زمن المسخ

---

يا سيدي حتى لو كانت المشكلة مشكلة العربية والشركة ومش مشكلة صاحبها انا اشتريها ليه وهي فيها مشاكل هي ناقصة ؟

قول له عربيتك معاك لغاية ماتعدل الموضوع اخدها منك ولا انا غلطان يا جماعة ؟

ربنا يستر علينا ...

الكل بينصح انك ترجع العربية وانا شخصية حاسس ان فى حلقة مفقودة
مقلتش عليها لسه ياريت توضح الصورة كاملة علشان نعرف نفيدك
صاحبك اخد الفلوس كاملة ؟ والرخصة باقى فيها قد ايه

ربنا يريح بالك وحسبي الله ونعم الوكيل

مشكله كبيره وصاحبك دا يطلع تلاتين .. .مه علشان يلبسك فى بيعه زى دى

هوة ازاى تكشف على عربيه وتعرف ان الماتور اتغير ولا متغيرش دى قواعد تتفك ويركب مكانها واحد تانى ولا الماتور بيكون متشمع بشمع احمر مع العربيه