ساعدوني بالله عليكم بسرعه.. محتار اشتري نوع ايه فيات

**Egyp** · 26-11-2012 11:30 AM

انا معايا 132 موديل 74

نصيحة أخوية بلاش حاجتها مش موجودة خلاص انا بقالي سنة ونص مش لاقي موتور مساحات يركب في الشاسية بتاعها وماشي من غير مساحات
بلاعة بنزين مع انها 1600
مش لاقي العوامة بتاعة البنزين
حتة فرش الابواب مش لاقي منه استيراد
فال 132 نصيحة مني بلاااااش
هتجيبها وتصرف وتيجي تبيع مش هتجيب حاجة
ابعد عن الفيات لان مفيش غير 128 اللي حاجتها عند البقال
وطبعا ال 128 لاتقارن ب 132 اصلا
لو داخلة ال 132 دماغك هاتها بس تكون محترمة علشان لو فيها حاجة هتشحتك هتشحتك وانت داخل علي جواز
فلو كده شوف حاجة تانية احدث واريح
ممكن بتمن ال 128 تزود شوية وتجيب سويفت ودي قطع غيارها عند البقال وعربية محترمة ومكنة وعفشة وزي ما تقول قول
ولو غالية عليك ممكن تجيب ال 128 ومش هتقول لا بس اهم حاجة الحالة ثم الحالة ثم الحالة

**sehsbond** · 26-11-2012 05:18 PM

الف الف شكر ليك ربنا يكرمك انا قدامي 131 ب 22000 وحالتها كويسة وريجاتا ب 16000 انا دلوقتي بقيت بين الاتنين دول والاتنين ممكن ينزلوا الف تقريبا رأيك ايه ؟؟؟

**aw2100** · 26-11-2012 09:57 PM

بص مفيش وجة للمقارنة 131 طبعا حتى لو ثمنها اغلى شوية حاجتها متوفرة موتور طولى عفشة قوية حتى لو متبهدلة شوية حتعرف تضبطها تمام ومبروك مقدما على الفيات 131 !!

**mohamed_mesho3** · 27-11-2012 12:22 AM

طالما المبلغ وصل ل 20000 يبقى توكل على الله فى 323 نظيفة (( قطعة الغيار انسى انها تتغير و 1300 cc و بنزينها استهلاكه كويس جدا ))
تانى حاجة ال 31 طبعا
تالت حاجة ال 32
و شيل ال 28 و ال 27 عشان انت مشوايرك كتير و فيها سفر

**sehsbond** · 30-11-2012 12:52 AM

ياجماعه انا بشكركم اوي بجد ربنا يكرمكم فعلا والله تعبتكم معايا وربنا مايحطكم في مواقف حيرة زي اللي انا فيها دي جزاكم الله كل خير ولما ربنا يكرمني بأي عربية فيهم اكيد هابلغكم ان شاء الله ربنا يسعدكم

**مواطن مصرى** · 30-11-2012 01:43 AM

لو حضرتك بتمشى كثير بالعربيه و بتسافر .. انسى الـ 127 و الـ 128 ..

الفيات 132 - 2000 سى سى انساها تماما علشان موضوع دعم البنزين

الفيات 132 - 1600 سى سى استهلاكها عالى فى البنزين - قطع غيارها نادره شويتين - اعاده البيع لها صعبه

الفيات 131 - 1600 سى سى (موديل سوبر ميرافيورى فقط لا غير هو اللى تبصله فى الـ 131) لو لقيت واحده بحاله ممتازة من ناحيه الكورونا اولاً (كورونه الفيات 131 الاستيراد ثمنها يتعدى 3000) ثم الشاسيه و الموتور و العفشه توكل على الله و اشتريها

الريجاتا عربيه ممتازة جدا لو لقيت واحده بحاله جيده نوفا ريجاتا (موديل بعد 1987) من ناحيه الصاج اولاً (لانها صديقه البارومة) ثم العفشة و الموتور توكل على الله و اشتريها ..

ده بالنسبه للفيات القديم فى حدود اسعار العشرين الف ..