تانك البنزين للسيارة الجوليت

**amirock** · 24-11-2012 02:22 PM

يا جماعة حد يعرف تنك البنزين بتاع الجوليت كام لتر ؟
لانى لسة شارى العربية جديد و عندى مشكلة فى البنزين انى اكتر حاجة بفولها 40 جنية بنزين 90 و مبلحقش امشى بيهم حاجة و الاقى العلامة نزلت لقبل النص و ساعات تبقى العربية مركونة فى الجراج و الامبير على الاخر الاقيها تاانى يوم قلت الربع مع العلم ان مفيش اى تسريب فى البنزين و بس تقريبا عندى مشكلة فى طرمبة البنزين .
فهل اخلينى ماشى بيها كدة و لا اغير الطرمبة .
ول مغيرتش الطرمبة اعرف اظبط ازاى استهلاك البنزين

**Zika9909** · 24-11-2012 03:19 PM

أناشاكك في العوامة
و الله أعلم

**SYD** · 24-11-2012 03:38 PM

جرب الأول تحط منظف الدورة الكاملة
Complete fuel cleaner
جرب بتاع STP الفضي
كويس وهيظبط معاك الدنيا كلها

**Mahmoud.Fathy** · 24-11-2012 03:42 PM

العوامة يا باشا ..... احسن حاجة عشان تتأكد من الاستهلاك ملكش دعوة خالص بمؤشر البنزين دا خالص عشان بيهيس .... انت تروح اى بنزينة وتفول للزور ... وبعدين تصفر عداد الرحلات الصغير .... وتطلع على الدائري او المحور او التجميع .... اى طريق مفتوح .... وترزعلك 150 او 200 كيلو متر من غير قرص .... يعنى سرعة من 90 الى 100 على الغيار الخامس .... وانسى مؤشر البنزين دا خالص لانك ممكن تلاقيه نزل منك للاخر .... بعد كده وانت مروح روح تانى بنزينة وفول مرة تانية للزور .... واحسب كمية استهلاك الوقود لكل كيلو .... لو لقيت اللتر عامل معاك من 11 الى 12 كيلو يبقى انت فالسليم .... وعوامة البنزين بايظة .... غير كده لو لقيت استهلاك اقل من كده يعنى لقيت نفسك عملت باللتر 8 كيلو مثلا يبقي ندور بقي على المشكلة .... اصلا معظم العربيات موديل قبل 2005 هتلاقي المؤشر دا مهيس عندهم :)

**amirock** · 24-11-2012 06:23 PM

الاخ SYD شكرا على الرد بس لو ممكن تقوللى Complete fuel cleaner
بيتجاب منين و بكام و طريقة استعمالة

**Mahmoud.Fathy** · 25-11-2012 12:21 AM

المشاركة الأصلية كتبت بواسطة amirock

شكرا يا جماعة على الردود بس كنت عايز اعرف برضة التانك مفول يمشينى كام كيلو

مفيش حاجة اسمها التنك مفول يعمل كام كيلو .... لان اسلوب القيادة وطبيعة الطريق وعوامل كتير جدا بتاثر على الاستهلاك .... يعنى وانت ماشي وقارص وجايب ار بي ام 5 غير وانت هادى وماشي على ار بي ام 2.5 .... وانت ماشي في اتجاه الهواء .... غير وانت ماشي عكس اتجاه الهواء .... وانت فطريق كويس غير وانت فطريق مكسر .... وانت فالزحمة والاشارات ووسط البلد غير السفر والطرق المفتوحة .... وانا قلتلك افضل طريقة لقياس الاستهلاك انا ذكرتها في ردي السابق .... وتنك اللانوس 48 لتر .... ولمبة البنزين في التابلوه بتنور اما يكون باقي 5 لتر فقط .... وفي انتظار مزيد من الردود