كيفية اصلاح عصاية فتيس نوبيرا 2 بالصور ....Nubira shift lever
بعد بحث و تمحيص عن كيفية اصلاح عصاية الفتيس الاوتوماتيك لدايوا نوبيرا 2 و الاحباط من عدم تواجد اى نتيجة .... قررت انى انزل و افكها و اتفرج عليها يمكن افهم ايه الحكاية
-اولا : المشكلة كانت فى انى لما اجى اجيب ال D لازم اجيب 3 و بعدين ارجع الى Dتانى و كانت بتضايقنى جداااا خصوصا فى الزحام اللى غرقانين فيه .
-ثانيا : مفيش لوك (Lock) ما بين النقلات و بالتالى ممكن بالخطأ العصاية تتحرك الى R و انا ماشى على ال D .....كارثة
-ثالثا : العصاية ناعمة قوى و مش محكومة
نبتدى المحاولة:
1- محاولة فك الكونسولة الوسطى .. اخدت منى 15 دقيقة تقريبا على ما عرفت ان لازم افك الكونسولة بتاعت الهاند بريك (فرامل اليد ) الاول و بعدين فى مسمارين فى كلا الجنبين و هبا طلعت الكونسولة بتاعة يد العصاية
2- كان لازم افك شوية فيش بتوع اللمض
3-كان فيه جسم ابيض تحت الكونسولة و دى كان راكب فيها اللمبة بتاعت انارة رقم الجير تم فكها (4مسماير )
4-اخيراا وجدت الميكانيزم بتاع العصاية
قعدت اتفرج 10 دقايق عليها و احرك من P الى 1 رايح جاى علشان افهم طريقة العمل و الحمد لله انى فهمت اخيرا
حاولت افك الاربع مسامير و لكن وقفت عند الوير اللى جاى من الفتيس _ - مشــــــكلة
و اخيرا وجدتها - كان فيه مسمارين بيربطو ا المسطرة اللى راكب فيها الواير _ و انفصل الواير عن ميكانيزم العصايا
5- بعد ما فكيت الميكانيزم لقيت ان فيه مسمار هو اللى بيتحكم فى LOCK العصاية و ده بناءا على خريطة مشرشرة بيدخل فيها المسمار ده
و يوقف حركتها او يسمح بالحركة عند الضغط على الزر الجانبى لعصاية الفتيس
6- لقيت المسمار ده متنى و مش عدل فرحت فاكك المسمار (شحط) و طلع عينى علشان استعدله و معرفتش لانه قصير فرحت قالب الاتجاه و خليت الناحية السليمة هى اللى تمشى على الخريطة و بقت تمام
7- نيجى الى الجزء اللى بيخلى الحركة بتاعة العصاية تبقى تكات و ده عبارة عن نصف ترس مسنن راكب فى العصاية و و نايم عليه سوستة مثبتة فى الجسم بتاع الميكانيزم و بينهم بلحة .و دى اساسية علشان التكات بتاعة العصاية تبقى محكومة و ليها رجلاش ...المهم فكيت السوستةبالبلحة و نضفتهم و زييتهم و ركبتها تانى و رجلشتها .
8-العصاية لازم تاخد شحم او زيت موتور من الاكس بتاعها علشان ماتكلش الجلب الفيبر اللى بتحكمها .
9- ركبت الاجزاء تانى زى ما فكيتهم .و رجعت الميكانيزم مكانه و خلت التيش بتاع واير الفتيس فى الصامولة المخرومة و رجلشها (اخدت من كذا مرة فك و تركيب) لحد ما استقريت على الظبطة النهائية
10- بالمرة حملة غسيل للكونسولة و الفبر بتاع الابانوس علشان تبقى بتبرق و النضافة من الايمان
11-و غييرت اللمض اللى كانت جوة الكونسولة بلمض المانى علشان نورها يبقى زاهى و نظيفة
- و خلصت المهمة المستحيلة بعد شغل اخد حوالى ساعتين و النتيجة اكتر من هايلة
و اللى يحب اى خدمة انا تحت امركم
و اسيبكم مع الصور
http://imageshack.us/a/img341/6365/i...7131608arr.jpg
http://imageshack.us/a/img41/4531/im...7131445arr.jpg
http://imageshack.us/a/img248/1686/i...7131441arr.jpg
http://imageshack.us/a/img840/7325/i...0753numarr.jpg
http://imageshack.us/a/img819/9929/i...7130753num.jpg
http://imageshack.us/a/img194/7527/i...7130128arr.jpg
http://imageshack.us/a/img708/4508/i...7130118arr.jpg
http://imageshack.us/a/img29/3500/im...7130046arr.jpg
