الموضوع: تقرير عن بروتون واجا " مميزات / عيوب "

السلام عليكم ورحمه الله وبركاته

قبل ما اكتب الموضوع ده استنيت فتره كبيره بعد ما اشتريت العربيه علاشان اقدر احكم على مميزاتها وعيوبها


العربيه موديل 2005 واشتريتها مستعمله حاليا ماشيه 74 الف كيلو .

اول ماجبت العربيه كان فيها حدفه يمين جامده روحلت ل متخصص زوايا و للاسف بدل الحدفه ظهر عومان فى المطبات , واكتشفت فى الاخر فى العيب فى المساعد الاماميه انهم فاتحين لبره نتيجه مطب عنيف" من مالك السياره الاول " .

غيرت المساعدين فى التوكيل من 10 ايام ب 1450جنيه فى التوكيل = ظبط الزوايا الحدفه راحت الحمد لله والعربيه بقت اثبت من الاول بكتير + انها بتاخد المطبات احسن من الاول بمراحل .و حسيت بفرق كبير فى نعومه المساعدين

انا ححاول اكتب المميزات والعيوب " من وجهة نظرى الشخصيه " فى فى شكل نقط محدده .

وحبدأ بالعيوب :-

1- دواسه الفرامل فيها مسافه كبيره لحد مابدأ احس ان العربيه بتفرمل " تقريبا 3 سنتى " وبشك فى التيل انه استهلك لانى مغيرتوش بعد ماشتريت العربيه .

2- فى صوت تخبيط فى الدركسيون بيظهر فى المظبطات السريعه او لما اكون ماشى فى طريق فى زلط .

3- فى بوش بسيط فى الدركسيون وده بيخلى ظبط الطاره مع الزوايا شبه مستحيل " او مستحيل فعلا " + ان الدركسيون بيتحرك مع النقر والمطبات و بتحس بالمطبات فى الدركسيون .. ويمكن ديه اكتر مشكله مضايقانى فى العربيه .

4- فى الطرق المايله " زى طريق المحور من قدام هايبر " العربيه بتحدف شمال مع ميلان الطريق " , ولو الطريق مايل يمين تحدف يمين ...... لكن فى الطريق المستقيمه مش بتحدف .

5- صوت الموتور نوعا ما عالى " لكن مش مسببلى مشكله " + ان لو العربيه دايره و الموتور سخن الموتور بيبقى كأنه مش داير اساسا .... بس هو صوته بيظهر بعد ال 3000 RPM ..

6- السى دى بلاير بيشغل اسطوانات اوديو بس للاسف لكن صوته نقى جدا .

7- زراير المالتى فانكشن " الفوليوم / السيرش " سعات بيخرفو و بدل مايعلى يحول على ال الراديو او AUX .

8- الكلاكس لازم تدوس عليه بقوه علاشان يضرب و لاوم تدوس فى اماكن معينه .

9- الزجاج الكهرباء .... فى عيب ما فى تصميمه او فى المكنه بتاعت الازاز و العيب ده مشترك فى كل البروتون .... ولاحظته بنفسى فى الويرا ..... العيب ان الازاز تحس ان فيه خشونه وهو طالع وهو نازل + ان زراير التحكم فى الازاز ناشفه نوعا ما

10- خامات البلاستك الموجوده اسفل التابلوه و المصنع منها درج التابلوه سيئه الشكل و ضعيفه ,
و العكس صحيح فى خامات اعلى التابلوه " ممتازه الشكل و الملمس " .

11- الصالون البيج من السهل جدا اتساخه " غير مناسب نهائى للطبيعه المصريه :) " .

12- ساعات بحس ان الفتيس ناشف شويه فى النقلات .

13- مؤشر البنزين مش مظبوط .... لما بيوصل على النص بالظبط بيكون فاضل فيه حوالى 20 .. 25 لتر ..... و اساسا التنك 60 لتر يعنى المفروض 20 لتر ينزل على الشرطه القبل الاخيره

14 - فى صوت بسمعه من العربيه وانا ماشى ووووو ووووو وووو ووو ..... مش عارف اوصفه ازاى .. وقريت فى احد المواضيع هنا ان فى اخ بيلاحظ نفس الصوت .... بس هو عموما محدش من الى ركب معايا العربيه لاحظ الصوت ........ انا عموما ودى حساسه لاقل صوت فى العربيه .

-------------------------------------------

نيجى للمميزات :-

1 - ثبات العربيه رائع " مشاء الله " حتى فى الطرق الغير مستويه او فى الملفات تحس ان العربيه ماسكه فى الارض ...فى طريق زى المحور مش بحس ان العربيه ماشيه اساسا .

2- الموتور فى عزم اكثر من رائع عند عدد لفات قليله و مش محتاج تدوس بنزين او تنزل نقله علاشان تحصل على عزم دوران اكثر ................ نادر جدا جدا جاد لما انزل نقله علاشان العزم و لو حصل بيحصل لما بكون مشكل التكيف و فى مطلع كبير و معايا حموله . و بتحس بوجود العزم حتى عند 2000 RPM .

3 نظام التعليق او العفشه .... انا شايفه جيد جدا لانه متوازن مابين الثبات و الراحه فى نفس الوقت ....

4- الصالون فى مساحه ورحابه اكثر من ممتازه الكراسى مريحه جدا , و الكنبه مريحه جدا جدا جدا

5 تصميم التابلوه و الكونسول اكثر من ممتاز و عملى جدا لانه موجه ناحيه السائق ... وده بيسهل عليا جدا التحكم فى التكيف او فى السى دى بلاير + ان الفتيس مائل ناحيه السائق و ديه ميزه عجبتنى جدا .

6- النظام الصوتى اكثر من ممتاز ونقى جدا " بغض النظر عن عدم تشغيل ملفات ال ام بى ثرى " لكن الصوت نقى حتى مع تعليه الفوليوم + ان الراديو قوى جدا و بيلتقط محطات اذاعه من قبرص او اليونان تقريبا و اسرائيل !!!!!!!!!!!!!! و بيظهر اسمهم على شاشه الراديو علاشان فى خاصيه ال RDS .

7- وجود الباركنج سينسور ميزه رائع ..... لانه بيسهل عليا جدا الركن و بينبهنى للعوائق الى مش ظاهره زى الرصيف العالى عواميد النور الى فى زاويا الرفرف ............

8 - الجينوط ال16 بوصه شكله جميل ومميز و مدى للعربيه شكل جميل جدا و طبعا فارق فى ثبات العربيه لان عرض الكاوتش 205 .

9 - الصاج قوى مشاء الله و مش من السهل انه يطبق

10 الشنطه فيها مساحه كبيره جدا و عمليه + ان ممكن الكنبه تطبق بشكل كلى او جزئى و تزيد مساحه التخزين .

11 - التكيف انا شايف انه معقول جدا جدا فى الشمس بشغله على 2 او 3 اوى و بليل مش بقدر اعليه عن 1 .

12- فى حاجه لاحظتها فى الفرامل ... بالرغم من ان فى فراغ فى بدال الفرامل " وزى ماقولت احتمال يكون بسبب التيل " بس لما باجى افرمل العربيه مش بتترمى لقدام زى عربيات كتير العربيه بتفرمل بأتزان يمكن ده علاشان فى فرامل قرصيه فى الخلف ؟؟؟ الله اعلم .... بس ديه ميزه مهمه .

13 - عزل السياره .... اديله جيد جدا ... لانى ببتدى اسمه صوت هوا بسيط اوى
بعد سرعه 90... لكن غير جدا هو ممتاز .

14- تصميم الواجا حاد جدا و ده بيديها مظهر جميل ومميز ..... :) حتى انا وانا راكب العربيه لو لقيت واجا ماشيه جمبى بقعد اتفرج عليها !!!!!!!!!!!

15- استهلاك البنزين يعتبر ممتاز مقارنتاً مع حجم العربيه ووزنها ..... يعنى اخر مره مشيت 620 كيلو ب 49 لتر ... و 70 % من المسافه ديه كانت بالتكيف , و 50 % فى زحمه البلد و 50 %على المحور بليل .
يعنى تقريبا 12.5 كيلو لكل ليتر
وديه نسبه كويسه ..فى نسب استهلاك تانيه انا كاتبها لكن هى فى درج العربيه .... اول ما انزل حكتبها ان شاء الله .

------------------------------------

انا حاولت اكتب الى انا لحظته بكل امانه سواء فى المميزات او العيوب ... وطبعا الموضوع ده نسبى ويختلف من شخص لاخر ... بس انا كتبت الى انا لاحظته بكل حياديه .

المشاركة الأصلية كتبت بواسطة tutankhamoun

أيه الجمال ده يا أستاذ مهاب
تقييم موضوعي و حيادي و محترف جدا

ربنا يباركلك في العربية يارب و يديك خيرها و يكفيك شرها

آمين يا رب العالمين

اهلا بيك يا استاذ توت الف شكر على الدعوات الجميله ,ربنا يكرمك و يخليك .
ومستنى اشوف تقرير عن الجين 2 بتاعت حضرتك عند ال100,000 كيلو ........:) كمان كام سنه ان شاء الله .