السلام عليكم
طبعا زى منتو عارفين ان زجاج عربيتى اتدشدش و غرق الصالون زجاج مفتفت
http://www.nilemotors.net/Nile/320324-a.html
فأنا كنت ناوى اوديها لمحطة بمكنسة علشان ينظف الصالون بس بصراحة اخدتنى الحماسة امبارح و قولت و الله لأنا عامل الموضوع دا بنفسى و دا طبعا نظرا لأنى بصيت لقيت الزجاج واصل تحت الموكيت و غالبا محطة البنزين مش هتفك الموكيت علشان تعمل الكلام دا
توكلت على الله و عملت الاتى
1- خلعت الكونصول (6 مسامير: 2 تحت فرامل اليد - 2 فى جناب الكونصول يمين و شمال - 2 عند التابلوه) و خلعت وصلات الكاسيت علشان انا مركب الكاسيت فى الكونصول
2- خلعت الكرسيين الأمامين و دا نظرا لأنهم عندى راكبين فوق الموكيت و خلعهم كان بسيط كل كرسى متركب فى شاسيه العربيه عن طريق 4 مسامير بيتفكوا بمفتاح 12
عندك مسمارين قدام الكرسى و لازم علشان تفكهم ترجع الكرسى لورا على الاخر عن طريق ذراع تحريك الكرسى
و عندك مسمارين ورا الكرسى و لازم علشان تفكهم تطلع الكرسى لقدام على الاخر عن طريق ذراع تحريك الكرسى
و علشان الكرسى يطلع معاك بسهوله برا العربية بتخللى اول حاجة تخرج من الكرسى برا العربية هيا قاعدة الكرسى و بعد كدا الظهر و العكس لما تيجى تدخله تانى جوا العربية
و عملت نفس الخطوات دى مع الكرسى التانى بنفس الترتيب و بلا اختلاف
3- خلعت الموكيت عن طريق الشد و لاحظ ان الموكيت بيركب فى شاسيه العربية عن طريق كباسين بتخللى بالك علشان مفيش حاجة تتخلع من الكباسين او تتقطع من الموكيت فلقيت شاسيه العربية كله بان
4- مسكت المكنسة و كنت متخيل انى هنظف بالجاروف لكن لقيت ان شاسيه العربية متقسم اربع اركان فى كل ركن دائرة مفتوحة على الشارع فطبعا ساعدتنى جامد المهم ظبطت الدنيا و خرجت برا العربية نظفت الموكيت تمام و الدواسات و ركبت كل حاجة تانى بالترتيب العكسى و العربية بقت تمام
---- لما كشفت الشاسيه لقيت كام حاجة مكونتش عارفها
----------------------------------------------------------
1- دلوقتى علبة زيت الباكم البيضاء اللى فى الكبوت قدام خارج منها اربع خراطيم للأربعة عجلات لتوصيل زيت الباكم للبستم لأتمام عملية الفرملة
الخراطيم اللى واصله للعجلتين الامامين سهله انك تعرف مسارهم من الكبوت بالنظر
اما الخراطيم بتاعة العجلات الخلفية مكونتش عارف بتعدى منين و كنت فاكرها معديه من تحت العربية مع خراطيم البنزين (خراطيم البنزين عبارة عن 2 خرطوم واحد "داخل" و دا جاى من التانك ورا و داخل على طرمبة البنزين و التانى "مرتجع" و دا طالع من الكاربراتير لحد التانك ورا)
لما فكيت الموكيت لقيت خراطيم الفرامل معديه جوا الصالون
واحد على يمين الكونصول و واحد على شمال الكونصول بطول الصالون حتى الوصول للعجل الخلفى
2- ضفيرة الكهرباء الخاصة بالاشارات الخلفية معدية من عند التابلوه ما بين الكونصول و الكرسى اللى على يمين السواق و معديه من تحت دواسه الكرسى الخلفى يمين و داخله ناحية الشنطة
يعنى كل اللى يقعد ورا يمين بيدوس عليه برجله و دا عيب من عيوب الماروتى مع الاسف و معرفتش اعمله اى حل امبارح
3- فرامل اليد كنت فاكر انها بتشد سلك واحد الا انها بتشد 2 سلك واحد للعجلة اليمين و واحد للشمال و كمان بتشد سلك رفيع علشان ينور المؤشر فى التابلوه الخاص بفرامل اليد (P)
4- لقيت من عند فرامل اليد طالع سلكين كهربا واحد واصل لحد القايم اليمين و واحد للشمال بس بصراحة الوقت خلانى ملحقتش اعرف دول بتوع ايه علشان الدنيا كانت بدأت تظلم
طبعا انا بعتذر لأنى كان المفروض اصور صورة بعد ما خلعت الموكيت بس فعلا انا كنت متبهدل امبارح من التراب و معرفتش اصور حاجة بس وصفت اللى انا عملته بالظبط و الحمد لله
