الموضوع: انا محتار اجيب تيريوس بلاتينيوم هاي لاين ولا قشقاي؟

مشكلة ومعضلة بالنسبة لس علشان اشتري تيريوس بلاتينيوم هاي لاين 5 راكب ولا نيسان قشقاي

كل ما الاقي ميزة هنا الاقي ميزة قصادها هناك

يعن قلت التوكيل لو سيء يبقى بلاش لقيت الناس في المنتديات تقريبا ممكن تدي نفس الدرجة للتوكيلين سواء في خدمة العملاء او طريقة التعامل مع المشاكل اللي بتوصل لحماية المستهلك وإن كان واضح ان حسن الاستقبال والاهتمام في دايهاتسو - مدرسة عبداللطيف جميل - تهز الميزان هزة ناحية دايهاتسو

طيب الاتساع لقيت تقريبا الاتنين متقاربين في الشنطة و الكنبة الخلفية بس التيريوس اوسع سنة

التكنولوجي اكيد لصالح قشقاي بوجود ABS و EBD كاساسيات والفتيس ال CVT يعني كانك المحرك بيرمي على العجل على طوول من غير نقلات وتوزيع الفرامل والثبات اكيد مميزات مهمة في القشقاي. هو ال ABS موجود في التيريوس بس يعز عليا انه مش اساسي لان ده معناه ان مش standard ودي مش حلوة في حق المُصنع لان ال ABS مش محتاج يتسال هو موجود ولا لاء في العربيات الجديدة

لكن التيريوس اقتصادية وحنينة عن القاشقاي يعنى مش معقول في القاشقاي طقم بوجيهات ب 700 جنيه او فانوي ب 5500 جنيه وفي بلدنا الحبيب كسر الفانوس اصبح طلب جماهيري وفانوس غالي زي ده يمكن كسره هيطلع العقريت اللي جوه صاحب العربية.

الارتفاع عن الارض يمكن التيريوس اعلى بس مش فرق يذكر مع الاعتبار ان جنط القاشقاي 17 يعني لو وحدنا الجنوط التيريوس تبقى اعلى

السقف البانوراما طبعا ميزة للقاشقاي والناس بتقول ان فاضلك نضارة 3d :-) بس للي قاعد ورا مش السواق :-(

الدفع الرباعي ميزة للتيريوس مهمة للي بيافر مش جوه المدينة وانا في الاتنين تلاقيني

سعر الجديد التيريوس اكيد اقل ودي ميزة والاتنين ياباني

طارة الاتنين برضه زي بعض والاتنين مافيهمش بلوتوث ودي حاجة تخنق

اووف انا فعلا زهقت انا معايا اوكتافيا فانتازيا طبعا تحفة وعشان كده مش باصص على اي عربية سيدان تاني علشان كده ببص على ال 4X4 او SUV والميزانية من 150 ل 170

ماحدش عنده نصيحة ؟؟؟

المشاركة الأصلية كتبت بواسطة algazar2

لو الميزانيه ممكن تعلى شويه ممكن تشوف السوبارو الاكس فى الجديده دفع رباعى كامل و وسائل امان عاليه و عاليه عن الارض و ثابته بس مشكلتها صيانه لازم توكيل و لازم تامين و سعر اعاده بيع بيخسر كتير و تقريبا فيها بلوتوث كفئة اولى

السوبارو عربية جميلة بس يا منجي من المهالك في التوكيل واسعار قطع الغيار
انا اخويا معاه امبريزا و.... متظبط كويس
غير طبعا اعادة البيع درس انا اتعلمته لان كان معايا اوبل استرا ورغم عظمة العربية دي وليها زبونها لكن السوق موت سعرها برضه بسبب التوكيل