الموضوع: peugeot 504

معاك عربيه ايه؟؟
معايا بيجو
من الكلمه دي بس تقدر تعرف ان اللي بيتكلم معاه عربيه بيجو موديل من 71 لحد 83 و تكون 504!!!
انهارده حتكلم عن عربيه مفيش حد في مصر كلها ما يعرفهاش و اللي معاه واحده منها نضيفه بيعتز بيها اوي و ما بيبعهاش
حتكلم عن البيجو ال 504 العربيه الي ركبها الشعب المصري كله بلا استثناء بمختلف طبقاته مين فينا مكنش والده عنده 504 و مين فينا محدش من اصحابه كان معاه 504 و مين فينا ما ركبش تاكسي و مين فينا اتزنق في يوم و سافر مواصلات و ركب من موقف البيجو!!!!
نزل من العربيه دي شكل واحد بس.من 69 لحد 74 كان اكره الباب مختلفه (بيسموها اكره زرار) و من 75لحد 83 الاكره العاديه المعروفه غير ان التابلوه في الموديلات الاولي كان لونه فاتح اما بعد 75 كان لونه اسود و نور التابلوه كان لونه ابيض (GL) لحد سنه 77 اما سنه 78 كان لونه اخضر و سنه 79 كان لونه احمر و واستمر نور التابلوه الاحمر مع بيجو لحد انهارده
بالنسبه لدواخل العربيه كان لونها في الموديلات قبل 75 لونها بني غامق و الموديلات لحد 78 لونها رصاصي اما ال 79 كانت بنفس لون السياره.
نزل منها اربع موديلات(GL.GR.SR.L)كانت كلها موتور واحد تقريبا ما عدا ال L كانت بموتور اصغر و غالبا ما تكون تاكسي
في الاخر احب اقول ان العربيه دي لحد انهارده قفله بابها هيا واحده و مفيش منها عربيه بابها مش مظبوط و عربيه ناعمه جدا جدا جدا و كان ليها شنه و رنه في مصر لدرجه انها كانت بتتقارن بالمرسيدس رغم ان شكلها مش حلو اوي لكن عربيه يعتمد عليها و دي اقل حاجه اقدر اكتبها لعربيه بقت لفتره طويله حلم لمصريين كتيييير .
علي فكره اتوقف انتاجها في فرنسا سنه 83 و بتنتج في الارجنتين لحد انهارده علي ما اعتقد بس بشويه تعديلات طفيفه بس في الاخر تبقي 504!!
ازاي بنعرف الفرق بين الموديلات
ال (GL) كان التابلون بتاعها اكثر اناقه في رايي و كانت العدادات علي شكل دواير منفصله و الكراسي الاماميه كان مدمج فيها مسند الراس و كان الشبكه الاماميه فيها خطين نيكل و الابواب عليها فروع نيكل علي القوايم و المقبض الداخلي دان نيكل برضه و فرش الابواب كان خلد لحد موديل 79 كان جلد و صوف مع بعض علي حسب لون الكراسي.
اما ال(L) فكانت افقر موديل فيهم من حيث التابلوه و من غير جرايد علي الجوانب ولا نواكل علي الابواب و اكر الداخليه بلاستيك ردئ.
اما ال(GR) فكانت اعلي شويه من ال L لكن كانت ال GL احلي طبعا من اي حاجه فيهم
بالنسبه للفروقات الميكانيكيه كان مواتير (GL.GR.SR)نفس الموتور ال 2000 سي سي بكامه واحده انما ال(L)كانت 1800 علشان كده تلاقي معظمها تاكسيات و اللي بيفرق بقي ان الاتنين جر خلفي لكن (GL.SR) علي كبالن خلفي انما(GR.L)علي ديفرانس زي بتاع ال 131 و ال132 كده بس طبعا علي كبالن احسن علشان ما بتحسش بهزه المطبات بعكس الديفرانس اللي بيخلي العربيه كله تطلع و تنزل علي المطبات مثلا.

عندى سياره بيجو 504 موديل 78
واريد تركيب تكييف
اريد مركز صيانه معتمد
او ماذا تنصحون

ولكم جزيل الشكر