الموضوع: حوار مرعب حول الخيانه الزوجيه

منذ فتره قصيره قد فتحت موضوعا حول صديق لي يخون زوجته في حين ان زوجته لا تعلم و كنت متردد حول ما يجب فعله حيال هذا الامر و الحمد لله الحل قد جاء بمفرده و لكنه حل مرعب بعض الشئ.

الزمان : الساعه ال 9 مساءا

المكان : غرفه معيشه منزلي العزيز

الوصف : العبد لله و زوجته جالسان امام التلفاز لمشاهده فيلم ما بينما "الولاد الحلوين" يلعبون في هواتفنا الجواله بكل جشع

وجه الزوجه ممتقع لسبب ما لا يدريه العبد لله فلذلك كان يبدو علي وجهه امارات الرعب و الفزع.

الزوجه تغلق التلفاز وسط تذمر من "الولاد الحلوين"

ملحوظه : لم يكن الحوار بهذا الشكل بالضبط.

الزوجه : (خبط لزق) "س" بيخون مراته.

العبد لله : (مرعوبا ) انت عرفتي امتي ؟

الزوجه : (متشككه) يعني انت كنت عارف.

العبد لله : و تربه امي ما اعرف حاجه.

الزوجه : اصل النهارده كنت معديه تحت المكتب و شوفته مع بنت صغيره كده.

العبد لله : (بغضب مصطنع محاولا تغيير الموضوع) انا زعلان منك علي فكره.

الزوجه : (بابتسامه صفراء) ليه يا حبيبي ؟

العبد لله : يعني تعدي تحت المكتب و متطلعيش تسلمي عليا.

الزوجه : لا اصلي كنت مع "ن" و رايحين نتغدي.

العبد لله : ااااااااااااااااااااااااه .

الزوجه : اتلاقيت البيه قاعد قاعده رومانسيه مع البنت الصغيره فقلت اكيد هو ده سبب المشاكل بينه و بين "ص". انت متعرفش حاجه عن الموضوع ده طبعا.

العبد لله : و انا هعرف منين يعني ؟ كنت شوفتيني معاهم.

الزوجه : (متهكمه) ما انت قاعدين في وش بعض طول النهار , و بعد الشغل بتزوغ عشان تروح تلعب بلياردو معاه فأكيد حكي ليك حاجه كده و لا كده.

العبد لله : بلياردو ايه بس ؟ و الله ما حكالي حاجه. انا كل اللي اعرفه ان في شويه مشاكل كده بينه و بين "ص".

الزوجه : (كمن تمارس العابا ذهنيه) تفتكر هو عمل كده ليه ؟

العبد لله : (مترددا) مش عارف. يمكن مفيش انسجام any more بينهم. انتي عارفاني اني لا اتدخل في الحياه الشخصيه بتاعت صحابي.

الزوجه: (تضيق عينيها كالمحققين الفيدراليين) تفتكر اقول ل"ص" و لا لأ ؟

العبد لله : و الله براحتك. انا مليش دعوه.

الزوجه : ازاي ملكش دعوه ؟ ده صاحبك.

العبد لله : (بغضب مصطنع محاولا تغيير الموضوع مره اخري) هقطع علاقتي بيه, استريحتي ؟

الزوجه : اصل انا مش عارفه اعمل ايه بالظبط, و مش عايزه اخسر اي طرف.

العبد لله : يبقي اعملي فيها من كوكب زحل و لا كأنك عرفتي حاجه.

الزوجه : (باستنكار شديد) ازاي ؟ دي صاحبتي, و المفروض صاحبك كان يفكر في العواقب قبل ما يخون مراته.

العبد لله : (بغضب مصطنع محاولا تغيير الموضوع مره ثالثه) طب هو مفكرش في العواقب. انا ذنب امي ايه دلوقتي ؟

الزوجه : (مزمجره) ذنبك انه صاحبك , و انا عارفه ان تأثيره كبير عليك.

العبد لله : (في سري بعد ما عرفت الجمله هتودينا علي فين) نهااااااااااااااار اسود.

العبد لله يسرح في خواطره السوداء لمده ثواني معدوده.

الزوجه : (متشككه) انت سرحان في ايه ؟

العبد لله : مفيش. هي البنت دي شكلها ايه ؟

الزوجه : (بابتسامه صفراء) ليه ؟ عايز تخرج معاها انت كمان

العبد لله : استغفر الله العظيم. اخرج معاها ايه بس ؟ يا ستي عشان لو كنت اعرفها و لا حاجه.

الزوجه : تقريبا اوكرانيه شبه البنت المربيه.

العبد لله : (علمت تماما ان كلامها صحيح) ااااااااااااااه. اوكي.

الزوجه : انا مركزه معاك, ماشي ؟

العبد لله : (متهكما) حاضر يا ماما. هغسل رجلي قبل ما انام.

السؤال الذي يطرح نفسه :

هل تم اخبار "ص" بما حدث و هذا مجرد اختبار لي ؟ ام انها تستشيرني فعلا , و في نفس الوقت بتعطيني كارت ارهاب ؟