الموضوع: بسأل على شويه حاجات لسيفيك 2008

السلام عليكم و رحمه الله وبركاته

دلوقتى يا رجاله ليا واحد صاحبى اشترى سيفيك 2008 و الحمدالله العربيه فابريقه بالكامل بدون خربوش و ماشيه 60,000 كم، المهم هى بس فيها 3 حاجات عرفنها لما كشفنا عليها و عايزين بقى نظبطها

- طبعا العيب المشهور إلى هو علبه الدريكسيون عايزين نعرف نجيبها منين تكون نضيفه

- العربيه لما تيجى تدور تحس كده ان كهربتها ضعيفه شويه يعنى لما مثلا تدى انتظار مثلا تحس ان النور ضعف ثانيه كده و رجع و ان ال rpm فيه تهنيجه خفيفه اوى كده هتلاحظها لو ركزت معاها (العربيه كانت شبه مرفوعه لانها مشيت 2000 كم فى سنه ده على كلام الراجل فممكن يكون ده سبب ولا حاجه تانيه)

- المسند إلى فى النص بين الكرسيين القفل بتاعه مبيثبتش فى مكانه فى دى بقى تمنها كام استيراد و نجيبها منين و ان الطاره معمولها كسوه جلد بس لو مشيت فى حتت مكسره بتحسس ان فيه حاجه مفكوكه جوه الطاره ده ممكن يكون مش قفلها كويس و لا ايه ؟؟

و شكرا مقدما

المشاركة الأصلية كتبت بواسطة ahmedeihab

علبه الدركسيون فى الحرفيين بس من عند مين انتظر أراء المنسق او أ/ هيثم كمال

ده كده يا باشا بطاريه وحشه

3 حاجه المسند ممكن تجيبه مع العلبه

حاجه مفكوكه جوه الطاره و ده بسبب علبه الدركسيون

^_^

ألف شكرا ليك يا باشا :)

المشاركة الأصلية كتبت بواسطة haythamkmal

- بالنسبة للعلبة ببتعمل فى الحرفيين وبتتكلف حوالى 500-600 جنيه وبترجع جديده ، واوعى تجيب استيراد .

- بالنسبة للكهرباء ، فى الغالب بطارية بس اتأكد الاول من اواشيط البطارية وكبلات الارضى .

- بالنسبة للكونسول قفل الكونسول بيتغير جديد ، موجود عن مجدى الدسوقة وعند توشكى تقريبا كان بـ 40 جنيه ، بس تركيبة رخم شوية .

شكرا ليك يا باشا انا سمعت برضو موضوع تصليح العلبه ده بس معرفش ايه الاحسن إنى اغيرها و لا اصلحها

المشاركة الأصلية كتبت بواسطة sanhory

الف مبروك يا باشا

بس انت متاكد ان العربية 60 الف كيلو فعلا ؟ اصل الحاجات اللي بتقول عليها دي مشفتهاش في عربيات ماشية 200 الف

عامتا تهنيجت الار بي ام دي و هي لسه باردة و بتسخن عشان بيكون في هوا مفتوح زيادة عن طريق الايدل عشان العربية تسخن و المفروض متدوس عليها و هي لسه دايرة سيبها عالايدل بتاعها . مجرد ما تسخن جرب مش حتلاقي الار بي ام بيبرجل ولا حاجة

لو تقدر تقولي اخدتوها بى كام اكون شاكر ليك

تسلم ايديك يا باشا و والله شفت عربيات بتبقى ماشيه 20 ألف كيلو و فيها بلاوى و ده طبعا بيفرق من الاستعمال و بالنسبه للسعر اخدنها ب 106 بس عايز أقول لحضرتك الراجل صاحب العربيه كان فى قمه قمه قمه الاحترام و اول ما رحناله ادانا مفتاح العربيه و قال اتفرجوا براحتكم خالص و قالنا العربيه فيها علبه دريكيسون زى اى عربيه سيفيك و انه اشتراها من زميله فى الشغل ماشيه 59 ألف كيلو من سنه و جابها عملها صيانه ال 60 و غيرلها كاوتش جديد Continental و مشى بيها فى السنه دى كلها 2000 كيلو بس و موضوع التفاوض على السعر و الله ما شفت احترام و سهوله فى الكلام أكتر من كده و عايز اقولك اننا خلصنا كلام فى السعر و الاتفاق و احنا و قفين مكملناش نص ساعه و لما جينا ندفع و نعمل العقد طلع لنا كل ورقها حتى الوصل الاحمر بتاع الدفع فى الشهر العقارى لما جه يشترى العربيه ورهولنا و براءه الذمه القديمه و توكيل البيع إلى كان صاحبه عاملهولو و الحمد الله اخدنا العربيه و ربنا يبارك لصاحبها ان شاء الله

المشاركة الأصلية كتبت بواسطة haythamkmal

محمد باشا اخبارك ايه

ياباشا الحجات دى كلها بسيطة وملهاش علاقة بالكيلو ، متقلقش الراجل
العلبة ده عيب صناعة فى العربية ووارد تبوظ بعد 20 الف مش 60
والبطارية برده ملهاش علاقة بالكيلومتر ممكن توكون بقلها كتير فى العربية
وقفل المخدع ده برده سؤء استخدام مش اكتر

بالنسبه للبطاريه هى بطاريه العربيه إلى جايه معاها و هى قعدت فتره طويله اوى مركونه

المشاركة الأصلية كتبت بواسطة sanhory

هيثم باشا واحشني والله

طب كويس انا خفت بس الراجل يكون لاعب في العداد

المشاركة الأصلية كتبت بواسطة hany63

الف مبروك على العربيه و عداد 60 الف ولا حاجه
بالفعل نقدر نقول معظم السيفيك ما قبل ٢٠٠٩ غير علبة الدركسيون في الضمان او ظبطها في الحرفيين زي ما استاذ هيثم ما اشار على حضرتك في حالة الخروج من الضمان و مفيش مشكله و بترجع جديده
مشكلة البطاريه نقدر نقول ان ده عادي و غالبا تقديري ان ده حاجه في ظبطه الايدل و عربيتي ٢٠١٠ بتعمل نفس اللي قلته لو ولعت النور او بداية تشغيل التكييف و ساعات كمان لما اجي ادور احسها زي ما تكون بتعتل و مفيش عندي مشكله و لو عايز تتطمن اكتر اكشف على البطاريه لو طلعت سليمه يبقى ده الطبيعي اللي قلت لك عليه
يمكن حضرتك لو قريت تقرير سيفيك الجيل التامن اللي متثبت هتعرف اني ذكرت ان اكتر ملحوظتين في العربيه رغم هيافتهم ان المسند و اطي و مش هتطوله ايدك اصلا لو معلي الكرسي و دي اتغلبت عليها و حطيت مسند تاني فوقيه و ربطته بكابل ربط شفاف عشان اريح ايدي في الزحمه
و تاني ملحوظه الدركسيون صغير عشان يديك احساس القياده الرياضيه و الموضوع بعد قتله بحث و تركيب كسوه جاهزه غاليه من اللي بتتخيط عند سروجي احسن حاجه مريحاني للاسف الكسوه اللي بتتباع عند محلات الاكسسوار عشان بتخلي التحكم احسن و الدركسيون سهل رغم تحفظي على الشكل انما ماشي الحال

الله يبارك فى حضرتك و المسند إحنا مش شايفنه مشكله لان صاحبى اصلا بيوطى الكرسى على الاخر خالص لانه كان معاه BMW كوبيه 97 قابلها و كانت واطيه على الارض فهو اتعود خلاص على الكراسى الواطيه هى بس المشكله ان مع كل مطب المسند يروح مفتوح و طالع لفوق و إن شاء الله تتعمل
وبالنسبه للكسوه بتاعه الدريكسيون هو صاحبها عاملها كسوه جلد عن حربى ماشاء الله تحفه و نضيفه جدا


و أنا احب اوجه الشكر للقسم ده على سرعه الرد على الاستفسار و جزاكم الله خيراااا