الموضوع: تجربة قيادة infiniti fx50s

السلام عليكم ورحمه الله وبركاته
ديه اول مره من سنين طويله اكتب في العربيات ويشرفني انه يكون هنا في المنتدى
طبعا هاكتب باللغه العاميه وبلاش الفصحى (خلي البساط احمدى)
وقررت احكيلكم عن تجربه قياده كذا عربية لكن التركيز كان علي INFINITI FX50S
الاسبوع اللي فات كنت في رحلة عمل من الرياض الى الإحساء المسافه حوالي ٣٥٠ او ٤٠٠ كيلو تقريبا
سافرنا من الرياض الاول بعربيه Land Crouser V6 ٢٠١٢ ماشاء الله عزمها قوي لكن مش مريحة في الركوب خصوصا الكنبه الخلفية، انما طبعا وضعية قياده ممتازة واستجابه وتسارع جيدين جدا بالنسبه لوزنها، من جوا فقيره وخامتها عاديه ومافيهاش اي نوع من الفخامه يمكن عشان استاندرد اقل فئة، السرعه على الطريق كانت في المتوسط ١٩٠ احيانا تزيد واحيانا تقل، والعزل كويس مش بطال

نيجي بقا للوصول والاقي قدامي INFINITI FX50S لون ابيض لؤلؤي فل اوبشن بالكامل
هاحكيلكو عنها من جوا الاول،
الصالون جلد ومريح جدا سواء ورا او قدام، انما ورا مساحات الرجلين ضيقه شويه (يمكن عشان انا طويل)
الكراسي جلد مطرز كلها تحكم كهربائي مع دفايات ومساج للكراسي ومنافيخ هو لتعديل شكل المقعد، التابلوه فخم جدا والأضائة ممتازه، الشاشه واضحة وفي ٤ كاميرات بتعمل 3D للعربيه علي الشاشه تشوف بيها كل حاجة حواليك حتى بالليل، الرؤيه مش وحشه، العربيه فيها فتحة سقف وشاشه دي في دي خلفيه، واضائه مخفيه لكل اجزاء الصالون
الشاشه فيها تحكم في كل حاجة وممكن كمان تعرف منها ضغط الهواء في الاطارات وتزوده او تقلله اليكترونياً، كمان ممكن تشغلها تلفزيون عادي وفي في مسند اليد جهاز السديهات وفتحات التوصيل الAUX وفي ١١ سماعه Bose ومكيف مزدوج وطبعا في حاجات تانيه زي مثبت السرعه وحساسات المطر وحاجات تانيه تعتبر اساسيه في اي سياره فخمه
من برا العربيه شيك جدا وتصميمها رائع، العجلات مقاس ٢١ ، طبعا بتحس بالمطبات معاهم، انما ثبات رهيييييييييب، خصوصا لما تشوف عداد السرعه واقف عند الرقم 260 km وانت ولا حاسس بأي حاجة، العربيه فيها امكانيه تغيير استجابه المساعدين وتحويلهم للأداء الرياضى عن طريق زرار في النص عند الفتيس، الفتيس نفسه في وضعيه التعشيق الرياضي، وده بيقصر مسافات التعشيق وبيوصل العربيه للسرعه القصى لكل نقله اسرع من الاداء العادي، جربنا ناخد عرز بيها على سرعات عاليه وصلت ل٢٠٠ ومافيش اي مشاكل اطلاقا، مع ان تيل الفرامل كان محتاج يتغير انما ماحصلش حاجة الحمد لله
الموتور v8 5000cc قوته ٣٩٠ حصان، عزم جبار وتسارع لغايه ١٠٠ في ٥ ثوان تقريبا وعن تجربه، خصوصا ان العربيه وزنها خفيف وواطيه شويه على الارض
طبعا كان صعب اصور عشان كنا طالعين شغل وصعب الواحد يطلع كاميرا كل شويه ويصور هههههه شكلها محرج شويه

اي استفسار يا شباب انا جاهز وديه شويه صور تعبيريه ، مش نفس العربيه انما زيها لتوضيح الصوره اكتر

السعر هنا ٢٣٨ الف ريال ده من باب العلم بالشئ