مساعدة فى الاختيار بين اسكورت و فيستا
السلام عليكم : انا محمد من القاهرة :) انا اثق فى المنتدى ده ثقة عمياء و الّى هتقولولى عليه انا هعمله ::: انا بقالى بتاع سنتين كدة بدور على عربية مستعملة تكون اول عربية ليا و مش عايز ادّبس فى حاجة فاتحة بقها عشان مندمش بعد كدة , دورت فى كل الانواع و كل الموديلات و نزلت شوفت بتاع عشرين عربية و كلهم حالتهم ضايعة و سعرهم مبالغ فيه مع العلم ان اخرى 35 الف :: لحد مواحد صاحبى قالّى الفورد حلوة و سعرها فى الحدود بتاعتك و جرّاية و اسمك راكب فورد :: دخلت دورت فى المستعمل عجبنى الكلام الصراحة بس لما تعمقت فى الموضوع الحيرة زادت بين الفيستا و الاسكورت و بقى عندى اسئلة كتير مش عارف اجابة ولا واحد منها :] ياريت لو حد يتكرم و يجاوبنى و ربنا يكرمه و يجازيه خير ان شاء الله :
1-قريت ان فى نوعين متورات واحد زى تيك و التانى اندورا و فى انواع تانية 1300 و 1600 انهى احسن واحد من حيث قطع الغيار و الصيانة و الجرى
2-ناس كتير بتقعد تقول ابعد عن الفورد دى ملهاش سوق و قطع غيارها نار و صيانتها صعبة و مش عارف ايه بس مبقتش اصدق حد لأن معظمهم و لا عمره ركب فورد و بينقل كلام و خلاص : فأيه رأيكم
3-يقال برضه انها واطية على الارض و بتتدلع من اقل مطب و احنا بلدنا مش بتتفاهم فالمطبات
4-و يقال برضه فى مشاكل فى دورة التبريد و ان الفورد بتسخن
5-السحب و الشد و الجرى و استهلاك البنزين احسن فى انهى الفيستا و لا الاسكورت
6-من الآخر اتوكل على الله و اجيب انهى فيهم :d
7-بأذن الله لو حصل نصيب و جبت واحدة اكشف عليها فين قبل الشراء واحد كدة يفليها حتة حتة و يدينى تقرير كامل عن كل مشاكلها و واحد تانى اروحلة بالعربية يرجعهالى جديدة
8-اسف على الاطالة و ياريت متطنشونيش :d
