الموضوع: صاعقة على راس الاستغلال:اصلاح شاشة السينيك2 ب20 جنيه بلا من 1000جنيه

احبائي اعضاء المنتى الاعزاء:
السلام عليكم ورحمة الله وبركاته:
بشرى سارة لكل ملاك السينيك2
تصليح شاشة العربية ب20 جنيه بسهولة وبساطة بدل 1000جنيه عند المستغلين.
ازاي ادي الحكاية من اولها:
مرة واحدة لقيت شاشة العربية انطفت وبتقطع وتكتك ومش شايف السرعة ولا البنزين ولا الحرارة
خصوصا ان كل المعلومات عن حالة العربية بتظهر في الشاشة الديجيتال دي.
رحت التوكيل قالولي باظت ومحتاج واحدة جديدة بحوالي 7000 جنيه.وراجل طيب هناك قاللي بتتصلح عند واحد اسمه حسام في الدقي بعد الكوبري جنب بنزينة مصر ب1000 جنيه وضمان 6 شهور ,والعيب ده مشهور في السينيك 2 واللي يشتري العربية دي لازم يعمل حسابه على شاشة ليها.
رحت اسال في صقر قريش عند ورش الرينو قالولي الشاشة الاستيراد ب3000 جنيه. ونفس الكلام عن حسام ده,وانو الوحيد اللي بيصلحها.ب 1000جنيه برضو.
طبعا انا معاييش غير 750 جنيه اصرفهم غلى الموضوع ده بعد ما العربية دي خلصت فلوسي.
رحت لحسام ده .
قاللي:حتتكلف من 1000 ل 1500 جنيه.
اتصدمت وقلت ياباشا ماينفعش ب750 جنيه ارجوك لاني معييش فلوس اكتر من كده.
وبدأ قصيدة الذل اياها.
قال:لا يا بيه زي ما بقولك هو كده ومحدش بيصلح الشاشة دي الا انا .ومعاك ضمان 6 شهور.
ودخلني جوة ووراني 3 شاشات عنده من نفس النوع وشغل واحدة منهم شغالة زي الفل.
اتحايلت عليه تاني .
قالي :تجيب العربية وتسيبها عندنا من الصبح وتيجي تاخدها علي المغرب عشان لسه حنفك التابلوه
وشغل كتيير وحنشوف ممكن نخلصهالك على 1000جنيه(ده بعد طبعا ما انا صعبت عليه ورأف بحالي).
انا الصراحة قولت استنى المرتب الجاي واخلص الموضوع ده. وبقيت امشي بالعربيه مش عارف فيه بنزين ولا لا ولا عارف سرعتي كام ولا الحرارة ولا اي حاجة.
رحت عند مركز اسمه رالي في المنطقة الصناعية في 6 اكتوبر جنب الشغل خد مني 450 جنيه وصلحها
وباظت بعد ماوصلت لاخر الشارع ورجعتله وصلحها وباظت ورجعتله وصلحها وباظت ..ثلاث مرات في ثلاث ايام,وفي الاخر قالي العيب في الشاشة مش في الضفيرة واكل عليه فلوسي.
طبعا يأست زيادة وقرفت من العربية واللي صنعها.
دخلت على النت ابحث لمدة اربع ايام متواصلة.اكتشفت من على منتديات رينو في UK
ان المشكلة دي مشهورة ورينو معترفة بيها في اوروبا و انها بتدي تخفيض 50% على الاستبدال بس بعد معاناة شوية.قولت طبعا مش حاخد حاجة من التوكيل المعفن اللي في مصر ولو قتلت واحد هناك.
كملت بحث لقيت فيلم على اليوتيوب بيشرح تصليح العربية من الفك للتركيب بالتفصيل عامله واحد اسباني ,ومع ترجمة الكلام عرفت ان فيه بعض المقاومات من كتر سخونة الترانس بتحتاج اعادة لحام او حتى بالهوت اير تتسخن وهوة ده التصليح ,نزلت الفيلم ورحت لواحد صاحبي بيصلح لاب توب وريته الفيلم
وفكيت انا الشاشة بكل سهولة .
خلى الشاب الي شغال عنده عملها في نص ساعة عشان الموضوع مش مستاهل .
جربتها اشتغلت زي الفل زي الاول.
كام ياعم ,
اتكل على الله ياباشمهندس ولا حاجة .
لا ارجوك تقولي كام
خلاص من غير ولا حاجة والله الموضوع مش مستاهل فلوس.
لا لازم تقولي كام.
خلاص لو مصمم 20 جنيه بسسس.
20 بسسسسس كااااااااااااااام ايييييييييه.
دفعت وروحت وانا فرحان .والشاشة زي الفل,لكن انا زعلان على الاستغلال ممكن يوصل لحد كدة.....؟؟؟؟
فقلت لازم افيد كل اللي حصله العطل ده عشان محدش يشتغله ويعيش عليه ,تصليح ياخد نص ساعة
يقلك من الصبح للمغرب ,ويكلف 20 جنيه يقلك من 1000 ل 1500جنيه.

نيجي للجد للصور ورابط الفيلم.
Reparación del cuadro de instrumentación del Renault Scenic II

http://www.youtube.com/watch?v=MXksl...eature=related












ارجو اني اكون وفرت على كل اللي زيي من ملاك السينيك 2 التعب اللي انا شوفته والفلوس اللي انا صرفتها.
وشكرا لكم جميعا.

المشاركة الأصلية كتبت بواسطة samyyousef

برافو
و هل نفس العيب ده موجود في شاشات ستروين؟؟؟
و ياريت اعرف تقييمك للعربية بصفة عامة
تحياتي

بالنسبة للسؤال الاول بصراحة مش عارف الموضوع عايز بحث .بس ممكن تكون حاجة قريبة من كده برضة.
وتقييمي للعربية
-واسعة وعائلية جدا .
-ثابتة جدا جداو الabs بتاعها بيتلكك عشان يشتغل يعني فراملها على الشعرةوفعاله جدا .
-فرش مريح جدا والكراسي الخلفية ثلاثة كل واحد لوحدة ممكن ينثني ويتقدم ويرجع على حده.
-اوبشن كتيرة وتابلوه كمبيوتر ديجيتال تحس انك قاعد في طيارة.
-الباور ستيرنج زي الملبن بتسوق بصباعك.
-امان واير باج وورفع ازاز مع السنتر لوك ورف في ضهر الكرسي عشان الاكل والشرب وكله.
-مساحة خلفيه ممتازة للتحميل والشنط لان العربية mpv وبتزيد مع طي الكراسي.
عيوب:
-اعطال كتير خصوصا حكايةالحساسات والمية(ممكن تراجع مواضيعي السابقة).
-بتاكل عفشة بسرعة خصوصا في الطرق المصرية المكسرة والحفر والبلاعات المعفنة واللعنة على وزير الطرق والمواصلات.لان عفشتها ناعمة جدا كانك على بساط الريح يعني عفشة حريمي خالص متستحملش
الطرق المنيلة دي.
-عزمها في الطلعة بطيء تحس انها عربية عواجيزي شوية ,لكن في السفر مالهاش حل بتسحب كويس ومتحسش بالمسافة كانك قاعد في الصالون في البيت,خصوصا ان عزل الصوت فوق الممتاز.
-طبعا قطع الغيار الغالية والمصنعية الغالية ومش اي حد يشتغل فيها لازم يكون شغال في الرينو
وعشان كده الاشتغالات فيها كتير حتى في توكيل المقطم الحرامي لانها بتصنف من العربيات الفاخرة
(جديدة 169000جنيه العادية )والبانوراما اغلى بس مش عارف سعرها.وخصوصا انها تقفيل فرنساوي مش تركي.
-اقصى سرعة عن تجربة 170ك\س,لانها عربية تقيلة 1475 ك يعني طن ونص.
-مفتاح العربية عبارة عن كارت الكتروني لو باظ او ضاع تشتريه ب1000 جنيه التركي و750 الصيني
ولازم يتشفر على العربية عند عزب في ش السودان او واحد في جسر السويس عند عمارات الفاروقية
وطبعا عند التوكيل الحرامي ب1500جنيه ويجيلك من فرنسا بعد 15 يوم برقم الشاسيه.
-لو السنتر لوك اللي في الكارت باظ ما تقدرش تقفل العربية .يعني لو حطيت السلاح في الباب وقفلت
يقفل باب السواق بس والباقي مفتوح.طبعا ده عيب خطير والفرنساوية كانو اغبياء في النقطة دي.
لاني كنت بسيب الازاز مفتوح سنة وادخل عصاية ادوس بها على زرار السنتر لوك جنب الفتيس عشان
اقفل العربية واعرف اطلع البيت بدل ما ابات جنبها.
-تكييفها مش قوي ,اظن عشان هي فرنساوي اوروبي مش مصممةللبلاد الحارة ,يعني لو بصيت على
بكرة التكييف حتلاقي شرطة واحدة بس ازرق للتبريد والباقي احمر للتدفئة,ولذلك لو فيه تلج بره متحسش بحاجة.
ده تقييمي العام للمميزات والعيوب.
وشكرا