الموضوع: 5 ايام في مطروح

انتهزت فرصة سفر مديري واخدت اجازة 4 ايام سافرت فيها مطروح
وده التقرير
طريق طويل نوعا ما 480 كم من باب بيتي لغاية مطروح ومليان رادرات متقسم لثلاث قطع
100 كم من اول بوابة اسكندرية لغاية الكيلو 106
وطريق العلمين 155 كم وكله نضيف
من مارينا لغاية مطروح حواللي 180 كم ونصة كويس ونص وحش
فول عربيتك وانت خارج من القاهرة
وممكن تفول مرة كمان وانت قدام مارينا دي انضف بنزينة
انا مسكت الطريق 6 صباحا وصلت مطروح 10:30 تقريبا
معظم بنزينات مطروح مفيهاش 92 غير واحد اللي وانت طالع عند حمامات كيلوباترة او طريق عجيبة
حجز الشقة تم عن طريق احد المعارف جزاه الله كل خير لانه وفر عليا اللف والبهدلة وانا اخدتها بسعر ماينفعش يتقال لانه اتعمل فيها واجب جامد جدا
اسعار الشقق هناك على البحر تبدا من 250 في الايام دي وغاية 600 جنية
افضل الاماكن منطقة روميل وفي كمان قرية اندلسية رائعة وفي شاليهات في عجيبة مستقلة بذاتها بس عجيبة تبعد عن وسط البلد 25 كم بالعربية حسبة نص ساعة كدة
البلد نضيفة جدا جدا جدا ومنظمة بشدة والمرور منظم ورائع وخد باللك من سحب الرخص بسبب الحزام او السرعة
السرعة جوة البلد 40 كم وفي الطرق الطواللي 60 كم وفي رادرات فعلا وفي كتابة نمر لعدم لبس الحزام
الخضروات والفاكهة خصوصا نوعا ما غالية عشان النقل مسافة كبيرة
الاسماك عمايلها مش حلوة وغالية فعلا كيلو البوري الحر مش مزارع اكتر من 28 جنية والمزارع ب 23 وحجمة صعير مش كبير
الجمبري اوووف اد مصر مرتين لو الوسط هنا ب 60 هناك 120 وتاخد 100 بالعافية
مياة الشرب مستحيلة طبعا المية للاستخدام اليومي فقط
والافضل شراء تانكات المية فئة ال 10 لتر ب 7 جنية وال 20 لتر ب 12 جنية ودي متوفرة قوي هناك او لو عندك فلتر محترم تاخدلك عبوة لشرب الاطفال زي ما عملت وبقيت اشتري تانكات المية ليا انا وزوجتي
شارع اسكندرية اهم الاسواق الحيوية بس للبضاعة الرخيصة نوعا ما وشعبي شوية
سوق ليبا في بضاعة كتير مستوردة وفي محلات هدوم كويسة والاكتر مضروب وفي كمان كوبي اوريجنال بس تلاقية بصعوبة جدا وبقي نادر
بسبب زيارة الرئيس معمر القذافي لمصر هاتلاقي يفط ترحيب في كل مكان وكمان قافلين الجمرك من ليبا لمصر والبضاعة محجوزة هناك كتير
اسعار زيت الزيتون خارج المنافسة فعلا
قطفة اولي على البارد زيت مطروح الكيلو ب 25 جنية وممكن تاخد ب 23 حموضة اقل من 1% وده للناس اللي بتفهم في زيت الزيتون تمنة مش اقل من 45 جنية الكيلو
البلح برضه هناك سعرة حلوة جدا والنعناع الجبلي ونعناع (براني) الجبلي الكيلو ب 20 وبراني ب 50 بتاع سيدي براني كفاية ريحتة وفوايدة الوهمية
الشعير الصحراوي هناك متوفر قوي والكيلو ب 5 جنية للناس اللي عندها املاح زيادة في جسمها
العسل الابيض معظمه هناك مضروب وغشوش وحالتة نيلة
وفي طبعا كل انواع الاعشاب والياميش بسعر معقول نسبيا

الخروج بالليل مش هاتلاقي اماكن كتير عشان كدة البلد دي اخرك فيها 4 او 5 ايام خاصة لو مالكش في الشيشة والكافيهات زي حالاتي
كل مطاعم الوجبات السريعة ليها فروع هناك وكلهم على الكورنيش
مؤمن-كوك دور-كنتاكي-ماك-هارديز
وكمان في حلواني صابر واخد مساحة كبيرة قوي على البحر وطبعا هو زي المالكي كدة للي مايعرفوش
بلد جميلة ومليانة مزارات رائعة زي عجيبة وكليوباترة ومتحف روميل ومنظر شروق الشمس وانت عند عجيبة او عند كوبري روميل فوق الرائع بشوية
بلد جميلة وادعو الناس كلها للاستمتاع بيها وعلى مهلكم في السواقة
كريم منير