أرجو المساعدة والمشورة من المنتدى الغالى

نصيحة قبل اى حاجة ماتستناش لغاية نص الشهر حاول تبتدى من دلوقتى فى الاجراءات

1 - اول حاجة حاتروح الشهر العقارى وتسجل عقد بيع لنفسك بموجب التوكيل اللى معاك
2 - حاتجيب شهادة مخالفات من السلام (بس المشكلة اليومين دول ان فى اعتصام من وكلاء النيابة عشان الاعلان الدستورى الجديد)
....* الخطوات اللى جايه فى مرور حلوان
3 - حتروح مرور حلوان وتشترى ورق فحص ونقل ملكية ( وده على حسب انت حتجدد سنة ولا اتنين ولا ثلاثة وده اللى حاتقوله للراجل اللى بيبع الورق عشان يديلك الورق على حسب سنوات التجديد)
4- حتروح مكان الفحص فى مرور حلوان وترفع بصمة شاسيه و موتور
5- حاتشترى بعد كده شنطة الاسعافات و المثلث من المرور
6- لوعندك طفاية حريق حديثة حيدقلك عليها رقم الشاسيه عادى لو تاريخ صلاحية الطفاية منتهى حاتشترى واحدة جديدة من المرور ويدقلك عليها رقم الشاسيه
7- احتفظ بوصلات شراء المثلث والاسعافات و الطفاية عشان الظابط بيشوفهم ويأشر عليهم
8- كده انت خلصت الفحص ومش حتحاج العربية تانى الا لو حاتغير لوحات
........*(لو بتنقل من مرور الى مرور تانى فى نفس المحافظة مش حتحاج تغير لوحات لكن من محافظة الى محافظة تانية حتغير لوحات)
9- حتروح بعد كده تدفع التأمين الاجبارى وده بيبقى على حسب عدد سنوات التجديد
10 - بعد كده حتلم كل الورق (الفحص + التأمين + صورة البطاقة + صورة الرخصة + اصل الرخصة + التوكيل + عقد البيع اللى انت سجلته لنفسك + صورة من عقد بيع أى سيارة قديمة كانت ملكك عشان مايحسبش عليك ضريبة ترفيهية + شهادة براءة الذمة (المخالفات))
11 - حتروح على الشباك وتستنى الرخصة الجديدة
ملحوظة مهمة جدا فى حالة اى مشاكل فى الورق او تأخير فى الاجراءات
....* صلاحية ورق الفحص شهر واحد
....* صلاحية شهادة براءة الذمة ( المخالفات ) 15 يوم
اى واحدة صلاحيتها تخلص حاتعيدها تانى

(خلى بالك لو الرخصه انتهت وماكنتش ابتديت اجراءات نقل الملكية حاتجيب عدد 2 شهادة بيانات من مرور السلام واحدة للشهر العقارى وواحدة لمرور حلوان)

بالتوفيق ان شاء الله