الموضوع: هل يعقل ان حد يحط بنزين فى عربيته بـ 1000 جنيه فى الشهر

المشاركة الأصلية كتبت بواسطة syd

والله يا جماعة موضوع الدعم دة انا كان ليا فيه رأي وبعد لما كتبته احتفظت بيه في ملف تيكست
بس هحطه هنا علشان اوضح وجهة نظري

يا جماعة بردو محدش فهم الزتونة من الموضوع

الغرض هو ترشيد الأستهلاك
ترشيد الأستهلاك
ترشيد الأستهلاك

لما يقولك انت اخرك معايا 150 لتر - بعد المفاصلة بقوا 200 لتر (للأسرة) - يعني لو لقيت ابنك واخد العربية عشان يتمشي بيها علي كورنيش المعادي ولا طالع المقطم عشان يشم شوية هوا - هتجيب كرشه لأنه بكدة هيقتطع من نصيبك ونصيب والدته وأخواته في البنزين الشهري

الغرض مش أنهم يذلونا او يحطوا حاجة في جيوبهم

الحكومة عايزة ترشد الأستهلاك - يعني بمعني تاني
الحكومة بتدفع ثمن خروجتك بالعربية عشان تمشي العيال وتفرج عنهم
الغاوي ينقط بطاقيته
عايز يا حبيبي تتفسح - ادفع الثمن - مش تتفسح وتتفشخر من جيب غيرك

تخيل لو عملوها علي الكهرباء ؟؟؟؟
مش هتلاقي واحد مولع نور ومكيف في غرفة وهو قاعد في غرفة تانية
هتلاقي الشعب المصري كله حريص علي كل لمبة وكل كيلو كهرباء (دة ممكن الواحد يستخسر يرن الجرس ويخبط علي الباب اوفر)

بنفس المنطق وبعلم القياس - أسقط الموضوع علي البنزين
لو انت عارف ان حصتك في الشهر 150 لتر - هتشيل من دماغك فكرة تسقيط مكنة 2000 سي سي بدل ماتور عربيتك ال1000 سي سي عشان الشد والغرز وشد المواتير
هتشيل من دماغك فكرة اتمشي بالعربية - وهتنزل تتمشي علي رجلك
هتشيل من دماغك
هتشيل من دماغك
هتشيل من دماغك

وبكدة تبقي الدولة وفرت ملايين بتدفعها في الدعم لحاجات تانية أفيد للمجتمع ككل

انت راجل ولا هامك حاجة وأناني ومش بتفكر غير في نفسك
رايح جايب عربية 4000 سي سي وبالع دعم الدولة كله لنفسك (كل أحترامي لأعضاء المنتدي الكرام - ولا أقصد توجيه الكلام لأي منهم او بشخصن الحوار بيني وبين حد - انا بتكلم بوجه عام)
انت راجل اناني وماشي بعربيتك بتدخن ومش عايز تروح تظبط الكربراتير اللي سافح بنزين البلد كله
انت انت انت

فاكرين ايام الأزمة ؟ اللي كانت من كام شهر قبل الأنتخابات
كنت انا اقعد ادور علي بنزين ومش لاقي لتر واحد واشوف قدامي شاب بسيراتو كوبية مفيمها وعمال يلف بيها ويتمنظر ويحرق علي الغيارات - ابقي انا عايز البنزين عشان اروح شغلي واقدم حاجة لمجتمعي وهو عمال يلف بيها عشان يتمنظر قدام البنات في المولات والأسواق
مابيصعبش عليك البنزين اللي بيتحرق في مشكحة الشباب بالعربيات في جامعة الدول رايح جاي رايح جاي
مابيصعبش عليك البنزين اللي بيمونوه السياح اللي نازلين يتفسحوا بعربيات اقل ما فيها 4000 سي سي وبياخدوه بسعر مدعم وليل نهار مشكحة بالعربية ولف بيها في شوارع المحروسة ؟؟؟


اعتقد دة توجه عام لتقليل النفقات وترشيد الأستهلاك - بمعني أخر - شد الحزام

بس لو فضلوا يأذنوا بهذا التوجه الشعب هيضربها طبنجة ومش هيسمع منهم وهيعمل ودن من طين وودن من عجين
طب نجيبها من فوق وبالأمر وغصب عنك هتوفر يعني هتوفر لأنك مش هتقدر علي سعر البنزين وهو مش مدعم
او لو قدرت - خير وبركة اهو بتدخل فلوس لخزانة الدولة

هتقولي طب ماهو هيرفع سعر السلع الغذائية والمواد التموينية
هقولك ساعتها هيبقي في فائض في الموازنة هتقدر تدعم بيه الكلام دة او هيبقي لينا عين نطلب من الحكومة تدعيم السلع الغذائية وتوفيرها بسعر رسمي

حد فيكوا فاكر جمعيات النيل ؟؟؟؟
كانوا بيبيعوا فيها لحمة وسمك وجبن وكل حاجة
والفاخر منها كان اسمه سومانيل (منتشر في مصر الجديدة وجسر السويس)
تفتكر لو وفروا فلوس الدعم وطورا هذه المتاجر ورجعوها لسابق عصرها - مش تبقي فكرة كويسة ؟؟؟

يا جماعة - احنا دولة - ودولة كبيرة - اكبر مني ومنك ومن المنتدي كله - لازم نفكر تفكير بناء
تفكير يفيد المجتمع كله

وعلي فكرة
الكهرباء هي كمان مدعومة
يعني لو جه في يوم وقالك هنشيل الدعم من علي الكهرباء وهنرجعه للبنزين
هترد تقول أيه ؟؟؟؟

اتمني ماكنش ازعجت حد بمشاركتي
بس انا بصراحة بفكر بمنطق جماعي - صحيح انا هتضر من موضوع الدعم لأني بستهلك اكتر من 150 لتر في الشهر
بس لو الدعم هيوفر لولادي تعليم أفضل وغد مشرق - اكيد هتضحي بنفسي في مقابل أولادي
لو الدعم هيوفر علاج ليا لو مرضت - اكيد هبقي راضي اكتر من كدة
لو الدعم هيخلي مصر احسن - معنديش مانع

وبعدين هو مش بيقتلك - هو بيقولك وفر شوية يا بني أدم - عايزين نتقدم

الكلام ده نظريا من اروع ما يمكن

بس واقعيا فى مصر مش حيحصل .......... ليه بقى ؟؟؟؟؟

عشان الحكومة حتوجه كل الفائض فى فلوس الدعم لسد عجز الموازنة اللى متسبب فيه ارتفاع حجم الدين المحلى العام

يعنى ببساطة مافيش اى خدمات او مرافق حتتحسن عشان حيتم ضخ الفائض فى فلوس الدعم فيها ....... اللى حيحصل ان الحكومة عايزة فلوس عشان تسد تمن الخدمات و المرافق الحالية اصلا اللى منيلة بستين نيلة اللى هى مداينة الحكومة

و ده كان احد اغراض قرض الصندوق الدولى

من الأخرررررررررررررررر

لن تتقدم دولة ابدا و يزيد مستوى معيشة أفرادها الا بتنمية موارد الدولة الطبيعية بعيدا عن جيوب مواطنيها

و اللى مش مصدق يشوف كل تجارب النهضة و التنمية اللى عملتها دول كانت ضايعة و دلوقتى افضل مننا بسنين ضوئية