يادي النيلة !! مشكلة مع التأمين

**MoToRiZeR** · 14-07-2008 07:05 PM

الأسبوع ده جميل جدا الصراحة .. العربيتين مطلعين عيني .. و بعد يوم منيل بنيلة امبارح في توكيل دايهاتسو و ضفيرة الكهربا اللي طلع فيها مشاكل و اتهموني ان انا اللي بوظتها برة .. انهاردة كان موعدنا مع تأمين الجمعية المصرية التعاونية و فقرتها من القرف اليومي .. اللي حصل ان تاكسي جه حك الجنب الشمال من العربية و طير المراية في منزل كوبري .. كلمت الجمعية قالولي تعالي في وقت كذا انشاء الله نعملهالك .. انا قلت هعمل المرايا بس مش هسمكر ولا اعمل عشان العربية متبيتش و مفيش وقت اليومين دول للكلام ده .. أول حاجة قلتلهم في التوكيل قالولي ليه بس دي حاجة بسيطة حضرتك دي مراية يعني .. بعتوا جابوا المراية و عملوها في مركز معتمد تبعهم بعد شوية امضاءات و روتين .. أول حاجة المراية كانت سودة مش مرشوشة .. قلتله هترشها ؟ قاللي لأ حضرتك إحنا هنغيرهالك لو عايز ترشها دي حاجة تانية و هتبقي علي حسابك .. انا كنت قرفان من امبارح الصراحة و جايب اخري من المجادلة و الكلام اللي يحرق الدم و إثبات ان حقي هو حقي .. قلت سودة سودة .. بعد ما المراية اتركبت قالولي فيه 10% من تمنها .. قلتلهم ليه؟ مفيش اي حاجة في العقد بتقول كدة .. قالولي حضرتك أصل ده عرف (!!!!!) و 10% مش كتير .. قلتلهم مش موضوع كتير ولا قليل بس امال انا بدفع تأمين ليه .. عشان ادفع 10% ؟! .. انا لو اعرف كدة مكنتش أمنت تبعكم .. قاللي عموما احنا تحت أمرك ولو مش عايز تجدد معانا مفيش مشكلة (اللي هو لو عايز تمشي امشي متوجعش دماغنا ) .. و بعد ما اتلقفت من مسئول لمسئول لمسئول .. دفعتلهم 40 جنيه و انا متأكد ان المراية دي مش ب 400 جنيه و متأكد انها مش أصلية أصلا و انها أكيد صيني من أول ما مسكتها في ايدي.

انا مأمن عالسريون تبع الجمعية برده .. و مستني قبل معاد التجديد اروح اعمل الخبطات كلها مرة واحدة .. و السيريون مينفعش اعمل فيها اي شغل برة التوكيل عشان التلاكيك .. حتي لو سمكرة و رش .. ايه الوضع دلوقت لأن انا خلاص كرهت العربيات .. و برده فيه خبطات في الكليو عايزة تتعمل بس مستني يبقي وقت فاضي ، اعمل معاهم ايه ؟

و لو حبيت مجددش .. اروح مع شركة ايه ؟ انا قريت الموضوع بتاع افضل شركات التأمين و مطلعتش منه بأي نتيجة .. بل علي العكس الجمعية واخدة فيه تاني افضل شركة .. و في الردود كل الناس بتشتم فيها مش عارف ازاي

**Chicco** · 14-07-2008 07:16 PM

إيه الحكاية يا محمود باشا ...الأسبوع ده مش ماشي معاك خالص
خبرة حياتية من المحروسة ...أي مؤسسة في مصر بتبقى هايلة لو تعرف حد أو متوصي عليك..... لا حتلاقي لكاعة و لا ردود بتنرفز و لا تبريرات ساذجة و كله بيبقى تمام
لو ما تعرفش حد يبقى أنت و حظك بقى .....للاسف الشديد

**Ahmed Samy** · 14-07-2008 08:34 PM

التأمين ده مقلب كبييييييييييييير
عايز واحد تلم و باااارد و سئيييييييييييل و فااضي

انا اشتري أعصابي بالفلوس و مش هأمن

**semsem_tv** · 15-07-2008 03:22 AM

أخى العزيز
كانت معى سيارة هيونداى اكسيل موديل 1997 1500 سي سي، كنت عامل تأمين على السيارة فى شركة الشرق للتأمين لكن كنت عامل التأمين عن طريق غبور بأبو رواش.
كنت لما أعمل اى خبطة بالسيارة اروح غبور ويعملوا لها مقايسة ويقولوا ايه اللى المفروض يتغير واترك لهم السيارة ويقولوا لى امتى معاد الاستلام وذلك دون ان ادفع اى نفقات اضافية او نسبة تحمل لانه كان تأمين شامل واى اصلاحات تتم فى التوكيل نفسه.
اما بالنسبة للون مراية الجنب فالمفروض انه يسلمك المراية بنفس اللون اللى كانت عليه، بمعنى لو المراية اصلا الموجودة فى السيارة لونها زيتى لازم المراية الجديدة يسلمها لك نفس اللون، انا على الاقل كانوا بيعملوا معايا كده.