الموضوع: 20 دقيقة سفاري علي طريق سقارة.. (تجربة مثيرة..)

السلام عليكم..
النهاردة انا كان عندي شغل في اكتوبر.. و الحمد لله كان يوم حافل بالاحداث..
اتأخرت شوية في الرجوع فاتني الباص بتاع الساعة 5.. استنيت لحد باص 7 اللي كانت المفاجأة انه مش باص.. و كان عربية لاند كروزر برادو..
ديزل.. و كانت بالنسبالي اول مرة اركبها..
السواق اخد طريق الواحات لحد ما نزل علي طريق الفيوم.. كان زحمه جدا.. المهم حاول شوية لحد ما وصل لمكان كده و قام هووووووووب..
داخل شمال في وسط الصحرا.. مفيش طريق.. :) :) :)
عبارة عن شبه مدق.. مليان مغامرات..
هضاب.. مرتفعات و منخفضات.. و كثبان رملية.. :) :)
رمل ناعم كتير يعني.. و مناطق صخرية.. (طوب كبير و حجر..)
حتت مستوية شوية.. و مدقات محببة و عنيفة..
المهم لمده لا تقل عن تلت ساعة ماشيين علي الطريق ده.. والعربية ما شاء الله زي الوحش.. ولا غرز.. ولا اي احساس بالرمل ولا المطبات الصغيرة.. لكن المرتفعات و المنخفضات بقي.. حدث ولا حرج.. :) :) :)
مشينا مسافة لا تقل عن 5 كم طريق مدق.. الراجل ماشي فيه علي 60 مثلا.. و اسرع عربية جنبنا ماشية علي 30 او 40 بالكتير.. وباتكلم عن العربيات النص نقل يعني.. مش الملاكي طبعا.. اللي كانت ماشية بتعاني علي الطريق ده..
كنت مشفق عليهم جدا.. (العربيات ) من اصحابها.. :) :)
المهم بعد شوية خبطات و كدمات.. و رضوض.. :) :) :)
و و شقلبة علي الكرسي.. و و تنطيط في العربية علي الكرسي بفعل المطبات.. :) :)
لقيت علي مدد الشوف بشائر الطريق الدائري هلت في الافق..
طلعنا علي الدائري قبل مطلع المنصورية بحوالي من 1 ل 2 كم علي اقصي تقدير..

الموضوع ده كان في عربية لاندكروزر برادو.. اللي هي تعتبرمن اصغر ما انتجت تويوتا في عالم الدفع الرباعي..
اللهم الا الراف 4 اللي هي يعني مش عربية بهدلة ..
ده يعني غير اللاند كروزر الكبيرة.. (مامتها.. :) ) ولا حتي الاف جي كروزر قاهرة الصعاب.. الهامر البيبي..
ولا بقي النيسان باترول ولا الجي ام سي..
موضوع خلاني اشعر بمتعه السفاري في العربيات دي.. و متعه سواقتها اللي متحصلش غير في الطرق دي..
و الحمد لله كانت تجربة ممتعه.. و مثيرة.. بغض النظر عن شوية البهدلة في العربية.. بس كنت مستمتع.. :) :) :)

سؤال بقي مهم جدا: ايه اللي خلا الحكومة بعد ما كان العمل في مد الطريق الدائري لحد المكان اللي دخلنا منه ده علي طريق الفيوم.. توقف الشغل فيه.. مع العلم ان الطريق شبه ممهد لمسافة كبيرة قوي منه..؟؟ سمعنا والله اعلم ان الشغل توقف بسبب الاثار..!!!!!
الله اعلم.. بس يعني طريق زي ده ازاي لم يدرس قبل العمل فيه انه ممكن يعدي علي مناطق اثار؟؟
لو كان كمل كان هيخف ضغط رهيب جدا من علي ميدان الرماية و اول الصحراوي..