استشارة فى الشراء: مطلوب عربية فى حدود 35 - 40 الف

سلام عليكم
انا عضوة جديدة فى المنتدى الهايل ده ومحتاجة استشارتكم الكريمة فى شراء عربية. انا مليت الفورم اللى انتو طالبينها

المبلغ المتاح / يفضل (35) - اقصى حد (40)
نوع العربية / مستعمل
خبرتك فى السواقة وسكك الصيانة / جديد
شكل العربية / مش فارقة
الموديل / مش فارقة
إستخدام السيارة فى الاغلب / داخل المدينة
انتقالاتك بالعربية / فى الاغلب لوحدك
الكماليات المرجوة / المهم التكييف والباور
إستهلاك البنزين / يفضل قليل ويفضل تكون 1300 cc
قطع الغيار / فى المعقول
اماكن الصيانة / يفضل توكيل
التفرغ لأعمال الصيانة / ممكن تتدبر
الاستمرار بالعربية لفترة / يعنى سنتين او 3 كدة
سعر إعادة البيع / خسارة معقولة
اهم حاجات بتدور فيها على العربية /
- يفضل تبقى عاملة اقل من 80 الف كم
- قلة اعطال
- استهلاك بنزين قليل
- لو فى حاجة اوتوماتيك يبقى كتر الف خيركم بس مش شرط يعنى :)

اهلا بيكي سارة نورتينا
شوفي انا كمان معايا نفس المبلغ ده تقريبا وممكن ازوده وبدور علي نفس المواصفات
وبصراحة اللي وصلتله
- هيونداي اكسيل باور - تكييف 1300
- سكودا فليشيا تكييف 1300
- سوزوكي سويفت تكييف - باور 1300

وربنا يوفقنا جميعا ويقدملنا اللي فيه الخير

انا ارشحلك الاكسيل انما الفليشيا والسويفت هايخلوكى تكرهى نفسك اولا الفليشيا خشنة جدا وقطع غيارها غالية ومشاكلها كتير والسويفت مش محتاجة كلام بصى لاغلب العربيات الى فى الشارع هاتلاقيها متبهدلة لانها عربية ضعيفة جدا وقطع غيارها قليلة وغالية واساسا القعدة فيها مش كويسة وممكن زيارة لسوق الجمعة واقعدى فيها وانت هاتصدقى الى قلتهولك ..

والاكسيل عربية جميلة جدا بس ماتجريش بيها فوق ال 100 كيلو لان ثباتها بعد ال 100 مش حلو غير كدة هى عربية ممتازة فى كل حاجة.

وممكن كمان تجربى الابيزا او الجولف 2 1300 سى سى هاتلاقيها فى حدود السعر ده وهى عربيات جميلة جدا وقوية واستهلاكها فى البنزين هايل انا عربيتى جولف 2 بتروح اسكندرية ب 11 لتر بنزين وجوة البلد فى الزحمة بتعمل حوالى 200 كيلو فى الصفيحة والتكييف شغال على كل حال فكرى كويس وربنا يوفقك.

متشكرة اوى يا جماعة على الردود السريعة ديه :)
طب ايه نظام الجولف 2 ؟؟ اسعار قطع الغيار ايه نظامها و هل كل الميكانيكية بيفهموا فيها ولا هلاقى ناس بتفتى و كدة
وكمان هل ممكن الاقى حاجة حالتها كويسة ؟؟ انا كل الجولف اللى بشوفه متهان ومتبهدل اخر بهدلة

أنا معايا عربية بولو 98 وعارضها للبيع بس أنا طالب فيها أعلى شوية من الأربعين
هى جميع الكماليات 1000 cc
قطع غيارها غالية شوية بس بتعيش
سيبيكى من الكورى المستعمل هتتعبى على ماتلاقى حاجة كويسة
نصيحتى ليكى شوفى بولو (مش لازم بتاعتى يعنى) أو ابيزا أعتقد ان هم مناسبين ليكى كبنت (العربية اللى معايا ده بتاعة زوجتى)
ربنا يوفقك إن شاء الله

طب ممكن تفاصيل اكتر شوية عن عربية حضرتك ؟ يعنى طالب فيها كام والعربية حالتها ايه و عاملة كام الف ؟ وهل ال 1000 cc بتخلى العربية تسحب كويس والتكيف شغال ؟
واستهلاك البنزين اية اخباره ؟؟

الجولف 2 قطع غيارها معمرة فعلا وسعرها معقول (طبعا الا اذا قارناها بال 128 ) وكل الميكانيكية بيشتغلوا فيها عادى بس احسن شغل تاخديه من ميكانيكى متخصص جولف

ممكن تلاقى جولف كتير حالتها كويسة الرك على الى هايفحصهالك وانا افضل انك تاخديها لمحطة شل الى فى شارع الهرم على اليمين وانت جاية من الجيزة رايحة على اخر الهرم دول ناس 100 100 بيفحصوا كل حاجة فى العربية وتقريرهم فعلا هى الحاجات الى عملتها فى الاربع شهور الاولانية ومش بياخدوا كتير اظن 70 جنيه تقريبا وبيطلع واحد يجرب العربية ويقوللك على مشاكلها فى المشى

والبولو برضه عربية كويسة عيبها الوحيد انها 1000 سى سى وده الى بيخلى الناس تبيعها علشان سحبها مع التكييف مش قد كدة انما فى المجمل هى عربية كويسة وقابلة للتعديل وتسقيط موتور اكبر بتبقى تحفة بموتور 1600 سى سى (بس سعرها بينزل بسرعة يعنى من سنة ونص كان اقل واحد بيطلب 55000 فى العربية الى حالتها عادية دلوقتى وصلت لاول الاربعينات لو العربية كويسة ) بس هى عربية بناتيتى وفولكس يعنى واخدة شهادة الجودة

والابيزا 94 عربية كويسة جدا وعلى فكرة هى نفس الجولف 2 من ناحية الشاسيه والموتور بس متدلعة شوية فى الشكل والتابلوه بتاعها اشيك شوية من تابلوه الجولف 2 وسعرها ارخص من الجولف لان الجولف جولف برضه.

----------->> على العموم ماتشتريش عربية الا لما تاخدى راى الناس الى راكباها حتى لو هاتوقفيهم فى اشارة المرور وتسأليهم وطبعا الوقفة فى محطات البنزين فرصة هايلة للسؤال وربنا يوفقك

1-اوبل كورسا موديل 94
2-سيات ابيزا موديل 94
3-بولو موديل 98 او 99
4-فيات اونو
دي الاختيارات اللي قدامك ,ال 3 الاولنين متقاربين ممكن تنزلي السوق واللي تلاقيه بحاله افضل منهم اشتريه ,بالتوفيق

أستاذه سارة:
العربية لونها زيتى ميتالك رشه نضافة فى التوكيل
سعرها المطلوب 43000 (مبدئى)
عاملة 152000 كم
طبعا مع التكييف السحب بيكون ضعيف جدا وخاصة لو فى مطالع
استهلاك البنزين ممتاز بمعنى على طريق السفر بتعمل فى حدود 16 كم فى الليتر بس من غير تكيف، استهلاكها مع التكييف بيزيد شويتين
أحلى حاجة فيها ان حجمها الخارجى صغير وأبعادها سهله وسواقتها فى الزحمة والركنة سهلة جدا

اوبل كورسا برضه 1000 سى سى وفيه منها 1300 بس مش كتير قوى والى معاه مابيبيعهاش بسهولة وال 1000 فيها نفس مشكلة الpolo مع التكييف والسحب والبولوا اكبر منها واحدث

قطع غيار الكورسا نااااااااااااار بجد تقريبا عبد الحليم حافظ كان شارى واحدة كورسا وواقف عند بتاع قطع الغيار وهو بيغنى نار يا حبيبى ناااااااااااااااار

بس الميزة انها اوبل يعنى المانى يعنى ليها اصل وفصل وحسب ونسب وليها اهل يترد عليهم وكمان المانى يعنى قطع الغيار بتعيش زى البولو والجولف والابيزا بس لو انا الى هاشترى هاتبقى البولو احسن علشان الثبات على الطريق البولو احسن

الفيات اونو جميلة واقتصادية جدا جدا جدا فى البنزين تقريبا بتعدى ال 360 فى الصفيحة وكويسة مع التكييف فى المشى بس العيوب انها ضعيفة جدا بالمقارنة بالعربيات التانية (من ناحية الصاج والخبطات وعوامل الامان وكدة ) قطع غيارها رخيصة زى اغلب الفيات بس مش بتعيش كتير برضه زى اغلب الفيات بس هى هايلة جوة البلد فى الزحمة لو انت مشاويرك كتير فى الزحمة

شكرا على كل الردود الهايلة ديه
بس مش عارفة. مشكلة السحب مع التكييف ديه هتخلينى افكر الف مرة قبل ما اشترى عربية 1000 cc فكده البولو والكورسا ماينفعوش. خلينا فى الجولف 2 احسن
كمان معروض عليا عربية كيا برايد سيدان اوتوماتيك موديل 2001 وعاملة 95 الف كم ومش راشة دواخل . العربية عجبانى بصراحة خصوصا انها اوتوماتيك و جميع الكماليات بس صاحبها طالب فيها 40 الف ومش عايز ينزل مليم
ايه رايكم غالية ولا سعرها كده حلو ؟ وايه رايكم فى العربية اصلا ؟

الكيا عموما احسن الكورى وماسمعتش عن مشاكل فى البرايد كل الناس بتشكر فيها ( بس برضه اسألى حد راكبها بقاله فترة ) البرايد 1300 سى سى تقريبا وده كويس بس جربيها لان الاوتوماتيك حمل على الموتور زى التكييف ويمكن اكتر فى بعض الانواع يعنى انا والدى معاه لانسر 98 اوتوماتيك و 1300 لما بيشغل التكييف العربية سحبها بيقل بس مش فارقة معاه لانه اصلا مابيجريش فانت جربيها وشوفى السحب والAcceleration (التسارع ) لو لقيتيه معقول وجربى ثباتها اجرى شويية كدة عدى ال 100 كيلو وشوفيها بترجرج ولا لأ(ممكن تكون محتاجة ترصيص عجل ودى بسيطة وممكن تسمعى اصوات تخليكى تشكى فى العفشة ) وغربلى العربية وانت على سرعة 40 كيلو يعنى هاتى الدريكسيون يمين وشمال بسرعة وكذا مرة وشوفى العربية هايكون رد فعلها معاكى ايه وكمان وانت ماشية على 50 كدة دوسى فرامل طبعا مش مرة واحدة بس حاولى تخلى العربية تقف فى مسافة قريبة مثلا 15 متر وشوفيها هاتقف بسلاسة ولا ها تخربش فى الارض لو عملتى الحاجات دى ولقيتى العربية عاجباكى وسألتى حد راكبها على الاوتوماتيك ومالقيتيش فيها مشاكل (لان بعض العربيات الكورى الاوتوماتيك فيها مش تمام زى النوبيرا ) يبقى توكلى على الله وروحى ارفعيها فى البنزينة وماتعتمديش على الميكانيكى او السمكرى بس وربنا معاكى ونصيحة ماتستعجليش مش علشان هو ماسك فى السعر تبقى عربية لقطة ممكن ماتكونش كدة فلوسك فى جيبك ودورى على مهلك

استاذ madawbs
لى سؤال هى الكيا 1300 الأوتوماتيك ده مش تقفيل مصرى
أعتقد ان المصرى أنا كنت سامع فيها مشاكل بس الكورى بيشكروا فيها

باقوللك ايه لو ممكن تقوليلى ان مشاويرك اليومية قد ايه وبتسافرى ولا لأ وعاداتك فى السواقة (متهورة ولا عاقلة ولا هادية ولا لسة بنقول ياهادى وهانمشى نخبط فى خلق الله ) وخبرتك فى الميكانيكا (الاعطال البسيطة يعنى ) قد ايه واهتمامك بشكل العربية اكتر ولا بامكانياتها زى الثبات التسارع والحاجات دى اكتر وانا اريحك فى اختيار النوع الى يناسبك.

على فكرة انا مش تاجر ولا حاجة انا مهندس فى مركز المعلومات مجلس الوزراء.

اقتباس:

---

المشاركة الأصلية كتبت بواسطة meerothe1st

استاذ madawbs
لى سؤال هى الكيا 1300 الأوتوماتيك ده مش تقفيل مصرى
أعتقد ان المصرى أنا كنت سامع فيها مشاكل بس الكورى بيشكروا فيها

---

السؤأل ده يجاوبك عليه واحد راكب كيا برايد مش انا
لكن بصفة عامة ايوة كل العربيات الى نازلة من بلدها احسن من العربيات الى بتتقفل برة بلدها لان العمالة الى بتقفل بتفرق وكمان بيبقى فيه نسبة مكون محلى عادة ما بيكون اقل جودة من المكون الاصلى (بتاع بلدها وده مالوش علاقة بمصر وكوريا بس فولكس لما جمعت البيتلو فى البرازيل من سنة 1976 وهى اقل جودة وكذلك لما جمعت الـ CrossFox فى البرازيل اظن فى 2004 برضه طلعت جودتها مش الى هى وناس كتير مابتحبش تركبها علشان برازيلى ) وعلى فكرة مش هاتعرفى هى مصرى ولا كورى من الرخصة ممكن تسألى فى التوكيل او تسألى الناس الى راكباها او الى عندها خبرة فى الكيا انا اخرى فى الكيا عربية حمايا كيا سيفيا وكانت عشرة على عشرة بس كانت كورى موديل 2000

اقتباس:

---

المشاركة الأصلية كتبت بواسطة madawbs

باقوللك ايه لو ممكن تقوليلى ان مشاويرك اليومية قد ايه وبتسافرى ولا لأ وعاداتك فى السواقة (متهورة ولا عاقلة ولا هادية ولا لسة بنقول ياهادى وهانمشى نخبط فى خلق الله ) وخبرتك فى الميكانيكا (الاعطال البسيطة يعنى ) قد ايه واهتمامك بشكل العربية اكتر ولا بامكانياتها زى الثبات التسارع والحاجات دى اكتر وانا اريحك فى اختيار النوع الى يناسبك.

على فكرة انا مش تاجر ولا حاجة انا مهندس فى مركز المعلومات مجلس الوزراء.

---

مشاويرى اليومية فى حدود 15 كم راييح و 15 جاى والسواقة هادية بس برده لسه جديده نوعا ما فى السواقة وخبرتى فى الميكانيكا تقريبا صفر :scooter::scooter: وبالنسبة للنوع انا عايزة حاجة تريحنى بس. ثبات مش مهم اوى عشان مش هجرى بيها يعنى. اخرى 100 وتسارع مش فارق اوى برده. انا عايزة حاجة سهلة وخفيفة وتريحنى فى سواقتها وصيانتها وتكون بتكييييييييييف

الف شكر ليك يا باشمهندس. جزاك الله خيرا

اقتباس:

---

المشاركة الأصلية كتبت بواسطة SaraEid

مشاويرى اليومية فى حدود 15 كم راييح و 15 جاى والسواقة هادية بس برده لسه جديده نوعا ما فى السواقة وخبرتى فى الميكانيكا تقريبا صفر :scooter::scooter: وبالنسبة للنوع انا عايزة حاجة تريحنى بس. ثبات مش مهم اوى عشان مش هجرى بيها يعنى. اخرى 100 وتسارع مش فارق اوى برده. انا عايزة حاجة سهلة وخفيفة وتريحنى فى سواقتها وصيانتها وتكون بتكييييييييييف

الف شكر ليك يا باشمهندس. جزاك الله خيرا

---

مشاوير قليلة يبقى مش مهم اقتصادية البنزين الى فى الاونو
سواقة هادية ومافيش جرى والثبات على السرعات العالية مش مهم يبقى الجولف والابيزا يطلعوا من اللعبة

عربية سهلة وخفيفة (يبقى لازم فيها باور )وتريحك فى صيانتها وتكون بتكييف يبقى الاكسيل هى الى بنتكلم عليها عربية ناعمة وخفيفة وثباتها كويس لغاية ال 100 والتكييف بتاعها مع موتور 1300 بيبقى كويس جدا لو الموتور والتكييف حالتهم حلوة وهى بتنزل مكيفة يعنى المخارج بتاعت التكييف كتير وده احسن من العربية الى يركبلها تكييف بتبقى اربع مخارج بس وقطع غيارها موجوده ورخيصة وصيانتها اسهل مايمكن كانها 128 (بس برضه قطع غيارها مش معمرة قوى) كل الناس بتفهم فيها ولو عطلت ممكن اى سواق تاكس يساعدك.

فيه منها موديلين هاتشباك وسيدان الهاتش باك الناس بتشكر فيها اكتر وسعرها اقل وبيقولوا انعم فى المشى من السيدان (ولو انى سقت الاكسيل السيدان وكانت زى الفل وناعمة جدا فى السواقة وفراملها ممتازة وتسارعها هايل - بس كانت مانيوال مش اوتوماتيك بس طبعا العيب الى ماخلانيش اشتريها انها بعد الـ 100 كم بتتنطط فوق وتحت من ورا - وعلى فكرة كان راكب معايا فيها 3 اشخاص يعنى العربية كانت محملة - كنت حاسس انى راكب كنغر او ارنب واساسا 100 دى مش سرعة اقدر امشى عليها وبالتالى رفضت العربية واشتريت جولف ثابتة لغاية 185 كم كانى ماشى على التانى بالظبط) المهم السيدان برضه كويسة بس الناس الى بتبيع بتطلب فيها كتير لو حالتها كويسة.

أنا موافق كلام استاذ madawbs
بس أعتقد ان الأكسنت هتكون أحسن من الإكسيل
أنا سقت الإثنين واستريحت أكثر فى الأكسنت سواقتها ممتازة، ناعمة جدا تسارعها هايل ثباتها أحسن من الإكسيل صاجها أحسن شوية من الإكسيل، شكلها على بنت أحلى من الإكسيل وكمان أبعادها أحسن وأسها من الإكسيل وطبعا تكبفها ثلاجة (أنا كان معايا أكسنت 98 بس كانت 1500cc)
استخيرى وربنا يوفقك

الاكسنت طبعا اختيار ممتاز مش عارف ليه ماجاش فى بالنا من الاول

بس فيه ناس بتشكر فى الاكسيل وبتقول انها احسن من الاكسنت انا ماسقتش الاكسنت لانى ماعرفتش اقعد فيها كانت ضيقة عليا شويتين على الرغم من انى قعدت فى الاكسيل كويس.

على العموم الراى فى الاخر رايك والقرار قرارك اركبى دى واركبى دى وقررى بناء على التجربة.

لانوس كويسة جدا

اقتباس:

---

المشاركة الأصلية كتبت بواسطة mazmaz

لانوس كويسة جدا

---

ياباشا الموضوع ده من سنتين

سيينا 2001 1400 سى سى صيانة توكيل فبريكة بره و جوه و قطع غيار اصليه بالوكيل عاملة 95.500 كيلو و تنفع للبنات اوى و معظم اللى راكبنها بنات عشان الباور بتاعها ناعم و العربية سلسة ككل السعر 41.500 نهائى و الله الحالة ممتازة لو ناوية كلمينى على الخاص شكراا

م/ محمد صلاح