السلام عليكم ياريت يا جماعه حد ينقذنى من الحيره اللى أنا فيها ما بين نيسان صنى أتوماتيك ولا لانسر 1600 أتوماتيك فى ناس بتخوفنى من النيسان ومن مشاكل التقفيل المصرى وفى ناس ده بتشكك فى الانسر وهل فعلا فى مشكله فى فتيس الانسر الاتوماتيك وأنه بيسخن ولا أيه الموضوع وياريت م/ طارق يفتح الرابط ده ويعلق على المكتوب فيه ( مهم جدا بالنسبه لى )http://www.nilemotors.net/Nile/showthread.php?t=32068 وشكرا للرد مقدما وجزاكم الله خيرا
بجد انا معايا نيسان تيدا وعرفت ادا ايه الشركه دى محترمه جدا من العربيه دى
وفيه ناس هنا كتير بتشكر فى النيسان صنى التقفيل المصرى وفيه بعض الناس حصلتهم مشاكل والتوكيل حالها بدون اى مصاريف اضافيه
والصراحه انا شايف ان الانسر سعرها بقى مبالغ فيه اوى بدون اى اسباب فعلشان كده انا بنصحك بالنيسان صنى
من ناحيه سعر اعاده البيع وتوافر قطع الغيار ورخصها يبقى الانسر
لو هتكلم عن جوده التقفيل يبقى لانسر لانها يابانى بالكامل بس خلى بالك ان تقفيل النيسان مش وحش زى ما الناس متخيله
-انا بصراحه لما جيت اشترى العربيه مقدتش اجازف بمبلغ يقرب ل90 الاف جنيه فى عربيه تقفيل محلى (انا اينعم مليش تحفظات على تقفيل النيسان بس تقدر تقول حاله نفسيه من التقفيل المصرى والى الواحد بيسمعه عنه )
بس فى ميزه للنيسان انها ارخص من الانسر بحوالى 13 الف جنيه مع ملاحظه ان الفرق فى الاداء بين العربيتن مش جامد
-بما انت ناوى على اوتوماتيك 1600 ففتيس الانسر افضل من فتيس الصنى لانه cvt
-نقطه ان فتيس الانسر بيسخن ده مش صحيحه
-اولا الفبر المغطى لكنسول الفتيس من جوه فيه عازل للحراره بيمنع وصول الحراره للفبر الى حوالين الفتيس وخلى بالك السخونه ده مش جايه من الفتيس بس لأ ده جايه من محرك العربيه كمان
-لو نورت النور بليل هتحس بسخونه جايه من الفتيس وده سببها اللمبات الى بتنور حروف الحارات بتاعه الفتيس
طبعا لو طفيت النور مش هتحس باى سخونه
-الحاجه الوحيده الخاصه بسخونه الفتيس الموجوده فى الكتالوج هيه سخونه زيت الفتيس فقط
والكاتالوج قايل ان لمبه الn هتنور ونطفى اذا كان فى عطل فى الفتيس او الزيت سخن
انا الحمد لله مواجتش الموقف ده قبل كده وخلى بالك الزيت مبيسخنش الا لو انت مسافر مسافه طويله وماشى على سرعه عاليه والكلام ده موجوده تقريبا فى كل العربيات الاتوماتيك
انا واقع في نفس الحيره تمام و في نفس الوقت حاطط اختيار موفر في البنزين و الفلوس و هي البونتو 2008 كلاسيك بس مستني اراء الناس عنها و هل فيها فتحه سقف,
و في نفس الوقت مستني الناس هترد عليك و تنصحك بأيه بس ياجماعه الامانه في النصيحه و الصدق فيها و بلاش عواطف و تحيز اعمي علشان دي فلوس هتتدفع و يا اما هادعي للي نصحني بيها او عليه
اقتباس:
المشاركة الأصلية كتبت بواسطة semsem8100
أهلا يا استاذ semsem8100
هو الأستاذ U600 اللي عامل الموضوع المذكور في الرابط متحيز زيادة عن اللزوم للصني وفي سبيل تحيزه ده بيطلع كل العربيات المنافسة ملهاش أي قيمة
وللأسف الموضوع ده متكرر وفيه منه كتير في مواضيع المقارنات وعلشان كده أنا مش بادخل منتدى المقارنات نهائي لأن مليش في المناقشات البيزنطية والمناهدة يعني نفسي قصير في المواضيع دي جدا
هو ببساطة العربية الصني عربية كويسة جدا ويكفي ان تعرف ان عالميا تويوتا وهوندا ونيسان ترتيبهم قبل الميتسوبيشي في السيارات الياباني ويأتي بعدهم الميتسوبيشي ثم المازدا وباقي الياباني
انما طبعا ده الترتيب العالمي انما مصر حاجه تانية وبالتأكيد واضح ان تويوتا وميتسوبيشي في الطليعة ثم أي ياباني آخر
يعني اللي عايز اقوله ان النيسان عامة والصني خاصة عربية حلوة جدا انما احيانا اقرا عناوين مواضيع مفتوحة في منتدى نيسان (من الشريط المتحرك لعناوين المواضيع الجديدة ) بيكون العنوان شكوى من التقفيل المصري وانا طبعا لضيق الوقت نادر جدا لما بادخل اي منتدى غير ميتسوبيشي والمنتدى العام وده لأن هدفي الاساسي الرد على أسئلة الأعضاء بخصوص العربيات الميتسوبيشي سواء مواصفات أو اسعار أو قطع غيار أو صيانة أما موضوع المقارنات ده فأنا سايبه للعضو نفسه يدخل منتدى العربيات اللي بيقارن بينها ويشوف بنفسه أراء الناس المختلفة فيها ولازم برضه يكون آخد في الاعتبار انه بيقرا في منتدى مفتوح لكل الناس يعني الأفضل يتخذ القرار بناء على رأي واحد واتنين وعشرة
أخيرا بخصوص عيب اللانسر المذكور بتاع سخونة الفتيس فدي كما وضح الأستاذ Limo انها غير موجودة أو بمعنى صح غير محسوسة ولو فيه صاحب عربية اشتكى منها فهي بتكون موجودة بشكل بسيط في الكونسول ولا تؤثر على أداء العربية نهائي ولا ترقى لتكون مشكلة اساسا
على فكره انا دخلت على الرابط اللى الاخ Semsem قال عليه و رديت رد عليه رد منطقى اعتقد انه وافى للمقارنه بين السيارتين ووضحت مميزات الانسر اللى بيقول عليها عيوب.
بس الرد موجود هناك معلش مش هنا و انا قصدت كده عشان اللى يقرأ كلامه يكون ده الرد عليه
شكرا لكل الاعضاء اللى ردوا وجزاكم الله خيرا وياريت يا باشمهندس طارق تقولنا اخر سعر للنسر 1600 أتوماتيك العاديه مش الرياضيه وهل صحيح أن الخليجى منها ما ينفعش فيها غير بنزين 95 يعنى لو حطينلها 92أيه اللى هيحصل وهل سعر الخليجى يختلف عن المصرى وهل فيه فرق فى تقفيل العربيه فعلا زى ما البعض بيقول وجزاك الله وكل الاعضاء خيرا وشكرا ..