عايزة أفهم - دة طمع ولا طموح !

بسم الله الرحمن الرحيم : السلام عليكم و رحمة الله و بركاتة
حبيت أقولكم على حاجة مريت بيها غريبه جدا و الموضوع دة فيا أنا شخصيا و بالأخص فى الشغل

أولا أنا بحب مجالى بشكل مبالغ فيه و يمكن ناس كتيرة مستغربه لأنه لما بييجى سيرته بيحصل خناقة و ممكن توصل لزعل

ثانيا و دى مش عارفة كارثة ولا حاجة كويسة
لما باجى أشتغل بعمل مجهود جامد جدا عشان فى الأخر أقبض كتير
(مش عشان الفلوس لكن عشان حاجة هشرحهالكم دلوقتى)
لدرجة أننا فى شهرين وصلت لأننا أقبض 4 أضعاف مرتبى
أيوووووة محدش يستغرب
يعنى بمعنى أصح بقيس نجاحى بالمرتب
و على فكرة ناس كتيرة هتقولى عشان أنا بنت و التعامل مع البنات بيكون مختلف أحب أقولة لأ
أحنا لينا أرقام عضويات و بنقبض عليها مش بنقبض بأسامينا
الأغرب من كل دة أننا مش بصرف حاجة خالص من المرتب دة أساسا أنا بصرف من مصروفى إلا لو عايزة أروح أدفع تبرعات أو أحط فلوس فى أماكن معينه و الحمد لله يمكن ربنا كارمنى عشان فيه أطفال و ناس بتفرح أوى من حاجات بسيطة أوى ممكن بعملها

السؤال هنا
هل إلى أنا فيه دة
طموح لأنى أوصل لنجاح معين ؟ و هل قياس النجاح بالمرتب دة حاجة كويسة ولا تخلف منى ؟
ولا طمع منى ؟ بس لو طمع أنا أصلا مش بحتاج الفلوس دى خالص يبقى هطمع فى أننا أجمعهم ليه ؟

انا آسف

ولاكن

نهمان لا يشبعان طالب علم وطالب مال

السؤال اللي بيكرح نفسه هنا .. فين الشغل ده و هتلاقي حصان في قلب الشغل
بكلمك بجد والله بدل ما الواحد قاعد كده من غير شغل

و الاجتهاد في الشغل مش حاجه وحشه .. وانتي بتقولي انك مش بتحتاجي الفلوس يبقا اكيد مش طماعه

{ الْمَالُ وَالْبَنُونَ زِينَةُ الْحَيَاةِ الدُّنْيَا وَالْبَاقِيَاتُ الصَّالِحَاتُ خَيْرٌ عِنْدَ رَبِّكَ ثَوَاباً وَخَيْرٌ أَمَلاً }

دة كلام ربنا ... كلنا بنسعي لتحسين وضعنا الاجتماعي اكيد و دة مش عيب ... العيب اني بعد ما اجري ع الفلوس افضل اكنز فيها و ابخل علي نفسي و اهلي

اقتباس:

---

المشاركة الأصلية كتبت بواسطة MaNoLa

بسم الله الرحمن الرحيم : السلام عليكم و رحمة الله و بركاتة
حبيت أقولكم على حاجة مريت بيها غريبه جدا و الموضوع دة فيا أنا شخصيا و بالأخص فى الشغل

أولا أنا بحب مجالى بشكل مبالغ فيه و يمكن ناس كتيرة مستغربه لأنه لما بييجى سيرته بيحصل خناقة و ممكن توصل لزعل

ثانيا و دى مش عارفة كارثة ولا حاجة كويسة
لما باجى أشتغل بعمل مجهود جامد جدا عشان فى الأخر أقبض كتير

كونك رابطة الشغل الكتير بالفلوس، دة فى رأيى يتناقض مع حبك للشغل، لان اللى بيحب شغله مش بيبص للفلوس على انها مقياس، بيبص على الناتج النهائى وقد اية احساسه بالسعادة لما بيشوف ناتج ايدة قدامه زى مكان هو عاوز
(مش عشان الفلوس لكن عشان حاجة هشرحهالكم دلوقتى)
لدرجة أننا فى شهرين وصلت لأننا أقبض 4 أضعاف مرتبى
أيوووووة محدش يستغرب
يعنى بمعنى أصح بقيس نجاحى بالمرتب
و على فكرة ناس كتيرة هتقولى عشان أنا بنت و التعامل مع البنات بيكون مختلف أحب أقولة لأ
أحنا لينا أرقام عضويات و بنقبض عليها مش بنقبض بأسامينا
الأغرب من كل دة أننا مش بصرف حاجة خالص من المرتب دة أساسا أنا بصرف من مصروفى إلا لو عايزة أروح أدفع تبرعات أو أحط فلوس فى أماكن معينه و الحمد لله يمكن ربنا كارمنى عشان فيه أطفال و ناس بتفرح أوى من حاجات بسيطة أوى ممكن بعملها

السؤال هنا
هل إلى أنا فيه دة
طموح لأنى أوصل لنجاح معين ؟ و هل قياس النجاح بالمرتب دة حاجة كويسة ولا تخلف منى ؟
ولا طمع منى ؟ بس لو طمع أنا أصلا مش بحتاج الفلوس دى خالص يبقى هطمع فى أننا أجمعهم ليه ؟

ممكن يكون تحدى بين وبين نفسك على امر معين، انتى الوحيدة اللى تعرفيه

---

اى حد مكانك هيعمل كدا لو الاجتهاد فى الشغل يساوى فلوس اكتر هتلاقى عجله الانتاج بتعلى جامد ولكن ال بيحصل ذياده فى المجهود المرتب ثابت او بيقل علشان كدا بتلاقى العامل بينام ومش عايز يشتغل

انا زييك جدا - بقيس نجاحي بمرتبي وكل مايزيد.. ازعل اوي لو قل !!
بس فكرة المال ووجودة ويكون فائض معاك بتدي طمئنينة ليك كفرد انك معاك فلوس مش هتمد ايدك لحد في اى وقت
لكن لكل شىء حدود يعني الحمد لله موصلتش اني ابقي بخيل واخاف ع القرش واحرم نفسي
فيه اهتمام بالمال وفيه ادخار وبحوش وبحسبها كويس اوي وكل دا ضروري عشان في اى وقت اقدر اواجه اى ظروف
ماتقلقيش من نفسك انتي صح بس اوعي تخلي الفلوس هي اللي تمشيكي وتخليكي تستخسري في نفسك او في عائلتك

اولا حبك لشغلك دا شى كويس وياريت كل الناس تحب شغلها زيك بس انت لازم برده تحاولى متتعصبيش عشانه وتتخنقى لان التعصب فى كل شىء مرفوض

ثانيا انتى مش طماعه على ما اعتقد بس نظام الشغل عندك واضح انه ذكى جدا وبيدفع الناس للشغل فعلا و بيربط النجاح بالنتائج اللى بتترجم لفلوس ودا بيحسسك اد ايه انتى ناجحه
لكن اعتقد انغماسك فى الشغل والرغبه الغير طبيعيه فى تحقيق نجاح باهر بالشكل دا وتضييع وقتك كله او معظمه بيخفى وراه فشل فى باقى نواحى الحياة او فى كتير منها عشان كده انتى عايزه تثبتى لنفسك وللناس انك ناجحه (طبعا دا شعور داخلى ممكن تكونى مش حاسه فعليا)

انصحك بالاتى
1- اشتغلى كويس واجتهدى بس بدرجة تسمحلك بممارسة حياتك العاديه بدون متقصرى فيها
2-اعملى نشاط تانى اجتماعى او رياضى او سياسى حسب ميولك
3- اهتمى باسرتك وباولادك اللى هما ممكن يعانو بعد كده طول حياتهم بسبب غيابك عنهم

واخيرا انا بجد نفسي اعرف طريقة الشغل عندكو اللى بتوصل للتحفيز دا كله عشان انا فى مرحلة بناء شركة والنظام دا ممكن يفيدنى فى تحفيز الموظفين ( انا مش عايز اسم الشركة ولا مكانها ولا بتبيع ايه فقط الطريقة)

واتمنى دائما لكى السعادة والنجاح دائما

انا شايف انه عادي جداً او يمكن شايف كده لأني نفس حالتك !

امر طبيعى من منا لايحب المال فهو زينه كما قال ربنا سبحانه وتعالى خاصه كل ماجتهدتى زاد اجرك ده شىء طبيعى ان الواحد يلاقى دافع كده خاصه دافع مادى ولازم يبذل كل جهده
سؤاال تطفلى ماهو مجال حضرتك اللى بتتخانقى عشانه ده ياترى!!؟:d

مين اللي قال ان كدا يبقى طمع؟
طالما انه شغل شريف، ودخل حضرتك متناسب مع شغلك يبقى Fare enough

هو مش طموح --- ولا طمع

ده عادي
لكن -- احذري

بصى . الطبيعى فى الزمن ده إن كل واحد يجتهد لأن فعلا فرص الشغل الكويسة بتكون محتاجة منافسة شريفة طبعا و اجتهاد مابعده اجتهاد .

لكن ..
لو شغلك مأثر على حياتك الشخصية و أنتى حاطة اولوية كبرى له دون اى شىء اخر ينافسه فده مشكلة .
لأن الإنسان الطبيعى بيكون محتاج :-
-نجاح روحانى على مستوى الدين
-نجاح مع الأسرة و العلاقات الاجتماعية
-نجاح فى الشغل و الإنجاز الشخصى
-نجاح على مستوى الصحة و الرياضة البدنية و الذهنية.

لو فى دايرة منهم واخده حيز واسع هتعرفى انه مأثر على حاجات تانية .و من هنا لازم تظبطى وضعها. و ربنا يوفقك للخير

لكل مجتهد نصيب و ده نصيبك انتي بتتعبي و دي مكافئتك و ربنا يوفقك

الموضوع ببساطة ان كلنا بندور على السعادة .. على أي حاجه تبسطنا .. لو فكرتي في أي حاجه بنعملها فالغرض منها في الاخر الوصول للسعادة.

هو مش طمع ولا حاجه .. ربنا سبحانه و تعالى بيقول على الانسان " و انه لحب الخير لشديد" .. و بيقول سبحانه " و تحبون المال حبا جما" .. و المال في حد ذاته مش غايه .. هو وسيله عشان الواحد يعمل بيه الحاجات اللي تحقق له السعادة اللي هي هدفنا كلنا.

هو بس أحيانا بيكون فكرنا قاصر على حاجات معينة بتجيب السعادة .. الحاجات اللي احنا عارفينها .. قصة حب .. عربية .. شقة .. فسحة .. لكن ممكن تكون في حاجات تسبب لينا سعادة أكبر بس عشان احنا مجربنهاش قبل كده .. فمنعرفش انها ممكن تسبب لنا السعادة .. زي واحد عمره ما راح مدينة ملاهي مثلا .. عمره ما هييجي في تخيله ان في حاجه ممتعه ممكن تسبب له السعادة بالشكل ده .. لأنه عمره ما شافها ولا جربها.

ده حب للمال وليس حب للشغل
بصرف النظر بتعملي ايه بالفلوس في الاخر

مش عارف!! هو ممكن ميكونش طمع بس ممكن يكون ليه سبب ما نفسي أكتر ما هو مادي!!..
يعني محاولة مثلاً لأثبات الذات أو كطريقة للأحساس بالتقدير..
هو يمكن عندك نقطة الـ"Self-Actualization" دي مقترنة أكتر بالعائد المادي,, فكل ما تحققي عائد مادي أكبر كل ما هيحسسك بذاتك أو بمستوى أنجازك حتى لو أنت مش محتاجة العائد ده على المستوى المادي..
هو يمكن تكوني لسة في مقتبل حياتك المهنية فالموضوع بيبقى طبيعي لبعض الناس أنهم بينتظروا المردود المادي كالفلوس أو المعنوي كالمديح مثلاً أو الأتنين.. بس الطبيعي أن مع مرور الوقت بتوصلي لمرحلة الوضع بيختلف و مبيبقاش فارق تماماً الحاجات دي و بتبصيلها على أنها حاجات minor..
لكن في حالة لو فضل الموضوع ماشي بنفس الدرجة مع الوقت و مقلش يبقى كده أعتقد في مشكلة و محتاجة علاج نفسي..

اقتباس:

---

المشاركة الأصلية كتبت بواسطة احمد المصرى

اى حد مكانك هيعمل كدا لو الاجتهاد فى الشغل يساوى فلوس اكتر هتلاقى عجله الانتاج بتعلى جامد ولكن ال بيحصل ذياده فى المجهود المرتب ثابت او بيقل علشان كدا بتلاقى العامل بينام ومش عايز يشتغل

---

+1

هو مش طمع ولكن طموحك اوفر كتير
وربنا يوفقك

السؤال.. لو شغلك الزيادة ده ما عليهوش فلوس زيادة، هل برضه هاتبذلي نفس المجهود ؟؟

فيه ردود هنا محسساني اننا في المدينة الفاضلة !!!

من الاخر

استاذة manola

1- الشغل مش عيب

2- الاجتهاد في الشغل مش عيب

3- الاجتهاد حتى لو عشان فلوس مش عيب مادام شغل حلال و فلوس حلال

4- الاجتهاد عشان فلوس سواء محتاجها او مش محتاجها مش عيب

5- اهم حاجة ما تخليش الشغل يسرقك من بقية حياتك (السكينة تسرقك بالتعبير الشائع) ....... حتى لو ده حصل فبرضه مش عيب كل واحد حر في حياته و اولوياته ....... بس دي نصيحة مش اكتر ...... الشغل كويس و مهم بس بجانبه ما تنسيش الحياة الاجتماعية عشان ما يجيش وقت تحتاجي اهلك و صديقاتك - و مفيش حد ما بيحتاجش الناس جنبه في وقت من الاوقات - و ما تلاقيهمش


6- العيب الوحيد لو الشغل فيه شبهة شرعية او مش حلال او الفلوس مش حلال ....... او الاجتهاد في الشغل بزيادة بيخلي الواحد يقصر مع ربنا ..... او الست تقصر مع زوجها (و ليس العكس لان الراجل ممكن يضطر يقصر في البيت عشان يقدر يعيش مراته و عياله في مستوى كويس) ......... او نقصر مع اباءنا و امهاتنا و اخواتنا الخ الخ الخ ........


7- كان فيه رد بيقول لو مفيش مقابل مادي للعمل الاضافي كنتي هتعمليه و لا لأ ....... في الحالتين مش عيب ....... لو مش هتعمله فده طبيعة ..... احنا بنشتغل عشان فلوس في الاخر و لو الانسان عايز فلوس قدام الشغل الاضافي فده حقه و مش عيب نهائيا........ و لو هتعمله فاكيد برضه ربنا هيجازيها و لكل مجتهد نصيب (سواء هتتميز في شغلها او هتترقى بسرعة او هتلاقي مكان احسن بسبب سمعتها الخ الخ الخ) .......

طبيعي جدا ان الاقي مردود شغلي : فلوس - تقدير معنوي - تقدير ادبي

و الفلوس جزء من احساسي بقيمة العمل اللي بأديه و جزء من مقاييس النجاح

ربط حب الشغل و الإجتهاد فيه بالمرتب غير متاح فى كل الوظائف
بمعنى انى ممكن اكون شغال فى وظيفة مهما اجتهدت فيها بردوا هاخد نفس المرتب و ده حال ناس كتييير و لو هنربط الاجتهاد بالفلوس يبقى الناس دى عمرها ما هتجتهد ...

السؤال بقى اللى بيفرض نفسه لو انتى كنتى فى وظيفه من دول يا ترى كنتى هتحبى شغلك بردوا و تجتهدى فيه بنفس الشكل ؟