صندوق الاسعافات الاولية والمثاث العاكس

**sharyasn** · 15-07-2008 08:14 AM

السلام عليكم ورحمة الله
ياجماعة عاوزين نفتح الموضوع دة لانة فايدة لكل اعضاء المنتدى بعد تطبيق قانون المرور الجديد اعتبارا من 1-8-2008 واللى بيلزم كل سيارة بصندوق اسعافات ومثلث عاكس ياريت اللى اشتراهم يوضح لبقية اعضاء المنتدى منين جابهم وبكام عشان ما يضحكش علينا

**madawbs** · 15-07-2008 09:37 AM

فيه ناس زمايلى راحوا سألوا فى التوفيقية لقوا المثلث العاكس صينى وبلاستيك (القاعدة المفروض تكون حديد) والارتفاع بتاعه قليل حوالى 20 سنتيمتر - وغالبا المرور هايعترض عليه لان المطلوب تقريبا المفروض يكون 40 سنتيمتر على الاقل ب 30 جنيه (الحمد لله انا عندى واحد من الاول ومن الاصلى كمان)

بالنسبة لحقيبة الاسعافات الاولية برضه بتتباع فى التوفيقية وفيه منها 3 احجام واحدة منهم اظن ب 50 جنيه وكل الى فيها شوية ميكروكروم على شاش وقطن ولاصق طبى ابو الخمسة بربع جنيه واسبرين ومطهر دى الديتول وكل الحاجات دى ماتعملش 10 جنيه من اى صيدلية واى شنطة من بتوع عروض الصابون والشامبو ام سوستة هاتبقى هايلة يتحطوا فيها.

**Ahmad Allawy** · 15-07-2008 09:59 AM

الف شكر يا جماعه علي الموضوع ده..
موضوع مهم.. و ناس كتير اكيد مكانتش تعرف عن الجزء ده ف القانون..
انا عن نفسي مكانتش اعرف غير منكم دلوقتي.
جزاكم الله خيرا..