رفايع رفايع ... عندي شوية مشاكل رفيعة

**Greeko** · 03-12-2012 09:09 PM

بسم الله الرحمن الرحيم
مساء الفل والياسمين علي أحلي أعضاء سهرانين ( بيت شعر عالسريع )
إبيزتي الحلوة فيها شوية مشاكل رفيعة كده .. الحمد لله الحوارات التخينة خلصت كلها ما عدا واحدة هيتم ذكرها في نهاية الموضوع .. الرفايع هسردها في نقاط ومعلش هما كتير شوية :
1. فانوس الشبورة اليمين بيدخله مية مش عارف ازاي
2. كان في صوت صفارة كده في أول دوسة البنزين .. غيرت بلية شداد الدينامو وراح مده بس رجع تاني علي بسيط
3.الفريم المربع اللي فيه الكاسيت والتكييف فيه حتت كتير اتكسرت وبقي بيعمل دوشة فكنت عاوز أجيب واحد سليم و الحرفيين كلهم بيقولو لازم تشتري التابلوه علي بعضه وده حرااام يعني .. محدش يعرف بيتباع فين وعامله كلم ؟؟
4. لما أمشي علي أسفلت خشن أو ارض فيها طوب السقف بيزن بطريقة مزعجة جدا جدا زي ما يكون فيه زلط
5. لما العربية تتغسل بلاقي تسريب مياه علي الدواسة اللي جمب السائق .. تقريبا بتيجي من ورا درج التخزين .. برضو دي مش عارف علاجها
6.الفتيس زي ما يكون سايب يعني لما احركه وانا ممور بيكون مش ثابت خالص .. ومن عند الغيار التاني لما أزود بنزين بيترعش كده ويزن
7. كرسي السواق بيزيق مع أقل حركة .. واحد نصحني بإسبراي اسمه WD 40 .. بس هل برش علي مجري الكرسي بس ولا في خطوات تانية ؟؟
أما المشكلة التخينة (كان العضو المحترم misoalex حاول يحلها معايا)هي لما أحود شمال بالدركسيون بيطلع صوت تزييق وسيد عبده قالي مفيش حاجة وطبعا ده كلام مش منطقي بقيت حاسس ان مش عاوز يوجع دماغه .. برضو مش عارف سببه
بس يا شباب وأسف بشدة علي الإطالة
مستني مشاركاتكم

**magic girl** · 03-12-2012 11:32 PM

مساء الفل..

انا طبعاً ماعرفش معظم الحاجات دي, بس الحاجة اللي حصلت ليا في المشاكل دي كانت حودة الدريكسيون مع وجود تزييق أو زي صوت صفارة كده.. راح الصوت ده لما ظبط الزوايا و غيرت بارات الدريكسيون "بتبقى مسئولة عن نقل الحركة من الدريكسيون للعجل"

فممكن و الله أعلم تكون هيا السبب..

**SYD** · 04-12-2012 12:23 AM

صباح الفل يا سيد الكل (ردا علي بيت الشعر)

انت متأكد ان عربيتك دي موديل 2002 ؟؟؟
أصل كل مشاكلك الرفيعة دي - هي نفس بالظبط المشاكل الظاهرية بتاعة الأبيزا 94-99

بص يا سيدي - بسم الله
1- الشبورة : هتحاول تفك الفانوس وتطلعه برة (بهدوء علشان مايتكسرش والباغة بتاعته مش بتتباع فهتدوخ عليها شوية) هتحاول تنظفه وتشوف لو فيه شرخ وتقفله بالأمير او اي مادة لاصقة

2- الفريم البلاستيك : عوضك علي الله - مش بيتباع لوحده - يا طابلوه يا تتأقلم معاه زي معظمنا

3- المياة من عند الدواسة اليمين - بحثت حولها كتير واغلب الظن انها بتدخل من ناحية الطوربيدو او ثلاجة التكييف بالزات لما تغسل العربية بالمياة - ناس شكت انها من الزجاج - بس انا اعتقد بنسبة كبيرة انها من ناحية الطوربيدو - والله اعلم

4- السقف اللي بيزن : دة بسبب خوص السقف من تحت الفرش - عايز يتفك عند سروجي محترم وتحاول تثبت الخوص المفكوكة - وفعلا بتبان معاك لو الأسفلت مخربش وانت مديها الثاني وبتقرص عليه

5- الفتيس : دة حشو عصاية - الحشو علي جزئين - جزء بيركب من جوة الصالون والجزء الثاني بيمسك العصاية نفسها في التيش والصليبة بتاعتها من تحت - هتجيب الطقم كامل ب 75 جنيه جديد وتركبه عند حد بتاع فتايس هتلاقي العربية رجعت جديدة بأمر الله.

6- صفارة بلية الشداد : متهيألي والله اعلم ان البلية مضروبة وودعت قوام قوام - هتغير تاني ببلية محترمة - هات البلية القديمة لو عندك وانزل هاتها بالرقم من حد بتاع بلي ماركة SKF او من توكيلها في وسط البلد وهتغيرها مكان البلية الخشنة.

7- اما عن التزييق ناحية الشمال - تشيك علي الأسكاترا وخراطيم الباور (الكبس والراجع) وشوف فعلا البارات وبيض المقص زي الأخت ماجيك ما قالت لحضرتك

والله المستعان
،
،

**SYD** · 04-12-2012 12:26 AM

نسيت قولك علي الكرسي
دي حاجة اسمها العضاضة بتاعة الكرسي - هتلاقيها مفكوكة - حاول تركبها عند نفس السروجي اللي هتعمل عنده السقف او بردو تتأقلم معاها زينا

والله المستعان
،
،

**SYD** · 04-12-2012 03:03 AM

يا صاحبي مانا عارف انها 2002 انا بهذر طبعا
بس للأسف المشاكل اللي عندك متكررة جدا في موديلات 94 - 99 بس يبدو انها ممتدة لحد كمان 2002 ودة لأن العربيتين متشابهتين لحد كبير وبيعتبروا فيس ليفت فقط من الأصل 94

تحياتي