الموضوع: ما هى أفضل أنواع الأجهزه الكهربائيه المنزليه؟

الف مبروك يا باشا وربنا معاك بص افضل اماكن تشترى منها من وجهة نظرى كارفور وسبينس وده علشان كذا ميزا
أولا : عندهم ميزة استرجاع الاجهزه خلال 15 يوم بدون إبداء اى اسباب يعنى لو حتى سليمه يعنى لو الجاهز استعماله معجبكش بترجعه وده انا جربته .
ثانياً : توصيل الاجهزه للبيت مجانا بدون اى مصاريف وده ابتداءً من التلفزيون ال 29 بوصه .
ثالثا: بيعملوا عروض بتكون ممتازه جدا وفعلا تخفيضات حقيقيه مش اى كلام .
رابعا : الحاجه مضمونه يعنى مش ملعوب فيها يعنى شارع عبد العزيز ممكن يكون جهاز بايظ وهما مصلحينه ويبيعوه على اسا انه جديد ولا اى حد بيعرف .
خامساً : البياع اللى واقف مش مصلحته انه يدبسك فى حاجه معينه يعنى بيعرض بكل أمانه (فى الغالب طبعا)
سادساً : معظم أنواع الاجهزه عندهم بكل ماركاتها .
علشان كده صدقنى افضل مكان تشترى منه كارفور وسبينس وانا عملت كده واشتريت من ده وده وفى الغالب كانت عروض
أما بالنسبه للأنواع أنصحك انك تبعد عن اى حاجه مصرى أو صينى أو حتى تقفيل مصرى لأنها فى الغالب هباب واكتر حاجه تركز على أنها تكون نوع حلو الثلاجه والغساله لكن البوتجاز يعتبر فى الغالب كله واحد (الغساله فى واحده اتوماتيك نوعها زانوسى بس تقفيل اتحاد اروبى فعلا ممتازه واحسن من الزانوسى التقفيل المصرى) والثلاجه كان فى واحد بيكلمنى على ماركه مش فاكر ايه قالى انها ايطالى والسخان عندك اريستون ممتاز سواء كهرباء او غاز وكمان عندك سخان المصانع الحربيه س 10 ممتاااااااااز لأقصى مدى لأنه المانى وعندك التلفزيونات كلها تعتبر مكونات واحده بفروق بسيطه
ربنا معاك ولو عايز اى مساعده انا اطحنت فى المواضيع المهببه دى

مش هقدر افيدك فى الماركات قوى بس اخويا هيتجوز بعد اسبوعين و بعد لف كتير (معرفش استقر على ماركات ايه) بس راح اشترى من مركاتو اللى عند اول عباس العقاد لانه زىه زى سبينيس و كارفور (فى مشاركه مفصله بالمميزات فوق) و لقى احسن سعر هناك على كلامه (راح كارفور و شارع عبدالعزيز و القاهره للمبيعات و كذا مكان تانى)

بلاش ميكرويف لانك مش هتستخدمه الا فى تسييح الحاجه المجمده او التسخين السريع لكن العملى جدا الفرن الكهربائى و احسن حاجه الصناعه التركى وفيه منه كذا مركه بس اوعى الصينى

انا في نفس الحيرة دي.. لاني هاشتري التلاجة والبوتاجاز في الجهاااز...