شاركونى التفكير فى هذا الموضوع ارجوكم جميعا

السلام عليكم يارجالة دلوقتى انا معايا لانوس 1موديل 99عاملة 105.000كيلو و الحمدلله العربية جميلة ومش بتكلفنى غير الصييانات بتعيتها و الحمدلله اصيلة جدا معايا المهم ظهرت فى حياتى عربية شيفورلية اوبترا بتاعت احد جيرانى عاملة 50.000كيلو فابريكة برة وجوه وحالتها ممتازة وهو بيتكلم فى 65.000 فايه رائيكم ابيع عربيتى وازود (بس حازنق نفسى) واخد الاوبترا ولا اخلينى فى عربيتى مع الوضع فى الاعتبار حاجتين مهمين (اولا:ان عربيتى حتبتدى تعجز شوية وممكن دلوقتى تجيب فلوس ثانيا :هل حال البلد يسمح بالموضوع ده ولا ايه) ارجوكم شاركونى التفكير ومحدش يبخل عليه برائيه عشان اوصل للقرار الصح الله يخليكم ولكم جميعا جزيل الشكر

يااااه كل دول شافو الموضوع ومحدش عنده اى رأى يقولهولى

وعليكم السلام ورحمه الله وبركاته
اكيد هيبقى فى فرق كبير فى التغير ده اهم حاجه موديل الاوبترا كام والحاله العامه للعربيه واكيد انت اكتر واحد ادرى بظروفك لو مش هتنزق نفسك يبقى توكل على الله وربنا يباركلك فيها ويكفيك شرها اللهم امين

اكشف عليها في التوكيل و لو قال تمام توكل على الله

أنا واقع زيك فى نفس الحيرة دى بس انا عندى فيرنا وفى فوق العشرة عايزين يشتروها منى العربية الحمد الله زى الفل معايا من 2004 عاملة 117000 كيلو وبفكر ابيعها خايف تفتح بقها فعلا موقف يحير خايف ابيعها واجيب واحده تانية مستعملة تطلع عينى وخصوصا انى مش مقتنع انى ابدل الفيرنا بلوجان او ساجا الى فى حدود الميزانية بتاعتى بس شكلى كده حخلى الفيرنا وخلاص

ياباشا عربيه حضرتك لو سليمة وانت ايدك فيها على طول ومتبع صيانتها على طول يبقى ليه بقى تنزق نفسك ما لهاش اى لزمة خاصا ون التغيير مش هيفرق اوى يعنى فى الشكل مش الى يستاهل ان الواحد يزنق على نفسه ، وبعدين ما فيش حاجة اسمها عربيتك هتبدا تعجز ازاى وانت بتقول انك على طول صيانتها بمواعيد وبتعمل كل حاجة تظهر فيها عمرها ما تعجز ابدا ، انا ممكن اخد الخطوة ده لو النقله الى هنقلها كبيرة يعنى تبيع الانوس 1 ده لو فى امكانيات والموضوع من وسع وانك مثلا تنزل منها تجيب حاجة المانى ولا حاجة زي الجولف مثلا موديل اعلى او لو هتجيب حاجة زيرو ده لو نا مكانك كنت هعمل كده .


لكن لو انت عايز راى ومش فارق معاك حته نوع وبلد العربية وهتنزق نفسك وتشترى عربية برده اسمها مستمعلة بــ 65 الف لأ نزقه بنزقه بقى وروح هات فيرنا زيرو 70000 او تزيد الفين ولا حاجة وتكون زيرو وموديل السنة وارخص واوفر من عربيه جارك وقطع غيارها عند البقال وببلاش وسهله واى ميكانيكي بيشتغل فيها وعربية بيعاه فى السوق بطرية مش طبيبعه ، على عكس الشيفروليه تماما .

الوحيد الى يقدر يحدد مدى النزقه المالية الى هتكون فيها هو حضرتك وبناءا عليه انت الى هتاخد القرار .

انا رأيي أن حضرتك ماتبعش دلوقتي واستني شوية كده وهات حاجة زيرو افضل كتير.........
وماتقلقش اللانوس ماسكها نفسها في السعر وعمرك ماهتخسر فيها ولا تعجز معاك حتي ولو بعد 10سنين

بص ياباشا الدنيا كلها بتزنق نفسها وده مش عيب بس العيب انك تزنق نفسك بي الحرام انك تجيب قرض او ماشبه ذلك الهم انتا لو زنقت نفسك هيبقا اسمك بقا معاك مبلغ محترم المه انا شايف انك تنزل من دايو تركب شيفروليه اوبترا في مش خطوة حلوة يعني تنزل من كوري لي كوري هيا هيا الدايو النوبيرا بس مع تغير الاسم والشكل وشايف انها ماتستهلش يدفع فيها فلوس المهم انا لو منك بي المبلغ ده افكر
اجيب نيسان صني يباني وعربية محترمة ثبات وسرعه وفرامل وتوفير بنزين وكل شيئ
او متسوبيشي لانسر موديل 2004 الي 2005
او تبحث عن الكيا سيراتو 1 تكون حالة
لكن الاوبترا منصحكش بيها

اقتباس:

---

المشاركة الأصلية كتبت بواسطة abo rodina

انا رأيي أن حضرتك ماتبعش دلوقتي واستني شوية كده وهات حاجة زيرو افضل كتير.........
وماتقلقش اللانوس ماسكها نفسها في السعر وعمرك ماهتخسر فيها ولا تعجز معاك حتي ولو بعد 10سنين

---

انا مع الكلام دة

اقتباس:

---

المشاركة الأصلية كتبت بواسطة zaza2002

يااااه كل دول شافو الموضوع ومحدش عنده اى رأى يقولهولى

---

لا تتعجل لان احوال البلد غير مستقرة والاوبترا مش هى العربيه اللى تزنق نفسك علشان تشتريه.
تحياتى ادم

اشكركم جميعا على مشاراكتم وانا قررت انى اخلينى فى عربتى والحمدلله لحد ماظروف البلد تتحسن( الله اعلم امتى) ولو انى اختلف فقط فى الرأى مع اللى قال انى الاوبتر لا تعتبر تغير بعد اللانوس لانى ارى ان الاوبترا موتور اقوى تكيف اقوى صالون اوسع واشيك بكتير لانى ركبتها وحسيت بالفرق الكبير بينها وبين اللانوس وعموما لو اتفقت الاراء لبارت السلع وبكرر شكرى ليكم اخوانى لانكم وصلتونى للقرار الاصح وربنا يديم المعروف

اقتباس:

---

المشاركة الأصلية كتبت بواسطة zaza2002

اشكركم جميعا على مشاراكتم وانا قررت انى اخلينى فى عربتى والحمدلله لحد ماظروف البلد تتحسن( الله اعلم امتى) ولو انى اختلف فقط فى الرأى مع اللى قال انى الاوبتر لا تعتبر تغير بعد اللانوس لانى ارى ان الاوبترا موتور اقوى تكيف اقوى صالون اوسع واشيك بكتير لانى ركبتها وحسيت بالفرق الكبير بينها وبين اللانوس وعموما لو اتفقت الاراء لبارت السلع وبكرر شكرى ليكم اخوانى لانكم وصلتونى للقرار الاصح وربنا يديم المعروف

---

اعتقد انة قرار صائب و بلا ندم ياباشا و بشهادة كثيرين الاوبترا موش واوو
انا كنت واقع فى نفس الحيرة بالضبط مع فرق بسيط انة عربيتى كانت عاوزة شوية شغل يعنى دوكو و طقم صبابات و لكن قررت الاحتفاظ بها فى الوقت الحالى لحد ماظروف البلد تتحسن