للإفادة: تفاصيل تجديد رخصة قيادة بمرور العجوزة..
السلام عليكم ورحمة الله وبركاته..
بعد استفساري بالموضوع ده:
http://www.nilemotors.net/Nile/321374-a.html
ذهبت يوم الخميس 5-12-2012 لتجديد رخصة القيادة بتاعتي وإليكم الخطوات والتفاصيل..
1- صحيت عالساعة 11 نزلت على شارع السودان اتصورت 6 صور فورية بـ15 جنيه
2- رحت على مركز طبي جنب المصوراتي عملت شهادتين باطنة ونظر بـ50 جنيه وتم ارفاق الصور بيهم + الختم نص على الصورة ونص على الورقة
(وبصراحة حسيت باستياء شديد من المركز حيث تم عمل الشهادات بدون توقيع كشف وبدون ما اشوف الدكتور أساسا!!)
3- رحت على مرور العجوزة دخلت الأول على كشك التصوير صورت البطاقة والرخصة صورتين قلت أكيد هايحتاجوهم جوة + اشتريت ملف ودمغات ودفعت 3 جنيه
4- طلعت على نيابة المرور جبت شهادة مخالفات ودفعت 5 جنيه فقط لأن مفيش مخالفات
5- دخلت على شباك تجديد رخص القيادة - الموظفة خدت مني الشهادات والملف والدمغات والرخصة المنتهية والبطاقة وادتني تقدير رسوم عشان ادفعه في الخزنة
6- رحت الخزنة دفعت 57 جنيه وأخدت إيصال + نموذج + دمغات تانية
7- مليت النموذج ورجعت بيه تاني على شباك التجديد للموظفة أخدتهم وقامت بتجهيز بعض الأوراق وقالتلى روح على غرفة التصوير
8- رحت على غرفة التصوير واستنيت العسكري يجيب الملف بتاعي عشان اتصور - شوية واتصورت وطبعوا الرخصة وانتظرتها تتغلف بعدين استلمتها هي والبطاقة ومشيت
كده إجمالي التكاليف 130 جنيه بالتمام والكمال..
الكلام ده كله خلص الساعة 1 تقريبا مع العلم اني صاحي الساعة 11 وجاي من الهرم
يعني لبست ونزلت واتصورت وعملت شهادات ورحت المرور وخلصت كل الإجراءات في ساعتين بس..
الحمد لله الدنيا كانت لطيفة والإجراءات كانت ماشية بشكل منظم وسريع ومحدش طلب مني أي فلوس أو خلافة..
ورغم ان الرخصة طلع فيها غلطة خدت بالي منها أول ما استلمتها لكن رجعت على طول للي طبعها وتم تغيرها بواحدة جديدة وانا واقف بدون اي رسوم..
إليكم صورة بقا م الغلطة الشنيعة ههههههههه
http://nileup.com/up/uploads/nilemotors_13548412121.jpg
