ما الفرق بين التو 2006-2007 والالتو 2008-2009

**mostafa_wahid** · 07-12-2012 05:13 AM

لو سمحتوا انا بفكر اشترى عربية التو ... وقدامى واحدة موديل 2007 وسيارة التو تانية موديل 2008 ... الاختلاف اللى لاحظتوا كان فى شكل العربية من قدام (الفوانيس والكبوت والاكصدام تقريبا) ,فكنت عاوز اعرف هوة دة بس الفرق بينهم ولا فى فروق تانية فى الموتور وميكانيكا العربية نفسها ,ومعلش حتعبكوا معايا انهى موديل فيهم قطع الغيار بتاعتوا متوفره اكتر وكمان انهى موديل فيهم احسن ومشاكلوا قليلة .... شكرا واسف للاطالة

**Amr Axel** · 07-12-2012 01:31 PM

موديل 2007 مختلف من قدام فعلا الكبوت و اكصدام و فوانيس و من الشنطة و الفوانيس ورا و موتور 1000 سي سي لكن للأسف الموديل ده منتشرش اوي و قطع غياره مش اوي
اما موديل 2008-2009 800 سي سي و اللي نزل تاني موديل 2013 بتعديلات بسيطة في الصالون و هنزل موضوع ان شاء الله عن الفرق بين الاتنين مدعم بالصور
العربية 2008-2009 او 2013 ما شاء الله منتشرة و قطع غيارها متوافرة في محلات زي اكرم حمدي في دمشق و كذا محل هناك تاني بس مش فاكر اسمهم بصراحة و سوزوكي سنتر في التوفيقية و ليدرز في الدقي ش ايران و فيه محلات تانية كتيير لسوزوكي فيها القطع بس دول اشهرهم و اغلبنا بيتعامل معاهم لأن قطعهم نضيفة

العربية معايا و هي ما شاء الله كويسة اهم حاجة تحافظ ع الصيانات الدورية

و اول ما تجيب العربية اعمل صيانة وقائية زي سير الكاتينة و بلية الكاتينة - فلتر بنزين و الهوا لو محتاج - حط منظف انجيشكن و ممكن تنضف البوابة ثم غير زيت الموتور و زيت الفتيس و غير طقم البوجهيات و بص ع التيل و مية الريداتير و زيت الفرامل لو محتاجين تغيير

العربية المفروض نازل معاها بجانب الاستبن كوريك اللي عامل زي السمبوكسة او بيسموه العفريتة و معاه مفتاحين مفتاح لصواميل العجل و مفتاح عشان الكوريك و طبعا دليل المستخدم

و اتمني الموضوع ده يفيدك

تعالوا نعرف نعمل ايه لما نيجي نستلم عربية جديدة او مستعملة
http://www.nilemotors.net/Nile/244408-a.html

و هننتظر تقرير من حضرتك عن شراء العربية و انطباعك عنها برده :)

**Amr Axel** · 11-12-2012 12:47 AM

أيوة يا باشا يركبلها لأن نازل منها فئة فيها تكييف و لو بصيت في الحوض هتلاقي مكان الطنبورة بتاعت سير التكييف راكبة و مكان الفتحة اللي يوصل للتلاجة
لو اشتريت من برة غالبا هتجيب ساندن و التكلفة ممكن تدخل في 3000-3500 ج بكل حاجة
فالأفضل لو التوكيل لسه بيركب تركبه هناك لأن طبعا هتركب الاصلي اللي بينزل مع العربية و مناسب ليها و كمان هم حافظين العربية مش صنايعي لسه هيجرب و التكلفة لما سالت عليها من 4 سنين كانت حوالي 4000 ج يعني 500 ج زيادة بس اضمن فممكن تسال و تشوف