لسه بتعلم القيادة جديد ومحتاج مشوراتكم

**uhlphp** · 15-07-2008 09:34 PM

انا لسه بتعلم القيادة جديد وكنت محتاج اعرف بعض الحاجات
1 - بما انى لسة جديد ساعات العربية بتبطل منى ومش عارف اتعود على موضوع الدبرياج والبنزين ولو ورايا حد يفضل يزمر وده بخلينى ارتبك
2 - وانا ماشى الاقى العربية تروح يمين وشمال بدرجة صغيرة هل انا السبب ام عدم استواء الطريق يودى الى انحراف السيارة يمين وشمال بدرجة
3 - لا استطيع ان احدد بعد المسافة بينى وبين السيارات القادمة خلفى من خلال المراية الوسطى او الشمال وخاصة بالليل
4 - اشعر بخوف واحساس دائم انى هاخبط سيارة من السيارات على الطريق
وارجو نصائحكم لانى ساعات بحس انى مش هاعرف اتعلم القيادة وانى مش قادر اركز فى كل الحركات مرة واحدة مع بعض
واشكر كل من يبدى نصيحة او راى

**amlolo** · 15-07-2008 10:03 PM

انا زيك تقريبا بس انا مشكلة العربيات الي وراك متشلش همها لأ ن لو لا قدر الله وخبطك حيبقي هو الغلطان على العموم انا كان الحل الأمثل لي هو القيادة البطيئة ونقدر نقول المملة جدا واهم من كل حاجه ستر ربنا فالمتابع للقيادة في اي طريق حيلاقي عشرات الحوادث اللي ممكن تحصل لولا ان ربنا بيسترها مع الناس علشان احنا شعب غلبان

**MoToRiZeR** · 16-07-2008 05:25 AM

انا هقولك حاجة .. انا اما كنت بتعلم السواقة قلت السواقة دي قدرات و انا مش بتاع سواقة و عمري ما هعرف اسوق .. دي كان احساس داخلي جوايا لأني مكنتش عارف اتابع الطريق و المرايات و الدواسات و النقلات و و !!

و لكن دلوقت الحمد لله .. كل ده راح بالممارسة .. فا شيل الأوهام دي من دماغك

بالنسبة لموضوع الفصل بين البنزين و الدبرياج ده عادي جدا .. بس أهم حاجة اتدرب عليه كتير .. و يا ريت تروح مكان فاضي و تقعد تقف و تمشي بالعربية كتير .. زي الشيخ زايد مثلا .. خلي حد بيعرف يسوق كويس ييجي معاك و يسوقلك لحد هناك بعد كدة انت عيش .. و اما تحس انك بقيت متمكن نوعا ما .. روح سوق في البلد تحت بس اختار اوقات مش زحمة و امشي عاليمين .. و متاخدش في بالك من اللي بيزمر متخليهوش يربكك .. حتي لو بصلك او زعق او عمل ايه .. سيبك منه و ركز في العربية .. و اما تركب مع حد بيسوق ركز في اللي هوا بيعمله و اتعلم منه

2- العربية ساعات بتتحرك بدرجة صغيرة و ليها اسباب زي اتجاه الهوا .. عدم استواء الطريق .. ضغط الهوا مش مزبوط داخل الاطارات ... خليك صاحي للعربية دايما و ازبط في خط مستقيم

3- دي هتيجي بالممارسة ..

4- متخافش ابدا زي ما قلتلك كلها شهر بالكتير و تبقي زي الفل
بس يا ريت تلتزم بقواعد المرور و السرعات و متتهورش اما تتقن القيادة :) حفاظاَ علي سلامتك و علي سلامة الناس الأخري علي الطريق

اخوك محمود

**ara** · 16-07-2008 12:22 PM

انا كمان جديدة فى السواقة و كنت بقلق أحيانا... بس عملت زى اللى موتورايزر قايل عليه باخد العربية و أقعد ألف فى زايد فى حتت فاضية و أمشى بالراحة اعلى حاجة 30 أو 40 مبزاودش عن كده.
إفضل إتمرن على إنك تزود و تبطىء وقف العربيه خالص وهيا دايرة و إطلع تانى على الأول كده يعنى... الحكاية ديه زبطت معايا الدبرياج و البنزين إلى حد كبير :)
و الحمد لله إبتديت أعمل مشاوير صغيرة كدة و ربنا يسهل و يسلم طريقنا جميعا :)

**AhmedElsayed** · 16-07-2008 12:49 PM

كلها شهر ولا اتنين بالكتير اوى وحتنسي كل الكلام ده خالص وحتلاقى نفسك بتعمل الحركات من غير متركز فيها اصلا

اهم حاجة انزل الصبح بدرى قبل الزحمة وروح فى الاوقات اللى الدنيا بتبقى رايقة شوية
انا مثلا كنت بركب كوبرى اكتوبر بدل النفق رغم ان النفق اقرب بالنسبة لى
علشان الكوبرى كان دايميا بيبقى زحمة ومش محتاج يوترنات وحاجات كانت صعبة
وبعد شوية حتلاقى كل ده اتحل المهم متهتمش باللى وراك يعنى هما مولودين بيسوقوا

**uhlphp** · 16-07-2008 05:27 PM

الاخ محمود وجميع الاخوة انا متشكر لكم جداً انا فعلاً لما قراءت ما كتب حسيت انى اطمنت كتير لانى كنت بحس انى مش عارف اتعلم ومش قدار اركز .
الف الف شكر لكم جميعاً