الموضوع: تحذير من ال baby view mirrors للاناث بالذات

أول حاجة لازم أذكرها في الموضوع:
مراجعة كدة علي القوانين الأساسية (أو بديهيات) الانعكاس للمرايات.
هل تعلم انك لو مظبط مراية مثلا بحيث انك لو بصيت فيها تشوف عين شخص معين انه لو بص برضه حايشوف عينك؟ لو مش مقتنع سيبك بقي من زوايا الانعكاس ووجع الدماغ ده.. جربها مع واحد صاحبك في مراية صالون العربية مثلا. تمام؟
النقطة التانية.. انك لو بصيت علي واحد بنفس طولك تقريبا من مراية ما وشايف مثلا بطنه انه لو باصص عليك من نفس المستوي الأفقي حايشوف برضه بطنك.. برضه جربها واتأكد.. تمام تاني نقطة؟

ندخل بقي في المهم.
لاحظت في آخر سنتين ولا حاجة انتشار غريب وغير مبرر لموضوع ال baby view mirrors في المشاريع والتاكسيات.. أيام زمان كان التاكسي بيستخدمها عشان يراقب بيها الزبون ورا بيعمل حاجة مش مظبوطة بيكتبله علي الكراسي كدة.. دلوقتي كترت زيادة عن اللازم وتلاقي السواق حاطط يمكن 10 الي 12 مراية.

في مرة وانا راكب ف مشروع (بتوع القاهرة بيسموه ميكروباص تقريبا) أنا متعود آخد الكرسيين اللي قدام جنب السواق بس المرة دي مالحقتش أقول خالص قدام لقيت واحدة هوب نطت جنب الباب وحشرتني بينها وبين السواق (وطبعا كان عيب قوي أقولها تنزل) فا قلت أستحمل وأمري لله.. المهم طول ماحنا ماشيين السواق عينه ع المرايات أكتر ما عينه ع الطريق أساسا لدرجة اني حسيت ان فيه حد بيجري وراه وحانقلبها فيلم هندي.. لغاية ما بنت الحلال نزلت لقيته عينه تاني ع السكة.. قلت أشوف ايه المرايات اللي مخلياه عينه عليها أوي كدة لقيت ولا 10 مرايات baby view mirrors كلها متنشنة عليا (في وضعي الجديد بعد ما هي نزلت بقيت أنا اللي جنب الباب) بقيت وانا باصص في المرايات كاشف جميع تفاصيل جسم السواق حرفيا.. معني كدة انه وهو باصص برضه يبقي كاشف تفاصيل جسم اللي قاعد جنب الباب. قلت يمكن صدفة وهو مش مظبط المرايات!! بس لو مش مظبطها ايه اللي مخليه كان باصص فيها أوي كدة طول ما الموزموزيل كانت قاعدة؟
حاولت أقارن الموضوع في كذا ميكروباص أو تاكسي (بس في التاكسيات أقل بكتير) لقيت ان الموضوع هو هو.. برضه ال baby view mirrors كلها متسلطة عليا من جميع الاتجاهات!!!

معني كدة ان الناس دي بتسئ استخدام المرايات دي في اشباع غرائز شخصية.. وبيستغل مهنته ووسيلة أكل عيشه برضه لنفس السبب.. مابقتش متخيل ازاي الناس بقت قابلة علي نفسها تتفرج علي بنت كل ذنبها ان ماعندهاش عربية خاصة بيها توصلها أو من كتر الزحمة والتعب ركبت في أقرب مكان لقيته حتي لو كان جنب السواق.. وللأسف كتير منهم علي نياتهم بيحسبو دايما ان الدنيا بخير وماعندهمش ادراك لدرجة الوساخة اللي ممكن بعض الناس توصلها.

المهم ان دا تحذير لكل واحدة ولكل واحد عنده اخت / زوجة / ام / ابنة بتركب ميكروباصات أو تاكسي كتير.. ياريت كل واحدة تاخد بالها من الكلام ده. ياريت برضه كل واحدة تاخد بالها وهي في أي موقف ان سواقين بعض الميكروباصات بيرفضو يركبو حد في الكرسي الأمامي (حتي لو واحد عاوز ياخد المكانين تلاقي السواق يقوله "خالص") وأول ما يلاقي شابة يفتحلها الباب قدام ويقعدها لوحدها حتي لو دفعت نفر واحد.. ماتخليش واحد زي ده ياخد مراده وخليكي دايما مصرة علي الركوب في الخلف.

كمان كا نوع من الايجابية عاوز أعرف طريقة أقدم بيها شكوي رسمية للجهات المختصة من الموضوع ده.. يعني المفروض علي أقل تقدير يتم حد المرايات دي الي مراية واحدة فقط وأي زيادات تعتبر عائق للرؤية (زيها زي الفاميه)..

وياريت النشر للافادة حتي بدون نقل أو ذكر اسماء.

المشاركة الأصلية كتبت بواسطة moh_faheem

جزاك الله عنا خير
وجعله الله فى ميزان حسناتك

آمين يا رب

المشاركة الأصلية كتبت بواسطة elawany13

للأسف القرش الحلال اللى بيكسبه بيلغوصه فى الحرام
وعلشان كده مفيش بركة

والغريبة تلاقيه مشغل قرآن يقولك "عشان ربنا يبارك" وتلاقيه أساسا مش فاهم نص اللي بيتقال (مع اشد الاحترام طبعا لبعض المثقفين منهم)

المشاركة الأصلية كتبت بواسطة sehsss

ربنا يبارك فيك

ربنا يخليك

المشاركة الأصلية كتبت بواسطة s o p h o s

بصراحة موضوع مهم
جزاك الله خيرا ..

ألف شكر

المشاركة الأصلية كتبت بواسطة mem

بارك الله فيك
وجزاك الله كل خير

ألف شكر

المشاركة الأصلية كتبت بواسطة graffittiii

طيب هي لو عدت من المواصلات هتعمل إيه في الشارع ... ماهو التحرش في كل شبر ...

موضوع جميل جدا جزاك الله خيرا عليه ...

ولكن كان ممكن النقاش فيه لو كنا في سنة 1980 م ...

النهاردة المصريين أتعودو علي الحجات دي بصرف النظر يعني عن الــ 400 مواطن المحترمين اللي في البلد ...

الحجات دي توارثتها الأجيال ومعدش الكلام فيها بيؤدي لنتيجة للأسف ...

هههههههههه لا وتلاقي عيال صايعة عندهم مبادئ .. ( زي اللي يقولك لو ماشيه مع مامتها مش أعاكسها لكن لو لوحدها عادي هههههههههههه ..... راجل صاحب مبدأ ) ..

قد إسمعت أن ناديت حيا ... ولكن لاحياة لمن تنادي .....
.

لأ طبعا فيه فرق كبير..
لما واحد بيبص علي واحدة ف الشارع بتبقي (لا مؤاخذة) لابسة ضيق غير انه بيبقي علي أضيق الحدود عشان مايتفضحش.
انما لما واحدة بتقعد وعلي كراسي زي دي بالذات بتبقي وضعية الجلوس مش لطيفة وبتظهر أماكن في جسم المرأة دون احساسها.. غير انه بيعلق نظراته عليها بالربع ساعة ولا حتي ساعة لو المسافة طويلة. ولو كانت دي اختك أو قريبتك حاتبقي عاوز تنصحها برضه. يعني علي الأقل نص العمي ولا العمي كله.
وعاوز أعلق علي موضوع المبدأ ده.. ده مش مبدأ ده بس عيل جبان شغال بنظام "لو امها موجودة حاتمسح بكرامته الأرض انما لو هي لوحدها واتكلمت يبقي عاجبها وبتعاكسه هي كمان!!" طبعا مبدأ شاذ ووسخ شبههم.

المشاركة الأصلية كتبت بواسطة bakkarahmed

الموضوع ده من زمان....ربنا يهدي..طول ما العقول مريضه وفيها هوس ال... هاتفضل ورا علي طول

ههههههههه والله عندك حق بلد بتفكر بالنص التحتاني

ياريت لو حد يقدر يفيدني ف موضوع تقديم الشكوي