الموضوع: استشارة في حادث على الدائري

الف سلامه عليك يا باشا و فداك العربيه ....و الحمدلله انك طلعت سليم
انا شفت الحادثه دي يا باشا يومها كان الدائري واقف شويه ولما و صلنا لقنا عربيه اكسنت جنب الحاجز الشمال و النقل في تاني حاره يمين ..... و كان الربع اليمين من قدام في الأكسنت فعلا طاير و من ورا ..... انا بس في جزئية من اللي غلطان من اللي شفته مليييييييون في الميه بتاع النقل لأنه اصلا كان واقف في في نص الطريق طبعا انا معارفش ممكن يكون عطلت منه او حاجه بس المهم انا شايف انها مش غلطتك يا باشا خالص.......و قدر الله وما شاء فعل ربنا يعوضك خير ان شاء الله

المشاركة الأصلية كتبت بواسطة ahmed a.maksoud

أولاً ألف سلامة على حضرتك و فداك 100 عربية.

ثانياً أنا هقولك وجهة نظري فى الموضوع دينياً............جايز تكون غلط و جايز تكون صح.

الوثيقة مكتوب فيها السرعة المقررة هى اللى التأمين بيغطي الحوادث بتاعتها.....و حضرتك كنت ماشي بسرعة أكبر من السرعة المقررة و فى اليمين كمان......دى غلطة من حضرتك.

سواق النقل غلطان طبعاً أنه وقف فى الحارة اليمين مش خارج الطريق......و ده لا يعفيه من المسؤولية.

لو عاوز الصح.........المفروض أنك تكتب اللى حصل و أنت و نصيبك مع شركة التأمين.

بس السؤال دلوقتي...........ما هى الإمكانية لتغيير المحضر ؟

للأسف ما فيش امكانية لتغيير المحضر لانو هيعمل مشكلة كبيرة للظابط اللي كتب المحضر وطبعا لا يمكن ظابط تاني في نفس القسم يضر زميله خوصا انو الظابط اللي كتب المحضر كان قصده يخدم مش اكتر وكمان ما ينفعش اغير افادتي في التامين لانو هتتعارض مع المحضر وبالتالي اعتقد انو شركة التامين ببساطة هتعتبره تلاعب وتلغي اي تعويض أصلا بغض النظر عن اي حاجة.

انا اصلا لما حصلت الحادثة وصلت عربية نجدة من اللي بيمشوا على الدائري وعملت تقرير حادث باللي حصل بالظبط واخدته بعد كده ورحت قسم الشرطة على اساس اني اعمل محضر باللي حصل بالظبط وما فيش في دماغي اي حاجة عن اني اخدع التامين ولا حتى اصلا كنت اعرف موضوع الالتزام بالسرعة المقررة ده (انا عرفته لما قريت الوثيقة بعد الحادثة)

وكنت ناوي اكتب المحضر زي ما حصل بالظبط لكن الظابط لما قرا تقرير النجدة لقى انو أمين الشرطة اللي كتبه غلط في كذا حاجة من الاجراءات اللي لازم تتعمل وكان من ضمنها انو كتب بيانات المقطورة والسواق لكن ما كتبش انو عمل ايه معاه (هل صرفه ولا هيروح للقسم لاستكمال المحضر)
فالظابط قال انو التقرير ده كده ناقص ومش هينفع يتاخد بالكلام اللي فيه ولازم نعمل محضر من اول وجديد
وطبعا لما حكيت اللي حصل للظابط قالي الكلام اللي حكيته لكم قبل كده.

بس انا كان ليا استفسار
هوا دلوقتي مش التأمين ده المفروض انو الناس بتعملوا علشان يشيل اخطائي واخطاء الآخرين في حقي ؟
يعني انا النهاردة لو انا ماشي في امان الله وفجأة ظهرت عربية خبطتني بدون ما اكون انا غطان لكن الطرف التاني هوا الغلطان
مش كده انا حقي انو التامين يصلح لي عربيتي؟ بدون ما اجيب سيرة العربية التانية ؟
انا عارف انو ده مش اللي بتنص عليه الوثيقة
لكن ده العرف اللي اللي الناس كلها بتعملو
انو لو واحد مأمن على عربيته والطرف التاني هوا اللي غلطان ... غالبا صاحب التأمين بيسامح وما بيطلبش حاجة من الغلطان على اساس انو التأمين هيصلحلو العربية.

وبالتالي لو تيقنت انو النقل هوا اللي غلطان بالتالي انا من حقي انو التأمين يصلحلي عربيتي بغض النظر انا كنت ماشي على كام، لانو الحادثة حصلت بسبب انو النقل واقف في الطريق مش بسبب السرعة (يعني الحادثة ماحصلتش علشان السرعة الزائدة ادت انو العربية انحرفت مني فجأة ناحية النقل اللي واقف لكن كل الحكاية انو السرعة الزايدة ما خلتنيش اعرف اتفادى خطأ غيري باني اتوقف قبل ما اخبط في النقل)

وعارف انو ممكن حد يرد عليا يقول طيب ليه الظابط ما كتبتش اللي حصل بالظبط في المحضر والسرعة اللي كنت ماشي بيها فعلا طالما انت شايف انو النقل هوا اللي غلطان؟

ردي على الموضوع ده انو انا عملت كده ( او الأصح انو الظابط كتب كده ) علشان أولا سواق النقل النقل ما حدش يأذيه (علشان انا قلتلو مش عاوز حاجة منه ) وثانيا يتفادى ألاعيب التأمين (وهوا بنفسه قاللي كده) لأن التأمين طبعا كان هيتلكك وكان اول حاجة هيعملها انو يقول انو الحادثة حصلت بسبب السرعة الزايدة لمجرد انو يتخلص من دفع التعويض بغض النظر عن النقل غلطان ولا لأ لكن الحقيقة انو النقل كان غلطان وانا ماعرفتش اتفادى غلطه بسبب سرعتي.

وكمان موضوع اني ماشي في اليمين بسرعة كل ده غلط انا عارف لكن مش ده اللي سبب الحادث (يعني لو كنت ماشي بسرعة وماشي في الحارة اليمين وما كنش في عربية نقل واقفة في الطريق وكان قدامي عربية ماشيا عادي بسرعة معقولة ولو حتى 40 مثلا ماكنش حصل حادث أصلا) (تخيل اصلا انو 40 دي على طريق سريع مش مقبولة مروريا فما بالك بقى باللي متوقف تماما في الطريق على طريق سريع)

وانا أصلا مأمن علشان كده، علشان لما حد يغلط فيا وما اعرفش اتفادى غلطه بالتالي التأمين يصلحلي عربيتي والا بقى يبقى مالوش لازمة التأمين لو مش هيتحمل اخطاء الآخرين في حقي.

يعني ملخص للموضوع انا اعتقد انو من حق التامين الاعتراض على دفع التعويض لو كان الحادث بسبب خطئي انا في الاساس (سرعة زائدة + المشي في الحارة اليمين بسرعة)
انا فعلا خالفت قواعد المرور لكن لم اكن السبب الرئيسي في الحادث

(يعني مثلا لو واحد ماشي بسرعة وكان في ملف وهوا خده بسرعة فالعربية عامت منه وخبط في عربية تانية كانت واقفة) كده هوا خالف قواعد المرور وهوا اللي غلطان ومن حق التأمين الاعتراض على دفع التعويض.

دي وجهة نظري اللي انا شايفها لكن طبعا عندي شك هل انا صح ولا غلط ؟
وعلشان كده عندي قلق من الموضوع ده وسألت عليه لانو مش عاوز آخد حاجة مش من حقي لكن في نفس الوقت مش عاوز اضيع حقي لو انا ليا حق عندهم.

ارجو اني ما اكنش ازعجتكم ... بس بجد كل حد بيشارك برأيه اكيد ده بيفرق وبيضيف للموضوع
وارجو انو يوصلني اني آخد قرار صح في الوضوع ده.

وشكرا مرة تانية لكل من شارك ومستني الردود

المشاركة الأصلية كتبت بواسطة asmaa sama

حصل خير

http://www.bu.edu.eg/faculty/nawiya.html

الف سلامه عليك اولا
ثانيا

انا شغال في التامين
بصراحه اللي انت عملته غلط لان سواق النقل كان لازم يتحاسب علي غلطته انت مأمن علي عربيتك طيب لو واحد تاني مش مأمن كان يعمل ايه السواق يتحبس ومين يصلحلو عربيته ومعظم سواقين النقل بيبرشمو ووعلي فكره هوه مش هبلطل يعمل كده حرام عليك تسيبو ياذي واحد تانى يكون معهوش فلوس يصلح عربيته
بالنسبة للتامين قانونا انت ملكش حق فى التعوبض
انت مش غلطان وسواق النقل هوه اللي غلطان والتامين بيشيل غلط اي طرف انا معاك بس انت مخالف في السرعه المقررة قانوناولذلك ملكش تعويض لو كنت ماشى بسرعه قانونيه كان التامين هبصرفلك تعويضك
ده رايى القانوني والتأمينى
بالنسيه للراى الدينى
ممكن تسال وتتصل بدار الافتاء وهما هيقولولك الراى الدينى


اي استشارة فى التامين انا تحت امركم
واسف انى طولت عليكم

مخالفتك للعقد تسقط حقك في التعويض
مروريا انت اللي غلطان لمخالفة السرعة المقررة والمقطورة كان واقف على يمينك والمفروض انك كنت تقدر تفرمل وتوقف سيارتك في وقت مناسب بتخفيض السرعةعند الإنتقال للحارة اليمين الأبطء
غلط المقطورة الوحيد هو المثلث في رائي
طبعا اللي عمل المحضر أكبر غلطان في الموضوع ده هو والأمين