موضوع حول نسبة الخساره فى اعادة البيع بين السيارات الكوريه والسيارات الاوروبيه

**hossam_elwani** · 10-12-2012 10:13 PM

استطلاع الاراء حول نسبة الخساره فى اعادة البيع بين السيارات الكوريه والسيارات الاوروبيه فى الفئه السعريه من 150 الف جنيه فما فوق

يعنى خليكو معايا لو عربيه بــ 168 زى الالنترا فولى لوود تنزل قد ايه او سعرها ممكن يكون كام بعد اربع سنوات الى عشر سنوات من شرائها ؟؟

وفى المقابل عربيه زى الاوكتافيا اول فئه مثلا بــ 170 الف او استرا كوزمو سيدان بسعر 167000 سعرها حيبقى كام بعد اربع سنوات الى عشر سنوات من شرائها؟؟

بسأل عشان نعرف على ارض الواقع ماهى نسبه الفاقد من سعر العربيه بالمقارنه بين المدرستين فى سعر اع البيع عشان الى متردد فى شراء عربيه بسبب جزئية اعادة البيع

ورجاء مش عايزيين نتفرع فى الردود ونتطلع بره الموضوع

تحياتى للجميع

**Mohab.Nabil** · 10-12-2012 10:41 PM

اربع او عشر سنين مدة واسعة اوى

يعنى الحال بعد اربع سنين غير بعد 10 سنين

لو اكتر من 5 سنين اظن هتلاقى فرق لا يذكر بين الاثنين خصوصا ان الالنترا سعرها غالى عشان الاوبشنز اللى فيها ( اعلى فئة ) و الاوبشنز فى اعادة البيع مش هتفرق كتير اوى يعنى مثلا شوف عربيات 2006 و شوف الفرق بين البيزلاين و الهاى لاين هتلاقى فرق الاف قليلة مش كتيرة عكس ما كان الحال فى الزيرو

**amz2011** · 10-12-2012 10:48 PM

انا رائى انى الاوربى بيحافظ على سعره بعد 6 او سبع سنين انما الكورى هيكون فى الخساره فيه اكتر

**hossam_elwani** · 10-12-2012 10:56 PM

المشاركة الأصلية كتبت بواسطة amz2011

انا رائى انى الاوربى بيحافظ على سعره بعد 6 او سبع سنين انما الكورى هيكون فى الخساره فيه اكتر

رأى مخالف تماما عما يقال !!!!!!

**A.Adel** · 10-12-2012 10:59 PM

متابع

**أيمن مندور** · 10-12-2012 11:28 PM

متابع

**ahmedsrs** · 10-12-2012 11:30 PM

ثقافة الجمهور هى الى بتحدد سعر اعادة البيع يعنى كلما انتشرت السيارة وسهل الحصول على قطع غيارها كلما غلى سعرها فى اعادة البيع يبقى الكورى يكسب لهذا السبب

**S O P H O S** · 10-12-2012 11:58 PM

انا حاسس انه فئة ال 150 الف فيما فوق مش هتكون فيها اختلاف كبير
لانها شريحة سعر معينة ومدركة من الي بيتشري
فاعادة البيع اعتقد هتكون متقاربة
مجرد راي ..

**AlGazar2** · 11-12-2012 12:06 AM

الخساره هتكون واحده تقريبا و خصوصا فى الوقت ده لان بعد 7 سنين مش هيكون فى جمارك على العربيات الاوروبى فالطبيعى ان الناس هتتوجه للزيرو منها فى الوقت ده الا لو جد جديد فى تمن الجنيه مقابل الدولار فى الحالة دى سوق المستعمل كله اما هيعلى اوى او هينزل اوى

بس مثلا من 10 سنين العربيات الكورى الى كانت ب 80 بقت ب 40 او 45 و الالمانى الى كان ب 120 بقى ب 60 او 70 يعنى كله بيخسر حوالى 50 % من تمنه بعد 10 سنين

بس لو البيع بعد سنه واحده مثلا هتلاقى ان ابو 80 بيخسر 15 يعنى حوالى 20 % بس الى ب 150 او اكتر بيخسر 30 يعنى برضه 20 % بس التجار عندنا هنا هما الى بيتحكموا فى السوق و ده الى خلى عربيه زى الهيونداى الالنترا مع احترامى ليها كعربيه ب 120 الف مثلا تبقى ب 168 نفس تمن الاوبل استر الفئه التانيه الى فيها وسائل امان اكتر بكتير جدا و اغلى من السوبارو الى كفايه التكنولوجيا بتاعه الموتور و الدفع الرباعى و التعليق الى فيها

**Abo.Moazz** · 11-12-2012 12:22 AM

طب ندى أمثلة أسهل
أخويا كان معاه سكودا أوكتافيا 2007 سعرها كان تقريباً 170000 باعها فى 2011 يعنى بعد أقل من 4 سنين بـ 97000 يعنى خسر حوالى 43% من تمنها ... ومكنتش متهانه
أنا كنت معايا هيونداى نيو أكسنت 2007 برده كانت بـ 77000 ... لو حبيت أبيعها النهاردة بعد أكتر من 5 سنين مش هابيعها أقل من 50000 يعنى هخسر فيها حوالى 35 %
يبقى الفرق واضح