الموضوع: هل رش الجانبين و الاكصدام يقلل من قيمة العربية؟

المشاركة الأصلية كتبت بواسطة a_h_m_a_d

شكرا جزيلا لكل اللي شارك برأيه في الموضوع

انا بصراحه برضه بميل لفكرة اني ارش للنضافة عشان هاحس انها رجعت زيرو , خصوصا ان فكرة البيع مش وارده حاليا
وكمان الخبطه اللي في العتب و تجاريح الاكصدامين شكلهم مش ظريف ابدا , بالإضافه طبعا اني مش هاغرم فلوس في التصليح

وانا شايف من أرائكم ان الاغلبية بتميل للرأي ده برضه , عشان العربية ترجع زي الاول .

نشوف برضه رأي المزيد من الاعضاء معانا ...

رش واتمتع بعربيتك هوه انت جايبها لنفسك ولا عشان اللي هيركبها بعدك؟ وحتى لو سعرها هينزل هيبقى كام يعني؟ ألفين؟ بذمتك مش ركوبك عربيه نضيفه يسوى الالفين دول وأكتر؟

المشاركة الأصلية كتبت بواسطة amrelsaqqa

الرش لازم ينزل سعر العربية ايا كان المبلغ بس كدة كدة بينزل السعر

ودهان الفابريقة ما يتعوضش وخصوصا في الاكصدامات
دلوقتى هى خدوش
بعد كدة هتلاقى تقشير


الواحد لما بيشوف عربيات كانت عاملة حوادث وشكلها نضيف وصاحبها يقولك راشة برة بس ، وتروح تكشف عليها تلاقيها كانت واخدة خبطات في الشاسيه ، تعرف اوى قيمة كلمة فابريقة برة وجوة ( ده من وجهة نظر المشترى ) وده طبعا يخلى العربية الفابريقة متميزة عن غيرها

العربية الفابريقة فابريقة مهما كان وحرام ارش عشان شوية خدوش
انا عن نفسى اشترى عربية فيها خدوش بس ابقى مطمن لها احسن من ما اخد عربية بتلمع من برة ويا عالم فيها ايه ، العربية الفابريقة بتتباع اغلى واسرع كمان لان سهل الكشف عليها والمشترى طالما اتأكد انها فعلا فابريقة ، مش بيقلق من اي حاجة تانية في العربية وبيشترى على طول

كمان العربية لو فابريقة وفيها خدوش بس ده معناه فعلا انها مش بتتهان وبتستخدم استخدام راقى
انما لو بتلمع بس راشة ، وانا ايه يضمنلى كان شكلها ايه ، وصاحبها كان بيعاملها ازاى وبعدين ظبطها ب2000 جنيه ....

طب وايه رأي حضرتك لو العربيه تترش في التوكيل؟ أصل الراجل مقلش انه هيرشها في ورشه أي كلام. وعلى فكره فيه ورش غير التوكيل بترش نفس شغل الفابريقه ماهو كل صنعه فيه منها الشغل الأي كلام والشغل الصح. وممكن يبقى يصورها قبل ما تترش عشان يبقى يوري الصور للهي هيشتري بعدين عشان يطمن ان العربيه مكانتش عامله حادثه ولا واخده خبطه.

يابيه هو هيرش جوانب واكصدمات

ماقلش انه هيرش سطح وكبود

لو كان هيرشها كلها كنت هبقي معاكي في الموضوع ده لكن اللي هيجي يشتري ده فاهم بردو لما يلاقي الاكصدمات والبابان مرشوين هيروح يبص علي الكابود هيلاقيه فابريكه لان لو في حاجه فالشاسيه اكيد هتاخد الكبود معاها (حادثه مثلا )

ولما يجي يبص علي قوايم العربيه هيلاقيها فابريكه بردو يبقي مافيش حوادث ولا من قدام ولا من الجنب

يبقي كده تمن العربيه يغلي لان ماثيلتها من نفس الموديل متجرحين او متخبطين وهي لاء نضيفه

المشاركة الأصلية كتبت بواسطة amrelsaqqa

والله كان في عربية قدامى خبطت في العربية اللى قدامها على سرعة 40 30 مثلا ( بعد الفرملة ) والعربية اللى قدامها واقفة ورافعة الهاند ،

واللى حصل ان العربية دخلت بأكصدامها والرفارف بعدت لبرة والكبوت اتزاح لفوق ، ( عشان السدر اللى خد الخبطة فبعدهم عن اماكنهم )

والخبطة دخلت طبعا على الاكصدام وشاسيه الاكصدام اتدمر و الخبطة وصلت لفردتين الشاسيه بتوع العربية وشاسيه الاكصدام وقف قبل سربنتينة التكييف بالظبط ( السربنتينة اتخبطت خبطة بسيطة ما اثرتش عليها )


وبعد كدة الشنب اتشد تانى على البارد والرفارف والكبوت اتعدلوا زي ما كانوا لوحدهم بعدل شد الشنب (بدون رش او حتى سمكرة ) ، واهى اسمها عربية اتخبطت في فردة الشاسيه برضه ، اي نعم ما حصلش حاجة ومش هيعيب العربية اوى ومش هتبان اصلا لأنها عصرة بسيطة في اخر طرف لفردة الشاسيه مش مأثرة على الشاسيه ولا العربية ، بس اهو العربية حصل فيها شغل وزراجين من قدام وكان ممكن ترش طرف فردة الشاسيه بس لسة فبريكة رفارف وكبوت ...

دي حاجه حلوه يعني !!

من خشنا فاليس منا

بص ياباشا انا لما جيت اشتري العربيه ماكنش ليا فيها خالص والحمدلله اتبدس في عربيه فابريكه بره جوه زي ماحضرتك فرحان بيها بس هي كانت راشه رافرف واحد قولت مش مشكله وكشفت علي العربيه كلها

بعد مادفعت الفلوس وكتبنا العقد وديتها لواحد سمكري يعملي فيها شويه شغل لقيت واحد من الصنيعيه جايلي بيقولي اختها علي كام وبيضحك قولتلو فهمني

قالي العربيه دي لابسه في بلاعه في المقص اليمين ومش بتتظبط زوايا !!

وفعلا بتعزبني عشان اظبلها زوايا ومش بتبقي قد كده

يعني لو شاسيه وصاج سليم في حاجات تاني ممكن تكون اهم مع العلم صاحب العربيه مغيرلها كل اللي محتاجه بعد الخبطه دي وماتظبتتش وطبعا انا لبستها وانا الحمدلله مش بسافر فامش فارقه معايا كتير

ياريت تكون الرساله وصلت