الموضوع: البناء بواسطة الحوائط الحاملة

هو فعلا اللى عرفته ان عيبه انك مش هتعرف تعدل فى الادوار العليا وان الفتحات فيه بتضعفه فمش مستحب تعمل شبابيك كبيرة انما غير كده فهو كويس جدا لمساحة 3 ادوار مثلا مساحة 150 متر وموفر جدااا زى ما صديقنا محمد عبدالله قال فى المشاركة السابقة
السؤال بئا مساحة 150 متر حاليا فى الوقت الحالى يكلفو كام حاليا لدور واحد ؟؟؟ وهل هتحتاج عمال من نوع خاص
وغالبا الادوار العليا هتبئا نفس التكلفة تقريبا
*ملحوظة الحوائط الحاملة غير الحوائط سابقة التجهيز علشان ميختلطش الامر ..

المشاركة الأصلية كتبت بواسطة rockana9112007

موضوع شيق جداااا

وبالنسبة للتوفير فى تكاليف البناء انا شايف ان البناء بأستخدام الحديد زى امريكا ارخص وعملى جدااا

وغير مكلف والبناء قوى برضة ويعيش ومساحات زى ماانت عايز ....بس طبعاااا مظلوم جدااا فى مصر

الموضوع ده جه فى بالى بس حاسس انه مكلف ... اللى جه فى دماغى فكرت ان يتعمل زى كمر حديد زى اللى بيتعمل فى الجمالون ويتبنى طوب بين الكمره الحديد واختها وبكده لهرجع اقول لا فى شرخ فى العمود ولا تريح مبانى ولا كده.. بس حسيت انها هتكلف تكلفة الخرسانة المسلحة او اكتر كمان..
لو عند حضرتك فكرة فى الموضوع ده ياريت تشاركنا فيها يمكن نوصل لحاجة جديدة ^_^

المشاركة الأصلية كتبت بواسطة algazar2

عيبها الاكبر انها مينفعش تبنى لاكتر من 6 ادوار و لازم سمك الحيطه فى اول دور يبقى كبير و ده تلاحظه فى البيوت القديمه ان اول دور ممكن الحيطه تبقى 50 او 75 سم

المساحات الداخليه متكونش كبيره يعنى بين كل حيطه و حيطه 3-4 متر عشان السقف ميحصلوش انبعاج و يتكسر

بتتعمل حاليا فى البيوت الصغيره الدور الواحد او دورين و الى بيبقى فيها قبب فوق المساحات الكبيره و ده زى مشروع هرم سيتى مبنى بنظام الحوائط الحامله بطوب رملى مضغوط من الموقع الى هما فيه و فى برضه قرى فى المنيا الجديده و اسوان نفس النظام ده

الى تقريبا بيتقال عليه نظام حسن فتحى عشان هوه الى اعاد استخدامه فى العصر الحديث بعد ما كان الناس بطلت تبنى بيه من حوالى 100 سنه تقريبا

التكلفه بالظبط مقدرش افيدك بس هتكون مقاربه لنفس المبنى الخرسانه عشان عايزه عمال مهره جدا جدا و دول مش موجودين او غاليين جدا و بتبقى عايزه حفر و تأسيس برضه بس مش زى المبانى الخرسانه طبعا

المشاركة الأصلية كتبت بواسطة mohammedabdallh

احنا بيتنا حوائط حامله ومساحته 150متر ومن 30سنه او اكتر
مشكلته مش معمر زى الخرسانه المسلحه اقصى حمل 3 ادوار لو مجبكشى جيران وحوائط تمسك بعضها
مينفعشى تفتح اماكن او تهد جدران لازم تمشى على نفس الرسمه الاساسيه بتاعه الدور الاول ودى مشكله طبعا
ميزته تكلفته اقل كتيير اوى
وسريع البنا

كلام ولا أحلى +111111111

ضيف كمان ان البناء بالحوائط الحاملة بيخلى المحتوى الحرارى جوة الفراغ افضل من البناء بالخرسانة

يعنى الجو فى الشقة بيكون احسن وانت بانى طوب عن وانت بانى خرسانة


طبعا الخشب فى مصر غالى، بس ممتاز كمادة بناء

بسم الله الرحمن الرحيم !!

مبدئيا هوة انا مهندس مدني ! والموضوع يا سيدي الفاضل بيتم تحديده عن طريق مهندس مدني وليس مهندس معماري لأنه المهندس المدني هو اللي مهمته نقل الأحمال وتصميم منظومة التحميل والموضوع بيتحسب كالتالي !
المبنى اول اختيار بيتم تصميمه بنفترض انه ها يتبني بأقدم طريقة في التاريخ الا وهي الـ Solid slab يعني ها تصب بلاطة "سقف" وعندك كمراتك والكمرات متحملة على العمدان ! ده النظام اللي معروف لدى الكل !! جه النظام تتطور شوية وشلنا الكمرات ! وعملنا نظام جديد اسمه الـ Flat slab ! يعني بلاطة متشالة على سقف على طول ! وده ميزته انه الكمرات مبتبقاش عائق قدام اعادة التقسيم تاني جوة المبنى في المسطحات الداخلية ! ! طيب اللي بحدد الموضوع ده الأحمال اللي جية على المبنى ! والأحمال دي نوعين !
1- احمال حية live load
2- احمال ميتة dead load
الأحمال الميتة دي احمال لا يمكن تلافيها ! زي وزن السقف اللي فوقي ! كده كده ها يتشال على العمدان بتاعت الدور اللي انا فيه ! فده حمل ميت لازم يكون موجود
الأحمال الحية بقى هي احمال بتحدد حسب
لو المبنى ده ها يستخدم كمبنى سكني بقول اني ها افترض انه المتر المربع ها يكون فيه 300 كجم ! لو مثى ها يستخدم مبنى اداري بقول انه ها افترض انه المتر ها يقف فيه 600 كجم على المتر المربع ! لو مثلا جراج او مول بقول الحمل بيكون 1000 كجم على المتر المربع ! وهكذا بقى !
فالمصمم بقى بيعمل ايه بيجمع الحمل الحي + الحمل الميت ! ويشوف يجرب يصمم بطريقة الـ Flat slab ! لقى السقف في تصميمه ها ياخد عمق كبير وتسليح ثقيل يروح قالب النظام النشائي مثلا ويستخدم نظام تاني زي انه يعمل حاجة تحت العمود اسمها Drop panel او margenal beam ! او coumlmn head كلا انواع وحلول وممكن يقلب النظام بالكامل ويستخدم انواع اخرى !!

طيب الناس اللي عايزة تبني بنظام الحوائط الحاملة ! بس الموضوع مش بيبقى آمن من وجهة نظري وماشي حلواني تماما ! اكيد فيه حل هندسي اقولكم اه فيه حل هندسي !
نظام هندسي رائع متكامل للمباني السكينة اللي الأحمال الحية فيها خفيفة ! نظام اسمه الـ Hollow block ! النظام ده بيعمد اني بقلل الحمل الميت تماما ! او تقريبا بخليه حاجة خفيفة جدا ! عن طريق اني بحط في السقف بلوكات فوم !


اه زي ما قريتوها كده بلوكات فوم وتكلفتها بتبقى خفيفة جدا ! وتقريبا شبه ولا حاجة ! هوا الموضوع كله تكلفة شوية التسليح اللي ها يتحطوا في السقف وشوية العمالة بتاعت الشدة ! بس اسمك في الأول وفي الأخر ساكن تحت سقف مسلح ! آآمن كتير قوي من الحوائط الحاملة ! ونظام انشائي كامل ! اللي حابب يقرى زيادة في موضوع الـ hollow block ده ممكن اديله كتب تحفة بتشرح الموضوع والفكرة والمبدأ ! طيب يعني انا حليت مشكلة الحوائط الحاملة عن طريق اني ممكن اقعدك تحت سقف مسلح وبتكلفة شبه زيرو ! على فكرة نظام الهوردي "hollow block " موجود في مصر ومنتشر في المدن الجديدة ومعمول في فلل كتير جدا ! ولكن يعيبه انه مصمم لأحمال حية خفيفة يعني مباني سكينة مينفعش يتعمل بيه مبنى مدرسة او مستشفى او مكتبة يعني لازم يكون احمال عادية وخفيفة ! تيجي تقولي طيب منتى لسة محليتليش مشكلة الخرسانة الجاهزة !
احب اقولكم انه اللينك اللي تحت ده بحث انا عملته في الكلية وقدمته لبروفيسور من جهابزة الخرسانة في مصر بيه مقارنة بين الخرسانة المنتجة من الطبلية ! والخرسانة الجاهزة ! بتكاليف ها تلاقي انه المتر المكعب الفرق بيه 30 - 40 جنيه يعني شئ لا يذكر مقارنة بجودة وكفاءة ها تاخدها ! يعني ها تصب خرسانة عمرها الإفتراضي مش اقل من 60-70 سنة ! يعني نظام انشائي كامل متكامل !
السقف ها يبقى خرسانة مسلحة بتكاليف بسيطة جدا ! وسعر الفوم هو الحاجة الوحيدة اللي مش عارفها الحقيقة ! والخرسانة الجاهزة سعرها في الملف اللي تحت من كذى شركة في مصر زي
- سيميكس
- لافارج
- جنوب الوادي
ودول اشهر 3 شركات بأتعامل معاهم في مصر ! واللي عنده اسئلة تانية انا تحت امركم !

ready_mix_concrete edited.pptx

ايه الافضل بين مبنى على عواميد ومبنى اخر بدون عواميد (على طوبه) ويشيلو كام دور وكام العمر الافتراضى للاثنين ؟؟

بص انا مدرستش حاجة ومتوسعتش تماما في الحوائط الحاملة ولكن المبنى الخرسانة ممكن تبني لحد 50 دور عايز تزود زود بس اسس صح انقل احمال صح شوف تربة صح ! وياكش تبني 100 الف دور :d بالنسبة للعمر الإفتراضي للخرسانة ! لو قولنا انه التنفيذ كان صح واتعمالها معالجة صح بعد الصب وبيتعملها صيانة في المبنى اول بأول الخرساة ممكن توصل لعمر 70 سنة ووممكن اكتر حسب البيئة