جديد في السواقه واتدبست في عربيه جديده وغاليه .. تنصحوني بايه ؟

السلام عليكم

زي ماهو باين من العنوان انا جديد في السواقه يعني مجرد اتعلمت اسوق ازاي بس ممارستش كتير ومدخلتش في زحمه ابدا ..

الوالد كان حاجز اوبل استرا سيدان الجديده من شهر وشويه كدا .. وحصلت شوية ظروف اضطر يسافر وانا الي اتدبست في موضوع العربيه دا وانا الي هستلم وانا الي هسوقها الفتره الي جايه لأنه مش هيرجع قبل الصيف ..

وطبعا العربيه كبيره جدا عليا وخاصةً ان انا لسه جديد في السواقه وطبعا غاليه اوي وأي حاجه هتحصل فيها هتكلف جامد ..

فتنصحوني اعمل ايه لما استلمها ؟ .. والاستلام ممكن يكون خلال اسبوعين كدا ان شاء الله ..

شكرا ..

ياريت تشوف لك عربيه اواتاجر عربيه لمده اسبوعين علي الاقل
28 او 27 او اي حاجه تعبانه تدوس وفيها وتتعلم عليها وسط الزحمه والميكروباصات والتكاتك
قبل ماتسوق عربيه زيرو سعرها يتعدي ال 150000
حرام

وياااااريت برضه وانت رايح تستلم يبقى معااااك حد فاهم فى العربيات علشان يبص عليها قبل ماتستلمها زياده امان لييييك علشان حضرتك مش اوى فى العربيات وزى مالاستاذ قالك انت ممكن تاجر عربيه الايام ديه وتمشى بيها والف مبرووووك مقدما

زي ما قال استاذ hugan أجر عربية لمدة الاسبوعين دول واتعلم عليها وامشي بيها في الزحمة واركنها واطلع بيها

وبعدين لما تستلم العربية ما تمشيش بيها في الزحمة كتير لحد ما تتعود عليها وعلى ابعادها ...


بالتوفيق

بص هى محتاجة جرأة شوية و سنتين حرص و ممكن تسوقها و تمشى بيها و خلاص بس متروحش بيها فى حتت زجمة اوى الاسعه 2 الظهر مثلا لو امكن تسيبها سعات الزجمة و تروح مواصلات او تاكسى و السلام

و ابقا اركبها فى الروقان اهو تتعود عليها و اهو بتتعلم عليها اكتر


و ربنا يبركلك فيها يا سيدى و الف مبرووك و ربنا يديك خيرها و يكفيك شرها

اوعى تسوق دلوقتى ,,, خسارة تخبطها و تخسر الفابريكة
زى ما قال hugan حاول تتاجر عربية اى كلام و اتقن السواقة عليها كويس و كل ماتكون فى فرصة كويسة خد عربية حد من اصحابك لفة بس شرط ان تكون ف مكان كويس و بالتالى هتكتسب خبرة كويسة
و طبعا لازم يكون معاك حد يوصلك العربية لحد البيت و تبقى تسخنها كل فترة كدة
نسيت اقولك الف مبروك

خد معاك حد يبص علي العربية ويسوقها لحد البيت
حدي يكون تبعك طبعا مش اي حد يعني
وبعدين اتعلم علي اي عربية براحتك قبل ما تركبها
ومبرووك العربية ..

انا ممكن اسوقهالك لو عايز :))

اقتباس:

---

المشاركة الأصلية كتبت بواسطة amr-osama

السلام عليكم

زي ماهو باين من العنوان انا جديد في السواقه يعني مجرد اتعلمت اسوق ازاي بس ممارستش كتير ومدخلتش في زحمه ابدا ..

الوالد كان حاجز اوبل استرا سيدان الجديده من شهر وشويه كدا .. وحصلت شوية ظروف اضطر يسافر وانا الي اتدبست في موضوع العربيه دا وانا الي هستلم وانا الي هسوقها الفتره الي جايه لأنه مش هيرجع قبل الصيف ..

وطبعا العربيه كبيره جدا عليا وخاصةً ان انا لسه جديد في السواقه وطبعا غاليه اوي وأي حاجه هتحصل فيها هتكلف جامد ..

فتنصحوني اعمل ايه لما استلمها ؟ .. والاستلام ممكن يكون خلال اسبوعين كدا ان شاء الله ..

شكرا ..

---

بص يا معلم انا اخويا كان زيك كدة بيعرف يسوق و كل حاجة بس مكنش بيسوق في الزحمة اول حاجة سمي كدة و شغل قران و اطلع هادي كدة و متخفش لان لو خفت من كل حاجة هتتلخم و اهم حاجة تبقي شايف ابعاد عربيتك كويس جدا حتي لو هتبقي اقعد بتشب لحد ما تتعود و متزنوقش نفسك بين العربيات اوي عشان انت لسة متعرفش الابعاد و استخدم اشاراتك و مراياتك و مرة علي مرة هتلاقي الدنيا زي الفل معاك بس اهم حاجة تبقي مركز و الف مبروك علي العربية و ربنا يكفيك شرها

خلى بالك يا باشا العربية جديدة مش عايزك تخاف بس فعلا هات العربية وأركنها أطلع بيها على خفيف كدا

بس لازم تشوف حد يعلمك على أى عربية قديمة او مدرسة تعليم لازم تمارس وإلا مش هتتعلم لأنك هتفضل خايف عليها

نصيحة منى زى ماقال الاعضاء وانت بتستلم خد حد معاك سواق كويس يوصلها لحد البيت

اول و اهم حاجة اوعى تسوق و انت خايف .... خليك واثق علشان الخوف دا اكبر سبب لحدوث المشاكل ...ثانيا ..حضرتك تاخد حد بيفهم وانت بتستلم وانت بترخص ...و بعد كدا تاخدها كذا يوم بليل فى الروقان ..تاخد عليها ..و واحدة واحدة تنزل ف وقت زحمة ..لحد ما تاخد خبرة الزحمة ..واهم حاجة بلاش خوف او قلق ..ربنا يكرمك ويكفيك شرها

شكرا جدا لكلامكم يا جماعه والله انتم تقريبا جبتوا من الاخر لان فعلا الخوف عندي وصل لدرجه غير طبيعيه وخاصة ً ان امبارح اتصلوا بيه وقالوا في عربيه جاهزه لو عايز تستلم النهارده بس لون مختلف وانا رفضت .. ومن ساعتها وانا تقريبا باخد ساعه قبل ما بعرف انام من كتر التفكير والقلق هههههههه .. وانا فعلا اتفقت مع واحد صاحبي واثق في سواقته ١٠٠٪ ويفهم في العربيات يجي معايا وهو الي يوصلها لغاية البيت ..

بس انا لما سالت في موضوع تاجير العربيات كتير اوي خوفوني وقالوا هيمضوك على شيك على بياض واي خبطه انت الي هتلبس فيها وممكن يلبسوك في اي حاجه كانت بايظه اصلا .. وان انا اتعلم على العربيه لما تيجي على خفييف شويه شويه لغاية ما اتعود ان شاء الله ..

أبعد عن تأجيز العربيات ولو هتأجر عربية لو لقيت 128 يبقى فل :) إنما متأجرش عربية جديدة لأنك ممكن تخبطها برضه

وبتوع معارض الإيجار فيه منهم كتير بالفعل ميعرفش ربنا ويلبسك حاجة موجودة فى العربية من قبل ما تاخدها

لذلك ح تى لو أجرت عربية لازم تفحصها كويس كأنك بتشترى سيارة مستعملة وبالذات لو حد مش ثقة متعرفوش !!!


إيه رأيك بقى فى إن ممكن حد يأجر عربية تحصل فيها حاجة صاحب المعرض ميكتشفهاش تاخد إنت العربية تعمل بيها مشوراك وترجعله يشوف العيب يقولك إدفع

لذلك فهى مواضيع سخيفة كلها

ايوه ماهم خوفوني من كدا وواحد من اصحابي كان بيحكيلي عن جاره اجر عربيه الصيف الي فات وطلع بيها الساحل وفجاه العربيه باظت والمطور باظ وهو الي لبس في الموضوع ودفع ١٦ الف جنيه .. مع العلم انه مع اسرته واولاده يعني سواقته هاديه ومبعملش بالعربيه حاجه ..
عشان كدا خايف من موضوع التاجير دا ..

امن على العربية

تأجير العربيات !! الحوار ده أبعد عنه خااااااااااااااالص لآنك لسه خام في السواقة

أنا شايف إنك تتعلم مع واحد صاحبك يطلع معاك في العربية وانت تسوق بيه كل يوم مثلا ساعتين او ساعة

طبعا ادخل بنزينه ومونهاله عشان يمشي معاك برحاتك !!

وكذا حتتعلم وتبقى مية مية وفي خلال أسبوعين حتبقى شوماخر زمانك

وبيقولو السواقة فن وذوق واخلاق !!! وأنا بقول السواقة تركيز وشجاعة

والف مبروك على التدبيسة وياريت كل الاعضاء يدبسوا التدبيسة دييييييييييه

بص:
1- خد معاك حد بتثق فية وياريت يكون قريب يستلم معاك العربية ويوصلها لحد الجراج بتاعك ومتسيبهاش فى الشارع.
2- نفس الحد دة يطلع معاك طلعة كل يوم جمعة مثلا فى حتة فاضية تماما وتتعلم على العربية ... ركن وشمال ويمين ونقلات واشارات وتاخد على ابعاد عربيتك.
3- بعد كام طلعة ولما رهبة العربية تروح وقلبك يجمد عليها شوية (متهيالى 3 ايام بالكتير) تنزل معاة برضوا فى شارع هادى وبعدين شارع زحمة (انصحك يوم جمعة الصبح).
4- انزل طريق سفر.

متزهقش من طول المدة بس العربية جديدة وبعدها مش هتحتاج تعليم تانى وممكن تعلم كمان.

يعني استنتج من كلامكم ان انا اتعلم شويه شويه على العربيه وابعد عن التاجير ودا الصراحه الي انا مقتنع بيه ..
وان لازم يكون حد معايا في الفتره الي في الاول دي ..
ان شاء الله الله ءأمن عليها وربنا يقدم الي فيه الخير ان شاء الله ..

شكرا لآرائكم ونصايحكم ..

ماتنساش إنك في فترة تلييييييييين للعربية

ولازم تقرأ كويس عن الفترة ديه ومواعيد الصيانة الدورية وتغيير الزيوت

حتلاقي كل حاجة في نايل موتورز بس انت اعمل ريسيرش !

وكمان تسجيل العربية وتركيب النمر والذي منو

أقرأ الكتالوج بتاعها كويس جدا قبل ما تركب العربية

أهممم حاجة في السواقة إنك تتفادى الثقة زيادة عن اللزوم لإن دايما إللي بيسوقوا جديد بعد كام يوم بيتهيألهم إنهم بسوقوا كويس ومش واخدين بالهم إن في حاجات كتير مش واخدين بالهم منها زي إزاي تتصرف لو حصل موقف مفاجئ ولا إزاي تتفادى أخطاء الآخرين وحاجات كتيير
ونصيييحة متتعلمش عالأوبل وهاتلك مثلا 128 أو 127 أو لادا وعشان تبقى متمكن من السواقة كويس لازم مش أقل من شهرين قيادة مستمرة ومتنساش إن السواقة في مصر غير أي بلد تانية إنت في غابة مش في شارع وبالذات في إسكندرية سواقتهم تقريبا الأسوء في مصر فخد بالك منهم كويس وخصوصا في الزحمة
وربنا يبارك لكم في العربية وأهنيكم على الإختيار

أنا رأيي بلاش تركب العربية دي غير و أنت متمكن 100% من السواقة..
العربية مش رخيصة + أبعادها هتبقى كبيرة شويتين على واحد لسة بيتعلم جديد فالموضوع هيبقى صعب أوي و العربية هتتهان..
أنا رأيي تاخد حد معاك متمكن في السواقة و أنت بتستلم و أركن العربية عند بيتك لحد ما والدك يرجع..
و أنت حاول تاخد كورس في مدرسة سواقة أو تتمرن شوية على عربية أي حد صاحبك و هو معاك.. و بعد كده ممكن واحدة واحدة تركب عربيتك و والدك معاك و أمشي بيها الأول في شوارع واسعة و فاضية و أتعلم الركن بالوش و بالضهر عشان تحفظ أبعاد العربية.. بعد كدة ممكن تجرب تمشي في شوارع وسط عربيات.. و شوية شوية هتلاقي نفسك الدنيا ماشية كويس معاك و عارف تتصرف في المواقف المختلفة..
و مبروك العربية...

هي محتاجة جرأة مش أكتر. انت مش هتصدق لو قلتلك ان تاني مرة(اول مرة لمدة 5 د) سوقت عربية في حياتي كانت من المعادي لسراي القبة وقت الظهر. وماكنش في اي حل نهائي غير اني اسوقها بنفسي. والحمدلله وصلت من غير اي مشاكل الحمدلله. بس مش عايز اقولك ع الجرءة والثقة في نفسي بعد الموقف دا ولحد دلوقتي مأثر معايا و في طرقة السواقة. توكل ع الله وسوق لو مفيش حل تاني , اصلها مش اختراع يعني

بص حضرتك انا كنت زي حضرتك ملقتش حل غير اننا اسوق بليل مع واحد صاحبي علشان اتعود علي العربيه وابعادها فممكن تنزل بليل يعني الساعه 11 او12 بتكون الشوارع الي حد ما فاضيه لمده اسبوع كل يوم ساعه او اتنين هتتعود شويه شويه علي ابعاد العربيه وعنيك دايما علي المرايات اللي في الجوانب علشان ابعاد العربيه ولو هتركن تحاول تخلي اللي معاك ينزل من العربيه علشان الابعاد الخلفيه صعبه الرؤيه ويحاول يوجهك بعد كدا تحاول تنزل الصبح بدري يعني الساعه 7 بتكون كثافه العربيات قليله علشان تتعود علي الزحمه مع شويه جراءه هتكون إن شاء الله تمام

متشكر ليكم جدا يا جماعه انا شكلي هتوكل على الله واحاول ابقى انزل شويه شويه في طرق فاضيه وبعد كدا ادخل تدريجيا في الزحمه واحاول اتغلب على الخوف الي عندي دا ..

وشكرا ليكم ولآرائكم الجميله ..

بلاش خليك ف اليوزد أفضل الله يكرمك .. وخد حد فاهم عند الاستلام