الموضوع: احدى نقاط الضعف الامنى فى النترا 2012 (قصة ونصيحة)

المشاركة الأصلية كتبت بواسطة hmatchy

ليا بس تعقيب على الاستاذ سيد
انا رأى ان مش معنى ان احنا بنستورد ارخص حاجة يبقى المشكله فى المصنع
الفكرة كلها ان الناس دى درست ثقافتنا وعرفت دماغنا ماشية ازاى وبقو يعملو اللى احنا عايزينو
انا عربيتى صينى ومع ذلك مفيهاش العيب ده وفيها وسائل الامان من اير باج وفرامل ايه بى اس و ايه بى دى وصاج محمل
المشكلة يا استاذ سيد ان هم فهموا ان احنا شعب ممكن يرفع بحاجة السماء من غير سبب ملموس او منطقى وبردو ممكن ينزل بيها الارض يعنى من الاخر شوية حظ
مثلا السيراتو انتشرت انتشار فظيع و السبب الشكل سواء اختلفنا او اتفقنا انها عربية حلوة او وحشة 90% من اللى اشتراها اشترى الشكل الجميل
للاسف ثقافة الشعب المصرى اسئل مجرب وطبعا محدش بيقول على عربيتو انها وحشة الا قليل اوى
اما الناس ليه مش بتشترى الاوروبى لان العربيات الاوربى اللى اسعارها قريبة زى الفيات والرينو قطع غيارها رخمة اوى وبالتاى ممكن نعالج بعض المشاكل اللى فى الكورى او الصينى ونوصلو لمستوى يرضينا وننتفع بيه على قد فلوسنا لان احنا بردو بندفع فى العربية ضعف اللى بيدفعوا اى مواطن فى اى بلد تانية فى نفس العربية دا غير شوارعنا المنيلة اللى بتخلينا نستحرم نجيب عربية غالية علشان متأكدين انها هتتبهدل
ارجو تتقبل تعقيبى ورأى الشخصى

حضرتك قولت اللكلام اللي انا عايز اقوله
احنا اللي بنصدر ثقافتنا للمصنع وليس العكس
ودة في كل حتة في العالم مش عندنا بس - في شخص مهمته دراسة السوق وتحليل وتحديد رغبات المشترين وبناء عليها بيبدأ يصنع منتجه ونفس الشئ بيحصل لما بيلاحظ المصنع قلة او انخفاض في مؤشر المبيعات وتقلص حصته السوقية
بس للأسف في فرق بين السوق الممصري وبين معظم الأسواق في العالم - احنا بنرضي بالقليل وبندفع كتير
وعلي فكرة ، الأوروبي لما بينزلنا بمواصفات اعلي بكتير من طموحتنا وطلباتنا مش علشان احنا بنطلب كدة - ولكن لكون المصنع الأوروبي عنده مستوي ادني من المواصفات لا يمكن يقل عنها ااو يخالفها
يعني هدي لحضرتك امثلة علي كلامي
وارد جدا تلاقي عربية اوروبي مافيهاش تكيف ولا باور ولا زجاج ولا مرايات كهربائية ولا سنتر حتي - بس هتلاقي فيها احزمة امان خلفية وكمان ثلاثية النقاط ومساند رأس وايموبلايزر
ودة لأن المصنع بيعتبر دي تجهيزات اساسية وليست كماليات
علي عكس المصنع الأسيوي اللي اعتبر التكييف والباور تجهيزات اساسية في مقابل ان الأيموبلايزر وتطوير حزام الأمان من الكماليات او تجهيزات اضافية
ضيف علي كدة الأهتمام بتطوير التصميمات والشاسيه وانظمة التعليق في الأوروبي وقارنه بالأسيوي
هتلاقي ان مفيش مصنع اوروبي بينزل (مش هقولك موديل جديد) فيس ليفت من عربيته غير اما غير الموتور او عدل في تصميم ولما بينزل موديل او بيغير شيب يبقي لازم يغير شاسيه ويتطور فرامل وعفشة وموتور وفتيس
والأمثلة كتير اوي
1- سيات لما عملت فيس ليفت لموديل ابيزا 94 سنة 97 غيرت موتور ونظام التغذية بالوقود والعفشة الامامية والفرامل ورفعت مستوي التجهيزات الاساسية وادخلت انظمة الحماية من السرقة كتجهيز اساسي علي كافة الفئات وابقت جميع التفاصيل الاخري
ولما عملت لنفس الموديل فيس ليفت سنة 99-00 غيرت الموتور تاني والفتيس وعدلت في البوابة وطورت العفشة والفرامل ورفعت مستوي التجهيزات الاساسية
ولما نزلت الموديل الجديد سنة 02 غيرت الشاسيه بما فيه من عفشة وفرامل وموتور وفتيس وانظمة امان ورفعت مستوي التجهيزات مرة اخري

2- شركة تويوتا نزلت كورولا موديل 89 لحد 97 وعملت حوالي 3 فيس ليفت علي نفس الشاسيه ونفس المحرك (1.3) وابقت كافةة التفاصيل والتجهيزات ولم يشعر بالفرق من اشتري موديل 97 عن من اشتري موديل 93 بما في ذلك الspecial edition اللي نزل سنة 98
كذلك الهوندا سيفيك موديل 88 وبعد الفيس ليفت عام 90 - ما الجديد ؟؟؟ لا شئ يذكر سوي تغيير المحرك واضافة فتحة السقف الكهربائية
بل واشترك مع الجيل التالي في نفس المحرك ال1.5 كربراتير ونفس العفشة ونظام الفرامل وبنفس التجهيزات الاساسية والاضافية
وبالتالي لو انا حبيت اشتري هوندا سيفيك ليه اجيب موديل 93 وانا اقدر اركبها موديل 90 بفرق علي الاقل 10 الاف جنيه بنفس المحرك والفتيس والمواصفات بالظبط (فتيس اوتوماتيك - تكييف - باور - زجاج - مرايات - فتحة سقف كهرباء وشنطة وتانك من الداخل)

وصلت وجهة نظري؟؟؟

تحياتي