المشاركة الأصلية كتبت بواسطة ahmed_m_ashraf
أنا معاك، بس التوكيل ليه حجاتة برضة. يعني مثلا مينفعش تشتري من التوكيل طاسة عجل ولا علامات ولا أي حاجة تقدر تشتريها من بره التوكيل وتركبها بنفسك أو مش محتاجة فن في شغلها مثلا فلتر هواء فانوس خلفى لمبات محروقة ...إلخ. إلا لو حاجة مش متوفرة بره في الحالة دي إنت مضطر. مثلا أنا عندي فانوس خلفي إتكسر، أروح أجيبة من التوكيل بالإضافة لضريبة وتركيب؟ لأ طبعا أناهاروح أجيبة من تاجر قطع غيار نظيف وأنقى من النوعيات إللي عنده وأركبة بنفسي كمان في ثلاث دقائق، دا الفانوس بيتحل من جوه الشنطة من غير ما تحل الفرش حتى!
بس التوكيل بينقذ في حجات زي العيوب إللي تتعمل في الضمان، أنا مغير دراع المالتي فنكشن في الضمان وأكيد سعرها مش هيقل عن ٤٠٠ ٥٠٠ جنيه لو مش أكتر وناس مغيره دراع النور كله وإللي مغير البوابة بالهبل وطارة الدركسيون وزميلنا أهو مغير البطارية مرتين و و و ....
بالإضافة إنك لو مش بتتحرك بالعربية كتير زي حالاتي هتلاقي الصيانات الدورية على فترات متباعدة مقبولة جدا وبتحافظ على العربية بحالتها. أما لو طلعولك حاجات غير متوقعة زي تغير طرمبة المياه وتيل الفرامل والحجات دي فإنت ليك القرار ممكن تطلب عدم التغيير وتشوف على مهلك إذا كان معاهم حق ولا لأ.
أنا المرار إللي شفته مع الصنايعية أيام عربيتي القديمة عاملي عقدة! نصيحة حافظ على الضمان بالصيانات الدورية على الأقل.
وحتى لو التوكيلات نار ومبالغين أحيانا، بس للأمانة الموقف بتاع صاحب الموضوع موقف محترم وفيه توكيلات كتير معندهاش الإلتزام ده.