-
ازاي تظبط زوايا العجل صح
موضوع ظبط زوايا العربيه ناس كتير مفكرين انه مجرد ان العحل بيكون موازي لبعضه و كتير من الفنيين اللي بيظبطو زوايا (ان لم يكن 90%) بيظبطو العجل موازي ابعضه ويقولك تمام يا باشا
عشان تظبط زوايا صح لازم تعرف ان في ثلاث متغيرات (عوامل) لو التلاته اتظبطو صح هتحس احساس العربيه الزيرو لما تستلمها وتخرج تجربها عالطريق (طبعا العفشه عندك لازم تكون سليمه)
العوامل كالاتي:
http://nileup.com/up/uploads/nilemotors_13556012461.jpg
1-TOE
ودي زي ما باين في الصوره اما TOE-IN او TOE-OUT
TOE-IN لو كان بسبه طفيفه جدا بيساعد على الحفاظ على السير في خط مستقيم
TOE-OUT دا بيخلي العربيه حساسه جدا للدركسيون يعني سنه بسيطه على سرعه تودي فداهيه والظبطه دي بتكزن لعربيات السباق اللي بتكون في حلبه كلها ملفات حاده
عربياتنا الملاكي غالبا بيكون زيرو او TOE-IN بنسبه طفيفه جدا جدا
2-Camber
زي ما باين من الصوره اما negative او positive
من اجل اداء جيد (استقرار وثبات) في الملفات بيكون الcamper بزاويه negative بنسبه بسيطه
لو ال Camper مش متساوي للجنبين اليمين والشمال . العربيه بتحدف للcamper الاكتر
مثلا لو العجله اليمين قدام زيرو والعجله الشمال قدام +1 العربيه هتحدف شمال
عربياتنا الملاكي بيكون زيرو او negative بزاويه طفيفه جدا جدا
3-Caster
دي زاويه المساعدين الاماميين زي ما واضح من الصوره
دا بجد اعظم اكتشاف ... اللي بيخلي الدركسيون يرجع لوحده للنص .. يعني لو ماشي مستقيم وعوجت التاره وسبتها تلاقي التاره رجعت للنص تاني وتحس العربيه عايزه تمشي مستقيمه وبتحافظ على المشي في خط مستقيم
الكلام دا طبعا لما الcaster بيكون positive و كل العربيات الحدبثه كدا او اللي فيها power steering
عشان كل ما الcaster زاد كل ما الدركسيون يتقل
لو كان زوايا الcaster مش متساويه للعجلتين قدام العربيه بتحدف ناحيه الاقل
مثلا العجله اليمين قدام +5 والشمال قدام +6 العربيه هتحدف يمين بغبااااااء
طبعا عربياتنا positive لاكن بنسب
اخيرا الكوتش لو لقيته متاكل من جوا اقصد ناحيه ضهر الجنط بيكون عندك TOE-OUT بزياده او negative camper بزياده برضو
والعكس صحيح
-
كلامك صح
انا اللى باظبط عنده
لازم يطلع العربية على الكمبيوتر الأول
و تطلع مقاساتها الصح
و يبتدى يظبط
-
عند حد عندو كمبيوتر بجد من الاجهزه الجديده الوايرلس فى واحد فى الدقى اسمو تاير شوب لسه فاتح جديد في شارع متفرع من مصدق اسمو شارع التور قبل التأمينات
-
-
شكرا على الموضوع
المشكلة انك تلاقي الصنايعي الفاهم للكلام ده
Content Relevant URLs by
vBSEO 3.6.0 PL2