ساعدوني في الاختيار (حاجات كتير ولانسر تاني)
السلام عليكم,,
اولا انا معايا لانسر بوما -2008 -1300 مانيوال عاملة 105000 وعايز اغير قبل ما تبدأ تصرف العربية معايا ... انا بعمل حوالي 25000 الف في السنة ما بين سفر ومشاوير داخل المدينة.
انا استخدامي للعربية في معظم الحالات السرعة 100 كم/س وساعات بشد بالعربية وبوصل ل 160 و 170ولما بكون مستعجل بردو ... ومشاويري كتير فيها مطبات وشوارع مصر وحشة...و80 في المية من الوقت بكون راكب لوحدي حتى في سفرياتي....بحب التكيف القوي-العربية تكون ثباتها عالي اوي اوي لأني بأخذ منحنيات وغرز كتير لما بجري....مش غرز مميتة بس عادية العربية متعومش يعني...
اتوماتيك...عربية تستحمل البهدلة والهبد والرزع ... موتور قوي ... Abs اساسي .... فرامل قوية .... تعليق متوازن مع العفشة الناعمة وتكون ثابتة ومرنة في الغرز...الشنطة مش لازم تكون كبيرة اوي ... والكنبة اللي ورا تشيل 3 كويس مش مزنوقة .... بتوفر في البنزين جوة المدينة والزحمة ...اهم حاجة عربية متوجعش دماغي ومتضيعش وقتي مش مهم قطع الغيار غالية ولا لأ والمهم تكون معمرة ... المهم اني الاقي قطع غيار جوة التوكيل او برة التوكيل المهم اني مدوخش والكلام دا ... اعادة البيع هتكون بعيدة شوية يعني مش اقل من 6-7 سنين ... وانا هجيبها قسط فيهمنى اني اجيب حاجة متكونش اقل اطلاقا من اللانسر واجيب حاجة تلبي رغباتي في المشاوير والجري والاعتمادية.
انا هقول على مميزات اللانسر وعيوبها بالنسبالي عشان تكونوا معايا...
المميزات : عربية شكلها حلو اوي بالنسبالي واسعة من جوة 1300 بس جراية اوييييييي عشان مانوال وتجميع حلو وبتوفر بنزين جداااااا وانا مشتري دماغي خااالص يادوب سيرفيس وبس ما شاء الله مافيش اي وجع دماغ ... تكييف حلو ... ثبات كويس ... مرنة اوي في الغرز والمنحنيات ...حلوة في السفر ... شنطة حلوة ... تتحمل الهبد والرزع والبهدلة مع العلم اني بصون العربية كويس وكل قطع الغيار اصلي... الياباني يابااااااااني بردو.
العيوب :
مانيوال و1300 مع التكيف تأثير قليل لاكن مع التحميل صعبة اوييي .....مفيش abs ... والعربية لما بتمسك فرامل مبتجيش يمين ولا شمال وبتعوم بعد ال140.
غير كدا الصراحة عربية ما شاء الله.
انا درست السوق وشوفت ايه اللي يمشي مع امكانياتى المادية وخصوصا ان الفترة الجاية مش عارفين البلد رايحة على فين وهيكون في جواز وكدا بعد 20 سنة طبعااا ههههههه.
المهم انا اخري 115-120 الف .
لقيت قدامي
كيا ريو سيدان او هاتشباك 1400 (اي بي اس في الفئة الها لاين بس - مش ضامن التكيف واعتمادية كيا مع الهبد والرزع).
لانسر شارك 1600 اتوماتيك (مفيهاش اي بي اس-ومش موجودة).
فيات بونتو ايفو 1400(موتور ضعيف-الوكيل بيقول مش هتنزل تاني).
فيات لينيا 1600اللي ب 115 الف (عجبتني اوي لما شوفتها بس معرفش عنها حاجة- خايف من التوكيل ووجع الدماغ ومعرفش التكييف نظامه ايه)
كيا سيراتو 1600 lx (مفيش اي بي اس - سمعة مش كويسة مع العفشة التعليق وكلام كتير).
الصني سوبر سالون 1500 (شكلها من ورا ... - تقفيل مصري وحاسس انها مش بتاعة شد وجري وخبط ورزع)
بروتون جين2 1600 (خايف من التوكيل والاعتمادية ووجع الدماغ والتكيف - مع انها الاختيار الافضل في الفلوس والثبات والجري).
تيوتا يارس هاتشباك 1300 (تحفة ... بس لسه جديدة ومقلق - الموتور مش عارف نظامه ايه).
انا عايز رأيكم في حالتي دي ... اتمنى اللي يبدي رأيه يكون جرب فعلا اي سيارة من دول ويبدي رأيه من خلال تجربه فعلية والحاجات اللي لسة نازلة جديدة عايز اراء عليها تكون بناءا على متطلباتى اللي كاتبها فوق .... ولا اجيب لانسر شارك واشتري دماغي لأني بحب اللانسر جداااا.... معلش طولت عليكم جدااااا.
