الموضوع: كلاكيت تانى مرة للناس اللى بتفتى بدون تجربة

السلام عليكم

اخوانى الاعزاء للمرة الثانية بافتح الموضوع ده

ياريت الاخوة اللى بترد على استفسارات الاعضاء سواء بالسلب او بالايجاب يكون عن تجربة و مفهوم التجربة انه بيقتنى السيارة فعلا موش جربها و لا يعرف واحد معاه العربية

اعجاب المالك او عدمه بالسيارة ده شئ نسبى يختلف من شخص لاخر فا انا شايف انه من الامانة فى الحديث ان الواحد مايقولش رايه فى السيارة بناء عن تجربة صاحبه او صاحب صاحبه حتى

يعنى واحد بيسال اخ هنا فى المنتدى عن عيب موجود فى السيارة يرد عليه الاخ انه فعلا العيب ده موجود فى بعض السيارات و ليس كلها و تم تلافى العيب ده فى الموديل الجديد

طبعا بيفتى هو لا ركب العربية و لا يعرف عنها حاجة واخره الصور اللى موجودة على مواقع الانترنت او جربها مع واحد صاحبه
طيب منين عرف ان فى عيب اصلا و حكم منين انه موجود فى بعض العربيات و بعضها لأ و منين عرف انه الموديل الجديد تم تلافى العيب ده فيه ده حتى ماحدش فينا شاف الموديل الجديد و لا حتى عارفين هاينزل مصر عامل ازاى و اذا كان معيوب و لا لأ

طبعا الفتى ده ممكن كلنا نقع فيه بحكم اننا مصريين و متعودين على الفتى و انا باعتبر نفسى واحد منهم الى حد ما و بحاول بقدر الامكان ماتكلمش الا عن تجربة بس احيانا الواحد بيغلط او ينسى موش عذر انما بقدر الامكان باقول ماعرفش احسن ماقول حاجة و اتسبب فى معلومة غلط

الحمد لله انا حريص تماما على ان مداخلاتى تكون عن العربية اللى انا راكبها و ماليش دعوة بالاقسام التانية الا حب استطلاع و ليس كمشاركات

ماحدش يزعل يا جماعة من الكلام انا بوجهه لنفسى قبل اى حد من الاخوة الاعضاء بس انا باقول وجهة نظرى و ربنا اعلم بنية كل واحد