حادثة بسبب فرامل برسونا 2012 والمصيبة مفيش قطع غيار فى التوكيل المحترم

**card44** · 17-12-2012 03:30 AM

بصو ياجماعة معلش اعزرونى بقالى كتير مكتبتش مواضيع
المهم حدخل فى الموضوع على طول النهاردة عملت حادثة اقسم بالله انا مش متخيلها لحد دلوقتى ازاى حصلت وانا ماشى فى نفق المعادى اللى عند كارفور فجأة عربية نص نقل وقفت قدامى بس مش قدامى على طول اقسم بالله كان بينى وبينى تقريبا كدة 15 متر حاجة كدة وانا شايفها بتقف من بعييييييييد المهم دوست فرامل وكانت سرعتى اقسم بالله تقريبا 70 او 75 وبدوس فرامل والاقى العربية ماشية برضو وال اية بى اس بيخبط تحت رجلى بطريقة مش طبيعة وعارفين احساس انو داخل على العربية النص النقل اللى فى وشى وواقفة وانا جاى من بعيد ومنتظر العربية تقف بقى فى الوقت المناسب ودى برضو مكملة حقولكو على حاجة والله مش حتصدقو انا وانا خلاص بخبط فى العربية سيبت الدركسيون وبصيت ورايا لانى مش مصدق ان العربية مش عايزة تقف وافتكرت ان فية عربية فى ظهرى هى اللى بتزقنى لقدام فسيبت كل حاجة ولفيت وشى لورا اشوف اية اللى بيزقنى كدة علشان اروح بقوة كدة والعربية مش عايزة تقف بجد فرامل زى الزفت وزى الطين وزى الاطران وياريت والنبى محدش يقولى اصل البروتون ليها سينس فى دوسة الفرامل وحتتعود عليها والكلام اللى انا بسمعة دة من اول الف كيلو وانا بشتكى من الفرامل فى التوكيل ويقولولى الكلام الاهبل دة اذا كان فى عز العرب الصحراوى ولا اللى فى العجوزة ياجماعة انتو مش متخيلين العربية اقسم بالله سحفت بيا بتاع حوالى مثلا 7 متر حاجة كدة وانا مش متوقع انها مش حتقف خالص المسافة اللى انا مفرمل منها من بعيد اوى اوى انا بصو ركبت عربيات من ايام الجامعة قد كدة وركبت امريكانى وركبت هوندا وسيتروين وشيفورلية شيفت وبونتياك وفولكس فاجن ولانشيا كمية عربيات ياجماعة بجد كتير لاكن فى حياتى مشفتش فرامل خداعة زى فرامل العربية دى بجد مش عارف اية الحل ومش عارف اعمل اية وخايف امشى بيها بعد كدة مش اجرى بيها بقى لما عملت معايا كدة وانا على 75 امال لو كنت على سرعة عالية بقى كانت عملت اية ...

المصيبة التانية بقى رحت التوكيل عملت مقايسة للعربية شوفو بقى المهازل

العربية عايزة 2 فانوس امامى
اكصدام
فوجات
حديد اكصدام
صدر امامى
شبكة امامية
كبوت

المهم مجموع سعر الحاجات دى علشان متطولش عليكو يعنى 7500 جنية

طيب اوكى عايز اعملهم يقوم التوكيل المحترم يرد عليها ويقولى اية تخيلو والنبى معندناش من الحاجات دى غير الفانوس اللى قدام شمال تخيلو طيب ياسيدى الحاجات دى تيجى امتى
يقوم يقولى حسأل مسؤل المخازن والتوريدات وارد عليك يقوم يرد عليا اخر اليوم بتليفون تانى مستفز اكتر يقولى اية تخيلو مفيش ميعاد معين اقدر اقولهولك امتى الحاجة دى ممكن تيجى طيب اقول كلمة قليلة الادب ولا انتو اللى تقولو بجد مش متخيل كمية قلة الادب وعدم مراعاة الناس دى لينا يعنى كمان مفيش قطع غيار للعربية طيب انتو بتبيعوها لية لما انتو معندكوش قطع غيار ليها انا مش قادر اقولكو كنت بحب العربية دى قد اية ومش قادر اقولكو غير برضو انى كرهت العربية دى قد اية وخايف منها وقرفان من التوكيل واول لما اصلحها حبيعها حتى لو حخسر فيها مش مشكلة بس بجد حسبى الله ونعم الوكيل فى التوكيل وفى الفرامل اللى حتموتنا دى واقول لكل حد عايز يجيب العربية دى هاتها بس استحمل بقى موضوع الفرامل اللى فى وقت الخطر مش بتلاقية دة يلا الحمد للة .
اسف طولت عليكو بس للامانة كنت لازم احكى ليكو كل حاجة حصلت بالتفصيل وشكرا.

**Dr'AhmZZong** · 17-12-2012 03:57 AM

ربنا يصبرك على ما ابتلاك بييييييه ..

حاول تروح أي محل قطع غيار برة و إن شاء الله هتلاقي لأن بروتون عربيتها منتشرة و لو اعرف فييييين واللهِ ماكنت بخلت عليك لكن أنا معايا نيسان فمعرفش ..

تحياتي ..

**eng.m7md.ali** · 17-12-2012 04:32 AM

لا حول ولا قوة الا بالله

ربنا يصبرك ومش هندافع عن التوكيل والاغبية اللي هناك اللي بجد مبيفهموش في التوك توك حتى

حسبي الله ونعم الوكيل فيهم

حضرتك من حقك تعمل معاهم اي حاجة ووترفع قضية عليهم لان لاقدر الله ممكن كانت الخساير تبقى اكبر من كدة

ومدام اشتكيت من الفرامل ان ده عيب صناعة وهم معرفوش الحل يبقى حقك تطلب تعويض عن الاضرار اللي حصلتلك + تصليح العربية على حسابهم

**katoba** · 17-12-2012 05:20 AM

لاحول ولا قوة الا بالله , متزعلش ياباشا وصدقنى الى حصل معاك كان نصيب هيحصل هيحصل وساعة القدر يعمى البصر زى مابيقولوا وان شاء الله كله يتحل وبسعر اقل من كدة بكتير حاول بس تسال على محلات برا اكيد هتلاقى فى التوفيقية او هنا او هنا , انا عملت زيك حادثة من 8 شهور وبردة مكنتش عارف جت ازاى س هوا النصيب زى مابقولك

**S O P H O S** · 17-12-2012 06:41 AM

الحمد الله انك بخير
مش عارف اقول ايه علي التوكيل ده وعلي عيب زي ده
هما مش فاهمين ان الفرامل مفيش فيها هزار !!

**smsmsaad** · 17-12-2012 08:22 AM

قدر الله وماشاء فعل.. والحمد لله ان ربنا سترها عليك
وياريت متسيبش حقك، ابعت ايميل شكوى على الشركة الام انا مش عارف الايميل بتاعهم بس كنت شفت موضوع زى كدة حصل. وهدد التوكيل انك هتشتكى فى حماية المستهلك
وعلى فكرة انا حاجز جين 2 . مش عارف هعمل ايه بقى