-
انا شايف حل الشيك كويس و لو مش متوفر دفتر شيكات يتكتب وصل و العربية معاك تسجل ياخد وصله و تاخد انت عقد عربيك و الف مبروك يا باشا
انا لما بعت الفورد الراجل جالي قبل بيوم دفع 1000 جنيه ربط كلام و اتفقنا اننا نتقابل في البت الصبح اخد فلوسي و نطلع نسجل
جه فعلا و دجفع الفلوس في البيت و طلعت معاه علشان اسجل و كل ده بعربية الوالد يعني حتى مكنش بالعربية اللي بنبيعها و هو اللي سايقها و خلصنا و رجعنا على البت دور و اخد عربيته
بردو في شقة اتفقنا نتقابل في البنك دفع الفلوس و اديته وصل الايداع خليته معاه في ايده و هو في عربيتو وانا في عربيتي و طلعنا ورا بعض و سجلنا و كل واحد مشي في طريقه
و انا اعرف دكتور احمد معرفة شخصية و الله شهادة اتسئل عليها يوم القيامة هو شخص قمة في الاخلاق و الاحترام و مش عاوزك تبقى قلقان خالص ... من حقك تقلق نظرا للظروف اللي في البلد و هو كمان من حقو يقلق لنفس الظروف
-
ياجماعة اي واحد يحط نفسو مكاني الاستاذ احمد طالب مني احطله في البنك بأسمه 70الف جنية ويكتبلي بيهم عقد ابتدائي قبل ما نروح للشهر العقاري ياجماعة احط 70 الف جنية واخد بيهم عقد ابتدائي اعمل بية اية طيب انا نفسي حد يحط نفسة مكاني بس او يشفلي حل تاني يمكن اانا غلطان
-
يا سيدى الفاضل المشترى يسلم الفلوس إلى البائع فى أى مكان وليس شرطا يسلمها له فى بنك .. يعنى ممكن يسلمها له فى البيت مثلا .
وبكده يبقى الحل الأمثل فى هذه الحالة إن المشترى يديك فلوسك فى البيت ناقصة مثلا 5 آلاف جنيه ويستلم العربية والرخصة ونسخة من عقد البيع الإبتدائى وممكن يبقى فيه شهود كمان والنسخة التانية تبقى مع البائع ويكون مكتوب فيها إقرار إن المشترى استلم العربية فى ساعته وتاريخ علشان يبقى هو المسئول عنها .
بعد كده يتم التوجه إلى الشهر العقارى لعمل التسجيل وتسليم البائع باقى المبلغ بتاع العربية .
99% من البيع بيتم بالطريقة دى .
((ومن يتوكل على الله فهو حسبه))
-
السلام عليكم ورحمة الله وبركاته..
الإخوة الأفاضل،
واضح ان انتوا الاتنين ناس محترمين وانتوا الاتنين جواكم بعض الخوف بسبب أحوال البلد
وده شيء طبيعي في ظل الظروف اللي عايشين فيها والمواقف والسرقات اللي بنشوفها كل يوم
فأنا باقترح حل يرضي جميع الأطراف بإذن الله تعالي وهاتكون تكلفته قليلة وكمان ممكن تقسموها عليكم انتوا الاتنين بالنص :)
حضراتكم هاتروحوا البنك
تطلبوا عمل شيك بنكي مقبول الدفع لحامله بمبلغ السبعين ألف جنيه
الشيك مقبول الدفع
ايه هو الشيك مقبول الدفع ده؟؟
ده عبارة عن شيك فلوسه مضمونه لأن تم إيداعها مسبقا..
يعني ماينفعش حد يوقف صرفه ولا ينفع تروح تصرفه ماتلاقيش رصيد - تمسكه في إيدك كأنك ماسك الفلوس بالظبط
ده عبارة عن ان البنك بيعمل حساب جديد مؤقت فقط لاستخدام الشيك اللي هايطلع ده
هايتم إيداع الفلوس في الحساب المؤقت ده والبنك بيديكم الشيك المقبول الدفع ده لحامله
الحساب ده بيكون باسم البنك وعلى ذمته مش باسم حد فيكم
وطالما تم إصدار الشيك يبقا لا يمكن التصرف في الفلوس دي وبتفضل محجوزة لصرف الشيك فقط لا غير
بمعنى ان الفلوس دي أصبحت في ذمة البنك ولا يمكن صرفها أو استردادها إلا بالشيك تحت أي ظرف من الظروف
حتى لو الشخص اللي أودعها جه بنفسه عشان ياخدها مش هايرضوا يدوهاله غير لما ياخدوا منه الشيك
فالخلاصة
تعملوا المبلغ بشيك مقبول الدفع والشيك ده يفضل في إيد المشتري
(كده فلوسه معاه - لو حصل اي حاجة هايروح يديهم الشيك وياخدها)
تروحوا سوا عالشهر العقاري تخلصوا الإجراءات ويتم تسليم الشيك للبائع في الشهر العقاري..
البائع ياخد الشيك تبقا فلوسه كده في إيده ويا دار ما دخلك شر..
النقطة النهائية هي مصاريف الشيك المقبول الدفع أعتقد انها ممكن توصل حوالي 300 جنيه
حط 150 عليك و150 عليه وتبقا كده العملة زي الفل وكل واحد متطمن ومعاه ضماناته :)
-
معتقدش ان الاستاذ احمد هيرضي الاستاذ احمد موقفلي الكلام علي نقطة واحدة بس الفلوس في البنك بأسمة وفي حسابة قبل مانروح الشهر العقاري وكل دا مقابل عقد ابتدائي يبقي معايا ياجماعة انا عندي حل تاني ينفع موظف الشهر العقاري يروح البنك ويبقي معانا في البنك ويمضيني اني العربية بقت بأسمي او ينفع استاذ احمد يستأجر معلش وانا عارف انكو هتضحكو بودي جاردات من شركات حراسة او شركات امن يبقو معاة في الشهر العقاري او ينفع يستأجر سيارة نقل اموال اي حل ياجماعة بس مرميش كل فلوسي في البنك مقابل عقد ابتدائي حطو شئ يخدم المشتري بردو لان المشتري وكمان الاستاذ احمد بيقولي ان الشهر العقاري في منطقة اسمها الوفاء والامل اول مرة اسمع عنها ودي منطقة بعيدة عن مدينه الرحاب انا بصراحة مش عارف اعمل اية لية الاخ احمد مسدد في وشي كل الطرق
ارجوكم شوفولي حل مناسب
-
حضرتك مصعبها على نفسك جدا
-
:Zb_sor1[1]: أيه الرعب دا اللي من الطرفين
صحيح وضع البلد مقلق ، لكن مش للدرجة دي !
دا أنا بعت عربيات وأشتريت عربيات وأخدت فلوس وإديت فلوس
وكنت لوحدي ، وببيع لناس أغراب وبشتري من ناس أغراب ومكنتش مرعوبة كدة
لدرجة أني بعد ما قريت الموضوع دا بقول لنفسي أنا عديت إزاي :8954[1]:
الحمد لله على نعمة عدم الوسوسة
وإقتراح أحد الأعضاء بأن المشتري يدفع بشيك مقبول الدفع أعتقد أنه إقتراح جيد لتقليل المخاوف من الطرفين
وربنا يوفقكم في البيع والشراء
-
استاذ عمرو
دكتور احمد انسان محترم
وخدوم وابن ناس
وعلشان افاجئك
مقابلتوش ولا مرة
وكل اللى بينا كان كلام تليفونات
قلق كل واحد فيكم له عذره
انت قلقك من انك هتدفع فلوس وممكن مش هيسجل لك مثلا ولا يحصل اى مشكلة
وهو قلقان من ان الفلوس تكون مزورة او معيبة او تتسرق منه
شخصيا مريت بتجربة صديق ليا اشترى عربية من واحد وكانت تقسيط
دفع الفلوس قبل التسجيل كاملة للراجل علشان يفك الحظر
وما استلمش العربية
ويوم المرور حضر ومرة واحدة اختفى
رحت لصاحبى ووقفت انا جنب العربية لحد ما لقى البائع
الحلول المقترحة من شخصى
انت بعد سداد المبلغ
هتاخد العربية
وممكن دكتور احمد يديك الرخصة كمان
وهات حد من طرفك يفضل فيها لحين التسجيل
او
يعمل لك توكيل سيارة بس مش لمصاحة الطرفين ويجوز الغائه من طرف واحد
وده لو حصل اى مشكلة لا قدر الله يسهل الغاء التوكيل واعادة الفلوس
او
ما دمتم من المنتدى انتم الاتنين
شوفوا حد ثقة
ياخد الفلوس معاه والعربية لحين التسجيل وكل واحد بعد التسجيل ياخد حاجته
بس انت عرفت الدكتور منين وهو مش عارف انك فى المنتدى
ده اللى مستغربه
-
في حل ممكن يكون وسط
الاخ المشتري هيحط الفلوس في حساب بنكي ويفضل يكون hsbc
وبعد كده الصبح بدري يتقابلوا مثلا عند فرع البنك اللي في سيتي ستارزاو الاقرب لاي شهر عقاري والمشتري يسحب الفلوس كلها من البنك بحضور البائع علشان يضمن عدم تزوير الفلوس ويتطمن على العد برضه ويتحط في ظرف ويتقفل باحكان بدبابيس دباسة علشان لو اتفتحت تبان ويتحط عليه اي علامة من الطرفين للتاكد من عدم الفتح
والفلوس تفضل مع البائع
يروحو الاثنين الشهر العقاري ويمضوا هناك وسلم واستلم فورا امام الموظف
تطلع من الشهر العقاري على البنك للايداع فورا
وخلص الموضوع
وللا عقد ابتدائي ولا غير
طالما انتو خايفين قوي كده
-
انا لما كنت بشتري العربيه اديت الراجل الفلوس وكتبنا عقد ابتداي واقرار وخدت العربيه والرخصه اتقبلنا بعدها بكام يوم في التوكيل وكشفت عليها وروحنا الشهر العقاري وعمالي توكيل وكان هو اصلا معمولو توكيل ومشيت بالعربيه فتره كدا وروحت سجلت لنفسي ومكنتش اعرفو مقابلو في السوق
الحل يعملك توكيل وتسجل تاني يوم وتاخد العربيه وتديلو الفلوس يا اما شيك بنكي مقبول الدفع وبلاش الخوف الزياده الي انتو فيه دا
Content Relevant URLs by
vBSEO 3.6.0 PL2