الموضوع: اختلط الزيت بالماء مرة اخرى بعد تغيير جوان وش السلندر

السلام عليكم,معذرة علي تكرآر إلموضوع ولكن اعتقد هنا القسم إلمناسب للمشكلة الأتيـة.
نوع عربيتي دايهاتسو ابلوس 1990 ,,, 1300 سي سي فتيس اوتوماتيك.

ظهرت المشكلة حين فقدت العربية عزمها و بعدها لم تدور وذهبت الي الميكانيكي وقال انه جوان وش السلندر وهيغيره سالته عن التكلفة المبدائية حتي اعمل حسابي قال 600 جنيه ويمكن تزيد حسب إلي هيحتاج يغيره قولتله شكرا ومشيت!
ذهبت الي مركز صيانة إسمه كار هوسبيتال في هضبة الهرم ربنا يسامحهم,
وقال هيغير الجوان وهتكون التكلفة 200 مصنعية و 75 تغيير زيت 3000,و120 جوان لانه هيتعمل عمولة وبالمواصلات ,
بعد يوم ذهبت لاتطمئن علي العربية لاقيتهم لسا مشتغلوش فيها ولسا بيبدا يفك الموتور من فوق,وجيه مهندس إسمه احمد تقريبا مدير المركز,بيقولي العربية دي مش عايزة جوان بس ده الموتور كله عايز يترمي قولتله ليه؟قالي بص المنظر وكان شايل بس الوش الي بيتحط فوق الموتور عند غطاء تغيير الزيت وقالي منظر الزيت بيقول كده, قولتله بس معروف ان لما الزيت بيطحن بإلشكل ده يبقي جوان بس و خرط ف الوش لو فيه فقع,, بصلي بتناكة وقالي ده شغلي :d
وانا عارف بقولك إيه ولو غيرنا الجوان بس مضمنهاش لاخر الشارع, إفتكرته عايز يفتح فتحة يعمل منها فلوس وخلاص قولتله لا إن شاء الله هتتحل,
وبعد 4 ايام استلمتها أمس,ودارت زي الفل و لكن لاقيتهم مبوظين الباب اليمين بتاع العربية,ويقولي هو كان كده,رغم انه كان مقفول, ولكن فرحتي بإلعربية إنها اتصلحت خلتني اكبر دماغي وقولت اودي العربية لحد يفهم في الابواب,
النهارده نزلت ادور العربية دارت ولسا بلف بيها بطلت نزلت ابص ع الزيت لاقيته محطن تاني, ولكن الردايتير مكنش بينفخ زي الاول قبل ما اغير الجوان,لكن مش بتدور خالص وبفتح الردايتير حسيت ان فيه بقعة زيت علي الماء.
ولما اتصلت بمركز الصيانة قالي, شوفت انا قولتلك,العربية دي محتاجة شورت بلوك او تحطلها موتور عربية نقل :(
قولتله شكرا و قفلت, وانا مخنوق جدا ونفسيتي تعبانة بجد , وأتمني حد يقولي حل هنا.
ملحوظة:غطاء قربة الماء الي بتتصل بالردايتير غير موجود كان ضايع مني هل هذا ممكن يكون سببا؟
وانا قرأت هنا عن مادة حمرآء بتتحط في الماء لسد الشروخ الموجودة ف الموتور دي منين اجيبها و بكام, دلوقتي اعمل ايه و اروح فين عشان ارجع عربيتي زي ما كانت إلمشكلة آلآكبر إني سآكن في هضبة إلهرم ومعرفش غير ميكانيكي واحد فآلي يقدر يفيدني بميكآنيكي محترم يبقي كتر خيره,تحياتي لكم شكرآ .