الموضوع: أول سنة حياة وظيفية - سيرة ذاتية

المشاركة الأصلية كتبت بواسطة Chicco

مع اني قريت الموضوع ده قبل كده انما بجد عايز اقراه تاني و تالت .....مليان أحداث و مفاجات و دروس (بعمل تشويق للي ما قرهوش:)) و أحلى حاجة فيه اسلوبك في الكتابة بجد ربنا يبارك لك :)

شهادة أعتز بيها من أخ عزيز.. جدا :)

و اشتغلللللللت


رحت يوم 15 أكتوبر عشان أستلم الشغل في كي جي مدرسة لغات بوسط البلد.. المدرسة صغيرة طبعا عشان مكانها بس كانت في شارع من أروق شوارع وسط البلد عشان كان قدامها ضريح سعد.. يعني تعتبر حتة فاضية نسبيا بالمقارنة ببقية وسط البلد. معظم الطلبة كانوا من المنيرة.. السيدة زينب.. وسط البلد.. شبرا و قليلين اوي من غير المناطق دي. أصحاب المدرسة عبارة عن ناس شيك و ولاد ناس اوي.. الأب و زوجته الحاجة الأمورة اوي.. و ولادهم 3 الكبير هو اللي بيدير المدرسة فعليا و والده كان بيديرها في الواجهة بس.. و بالمناسبة الكبير ده دلوقتي عضو مجلس إدارة في النادي الأهلي.
الأصغر منه د. فلان و هو اللي ماسك دار النشر اللي صاحبها نفس الصخص اللي فوق ده و الصغير مش فاكرة عنه حاجة اوي.


مبنى الكي جي مستقل عن باقي مباني المدرسة و مصمم بحيث يناسب الأطفال الصغار.. أيامها كان كي جي1 من سن 3 و نص يعني صغننين خالص


مدير الحضانة كان لسه متعين قبلي بيوم واحد.. انما كان انسان بصراحة.. ما يتكررش كتير ان واحد يقابل حد زيه في حياته العملية.. اما الزميلات فدول حكايتهم حكاية.. بس ندخل الأول في تفاصيل أول يوم شغل عشان ده كان يوووووووووووووم

رحت أول يوم.. أخدتني المشرفة على اللغة الانجليزية بالمدرسة و عرفتني بمدير الكي جي اللي رحب بية و أخدني للفصل و سابني مع الأطفال .. حوالي 30 طفل في الفصل.. قاعدين مع المشرفة عشان مافيش مدرسة ليهم.. المدرسة اللي بدأت معاهم السنة جالها شغل في شركة و سابت المدرسة من غير نوتيس و عشان كده استنجدوا بية ألحقهم (ده اللي عرفته بعد كده). دخلت الفصل كلهم في سن 3 سنين و نص و 4 سنين.. كلهم تقريبا بيعيطوا و عايزين ماماااااااااااااااااا :(

أختكوا بأه أول مرة تدخل فصل.. أول مرة اتعامل مع أطفال.. آخري كان ابن اختي اللي ايامها كان عنده سنتين و اول ما يعيط أخلي مسئوليتي منه تماما
انما طبعا الواحد لما يتحط في التجربة بيبقى واحد تاني خالص اللي هو عارفه. الصراحة انا مش فاكرة عملت ايه في اليوم ده و لا سكتت العيال ازاي و لا شغلتهم في ايه و لا اليوم ده عدى ازاي.. انا كل اللي فاكراه اني روحت اليوم ده ما نطقتش في البيت بولا كلمة.. اتغديت في صمت و دخلت انام شوية.. فاكرة كويس اني كنت بحاول انام انما دماغي فيها دوشة و عيال و عياط و ماماااااااااااااااا و هانروح امتى يا ميس؟

طبعا ما عرفتش انام خالص و قمت و دماغي فيها فكرة واحدة بس أو جملة واحدة بس بتتردد فيها بزن مش طبيعي: انا مش رايحة المكان ده تاني.. انا مش هاروح الشغل بكرة.. انا مش رايحة تاني.. مش هاروح تاني.. مش هاروح تاني..

المشاركة الأصلية كتبت بواسطة Mohamed-Saoud

ايه معنى التوقيع بتاعك ده؟؟ انت فتحتي جامعة خاصة و لا ايه؟ :)

كليك على التوقيع و انت تعرف معناه ايه :)

المشاركة الأصلية كتبت بواسطة ehab08

لأ لأ لأ
ما ينفعش كده
من فضل حضرتك كفايه تشويق
أنا عاوز أعرف الموضوع كله مره واحده
نظام الحلقات ده متعب
أنتى الأحسن تاخدى أجازه يوم من الشغل وتكتبى الموضوع كله مره واحده

بس بصراحه كالعاده متفرده فى مواضيعك

جزاك الله خيرا على التشجيع :)

ان شاء الله مش هاطول في الحلقات.. بس هي برضه دي ليها طعم تاني أحلى من رزع القصة كلها مرة واحدة ممكن الناس تمل :)

طبعا طبعا طبعا.. رحت الشغل تاني يوم.. رحت و كلي امل ان النهاردة يكون احسن من امبارح.. بس نفس السيناريو حصل.. الولاد معظمهم بيعيط و عايز ماما.. و كل واحد ليه طقوس معينة في العياط و الزن.. يوسف مثلا مش بيدخل الفصل كده على طول الصبح زي الناس.. لازم والده يطلعه بنفسه.. و يقعد معاه شوية في الجاردن (مكان كبير كده بيودي ع الفصول و مفروش موكيت اخضر و فيه مراجيح و آخره الحمامات) و بعد ما يقعد معاه و يحاول يقنعه انه يدخل المعتقل (اللي هو الفصل يعني) يكون عدى نص ساعة تقريبا من الحصة الأولى.. و طبعا على ما بيدخل بيكون فضح الدنيا.. ابي ابي ابي (أصل والده كان ملتحي و والدته منتقبة و ما شاء الله في غاية الذوق و الاحترام و الرقي)
ما علينا.. شكلي هافرد للملحوظة دي بوست لوحده.. انما دلوقتي خلينا في يوسف.. لا حظت كمان ان والده كاتب اسمه في الكراسة بالانجليزي Yousuf يعني الإسم كما أٌنزل :)


آه بالمناسبة.. افتكروا اسم يوسف ده كويس عشان هايبقى لية معاه شأن آخر فيما بعد ان شاء الله
اللي كان بيحصل مع يوسف ده كان طقوس يومية.. لحد ما انا بأه بدأت آخد ع المكان و افتكر اني مدرسة و مهمتي هي اني أعود الطفل ده كمان على المكان و على زمايله و بدأت أخده من والده و أحببه في الفصل و الناس و العيشة و اللي عايشينها :D


ده كان يوسف.. اما سارة بأه فهي من 8 صباحا و حتى 2 بعد الظهر و هي في بكاء بلا انقطاع.. بتريح بس وقت البريك و وقت الأكل.. غير كده هي بتزن.. بتزن.. بتزن بلا رغبة في التوقف و بلا سبب محدد في أحيان كثيرة.. حبا في الزن و استمتاعا به مش اكتر


طبعا مش هاحكي لكوا على العيال واحد واحد.. انما دي بس عينة من الولاد اللي كانوا عندي.. طبعا كان فيه أطفال تانية كانوا بيروحوا حضانة من سن سنتين و أصغر فكانوا متعودين على جو الحضانات و البعد عن الأم فترة طويلة.. دول بأه اللي بدأت اتواصل معاهم و من خلالهم بدأت اتواصل مع البكائين الزنانين الآخرين.

الفصل اللي انا أخدته كان كي جي وان لغات، حيث الانجليزي هو اللغة الأولى للتعامل.. و مدرسة الفصل هي مدرسة الانجليش و الماث (اللي هي انا) بعكس فصول العربي اللي كانت مدرسة الفصل هي مدرسة العربي و الحساب.. انا كنت مدرسة فصل لكي جي وان و مدرسة انجليزي لفصل تاني كي جي تو و دول طبعا الحمد لله أكبر سنا و عقلا من كي جي وان و زيرو زن و عياط و شغل العيال بتوع الولاد الصغيرين دول


طبعا حاولت أعود الولاد على الحضانة.. دراسة حبة صغيرين و حواديت كتير و أناشيد كتير و هزار لحد ما الحمد لله اتضحت الملامح الرئيسية للحياة المدرسية.. بمرور الشهور بدأ الولاد ياخدوا ع الوضع.. لأ و ايه كمان؟ يحبوا المدرسة :)


يوسف اللي كان بيدخل الفصل بعد محايلة بأه يطلع الفصل لوحده و يدخل الفصل و هو بيشاور بإيده دود مورنيد ميس (دي اللي هي جود مورنينج طبعا)
اما سارة فبقت تضحك.. تصوروا.. سارة بتضحك.. هي طبعا لحد ما سبت المدرسة كانت برضه ام لمس.. انما ما بقتش تعيط اول ما تدخل الفصل
قضيت في المدرسة دي 9 أشهر بالتمام و الكمال.. اتعلمت فيهم حاجات كتير.. اتعلمت الصبر.. و النظر إلى الجانب المشرق من الأمور دوما. طبعا حصلت مني أخطاء أول مرة شغل.. بس المشكلة ان الخطأ و انا باشتغل في مدرسة.. يختلف تماما عن الخطأ و انا باشتغل في شركة.. في الشركة آخري ايه في نتيجة خطأي؟ ضياع ورقة؟ لخبطة في معلومة ما.. انما في المدرسة الخطأ بأذى طفل مافيش كلام