الموضوع: أول سنة حياة وظيفية - سيرة ذاتية

جزاكم الله خيرا على المشاركات و يا رب كل اللي مش لاقي شغل يلاقي :)

هاستأذنكوا بس الردود هاتبقى كل كام حلقة عشان التسلسل ما يضيعش :)

إتخرجت سنة 1997.. و اشتغلت شهر اكتوبر من نفس السنة.. يعني بقالي أكتر من 10 سنوات في الحياة الوظيفية.. على مداهم اشتغلت في مكانين فقط لا غير.. و مكان تالت كان شغل بارت تايم في السريع لمدة شهرين فقط.. ازاي بدأت و بقيت ايه؟ قابلني في السنين دي ايه؟ تحديات؟ عثرات؟ لحظات من السعادة و البكاء.. كله موجود..


تعالوا نبدأ الحلقة الأولىعلى بركة الله.

اتخرجت شهر 8 سنة 97.. اتخرجت و راحت ايام اللا مسئولية بلا رجعة.. و بدأت رحلة البحث عن عمل حتى قبل ما تطلع النتيجة.. بتوع آداب انجليزي مش بيغلبوا على ما يلاقوا شغل.. خصوصا البنات.. حتى في حفلة التخرج شهر 11 كان اكتر سؤال بيتردد في قاعة خفرع بمركز القاهرة الدولي للمؤتمرات حيث الحفلة: اشتغلتي فين؟ و في جميع الأحوال الإجابات كانت إيجابية.. و لله الحمد.
بدأت طرق أبواب العمل.. من مدارس.. لمكاتب ترجمة.. لشركات.. حتى لمدرسة خصوصي انجليزي بالحصة.. المهم اشتغل و خلاص
الأيام بتمر.. و باعمل مقابلات في منتهى الفشل.. هاتشتغلي مدرسة لكي جي و مرتبك هايكون 100 جنيه.. ليه يا ست الستاااااااااات؟ 100 جنيه بس لييييييييييييه؟ ده انا آداب عنجليزي عين شمس يا ولية
الإجابة اللي سمعتها اكتر من مرة و جابت لي إحباط ما بعده إحباط: أصلك خريجة مدارس عربي مش لغات
بس انا الانجليزي بتاعي كويس و الله و يمكن كمان اكتر بكتير من بتوع اللغات.. انما تقولوا لميييييييين؟ هو كده
طلعت عين اللي جابوني طبعا عشان أثبت للناس اني كويسة في العنجليزي.. طيب اختبروني.. طيب اتكلموا معايا انجليش و هتلاقوني لبلب.. و لا حياة لمن تنادي
طييييييب.. انا تكالي على الله مش عليكوا و لن يخذلني ابدا.. بس هه
و قد كان :)
كلمة على جنب كده بيني و بينكوا.. همه كان عندهم حق.. أصل على أيامنا كان مدارس العربي بيبدأوا يدرسوا انجليزي في أولى إعدادي.. يعني شحطة كده ما شاء الله طول بعرض و لسه بياخدوا A, B طبعا دول عمرهم ما هايتساووا باللي بياخدوا انجليزي من كي جي.انا شايفة ان عندهم حق كمدارس لغات انهم ما يشغلوش حد مش خريج مدارس لغات.. عشان فاقد الشئ لا يعطيه.. انما يبخسوا الناس حقهم بالطريقة دي و يميزوا بين خريجي مدارس اللغات و الحكومة في المرتب بالطريقة دي فهذا ما لا أقبله.. طيب ماذا يكون الوضع لو واحدة زميلتي خريجة نفس دفعتي اشتغلت في نفس المدرسة و كانت هي خريجة مدارس لغات و انا عربي؟ يبقى مرتبها ضعف مرتبي؟ ده عند أُنه يا أدهم

و نكمل الرحلة :)

أهرام الجمعة بالنسبة لي كان طوق النجاة.. أخرج يوم الخميس الساعة 10 بالليل أروح الميدان الاقي الأهرام نزل.. ما كنتش باقدر استنى ليوم الجمعة الصبح.. أفر اعلاناته كلمة كلمة بحثا عن كلمات مفتاحية زي: خريج حديث.. آداب او السن انجليزي.. سكرتيرة.. مدرسة مش عارفة ايه تطلب ايه.. و ابدأ ألف على الأماكن دي يوم السبت الصبح و اسيب السي في و اعمل انترفيوز ان امكن. من شهر 8 لحد نص 9 و انا على هذا المنوال.. لحد ما شركة في وسط البلد كانت محتاجة مترجمين كلموني.. و رحت تاني يوم على طول اشتغلت.. انما أجارك الله.. دي مطحنة يا عم مش وظيفة.. الوظيفة كانت ببساطة ترجمة فاكسات و مراسلات الشركة مع الدول الأجنبية.. أصل الباش مهندس ابن صاحب الشركة اللي ماسك الفرع ده مش بيعرف يفك الخط بالعنجليزي


اليوم كان عبارة عن اني انا و زميلي ننكفي طول اليوم نترجم في الفاكسات اللي جاية من الشركات اللي برة (ايامها الايميل كان رفاهية ما بعدها رفاهية و مش متوفر في معظم الشركات) و نفضل كده طول اليوم.. و طول ما فيه شغل انت بتشتغل يا حلو.. ممكن تقوم تصلي لك الفرض خطف و تقطم لك كام قطمة من ساندويتش ع السريع.. مواعيد العمل كانت ايه؟ من 9 صباحا و حتى 8 مساء
الأجازة امتى؟ يوم الأحد فقط.. يعني كان فيه شغل يوم الجمعة و اييييييييه؟ طحنة يابا


المهم أختكوا قعدت في الوظيفة دي اد ايه؟ 4 أيام.. اما 4 ايام في 11 ساعة شغل يعني 44 ساعة شغل قطع نفس.. انما قلت حقي برقبتي.. مالها قعدة البيت؟
و قعدت في البيت و لا همني

في هاذوها الأثناء كنت عملت انترفيو في مدارس كتير.. منها مدرسة كانت في الدقي.. لغات طبعا و محتاجين مدرسين في الابتدائي.. و طبعا التناكة المعهودة بتاعة انتي خريجة مدارس عربي.. و كان الاتفاق على 150 جنيه كمرتب و الدراسة هاتبدأ كمان يومين. مديرة المدرسة قاعدة بتكلمني في التفاصيل و انا قاعدة احسب هاصرف اد ايه مواصلات.. أصل ايامها ما كانش لسه مترو الأنفاق وصل لحد الدقي
يعني بنتكلم في اتوبيسات.. و طبعا المكيف او ال CTA ايامها ماكانش لسه عملوه اصلا.. ياااااااااه ده الواحد حاسس انه عجوز اوي

قلت لها طيب هافكر و ارد عليكي بكرة.. قالت لي اوك.. انما تاني يوم حاولت أوصل لها عشان اقول لها موافقة.. آآآآآآآآآآآبدا.. ماحدش راضي يوصلني بيها و لا يوصل لها رسالتي.. و طبعا كان واضح انها اتفقت مع حد تاني و مش عايزة تقول لي الخبر الوحش ده. على فكرة المصريين فيهم العادة المنيلة دي.. الهروب الهروب الهروب لآخر الدنيا لو مضطرين يبلغوا خبر سلبي زي مش هاناخدك في الوظيفة.. او لو معروض عليه وظيفة و مش عاجباه مش بيقول.. يفضل يعوم الأمور لحد ما تفهم لوحدك يا حدق


طبعا انا رجعت تاني في حيص بيص و هالف و أدور على شغل من تاني.. تااااااااااني يا ربي تااااااااااااني؟

المشاركة الأصلية كتبت بواسطة OlaOsman

هاستأذنكوا بس الردود هاتبقى كل كام حلقة عشان التسلسل ما يضيعش :)

هو انا هنا كنت أقصد ان ردودي انا ع الناس هي اللي هاتبقى كل كام حلقة.. يعني انتوا شاركوا و علقوا زي ما انتوا عايزين و انا هجمع الردود كل كام حلقة :)